Surah Ar-Ra'ad

  Para 13  
Surah 13 
Surah Ar-Ra'ad
ALLAH K NAAM SY SHUROO JO BOHUT MEHRBAN NEHAYAT REHEM FARMANY WALA HY
  1. ALIF LAAAM'MEEM RAA (Haqiqi muaani Allah aur Rasool s.a.w.w he behtar janty hen) Ye Kitab ( e-Elahi yani Quran Pak) ki Aayatain hen, aur jo kuchh Aap (s.a.w.w) k Rabb ki taraf sy Aap (s.a.w.w) ki janib naazal kia gea hy (wo) Haq hy (Os meiñ kuchh shubbah naheeñ) laikin aksar log Emaan naheeñ laty (yani Mushrikeen-e-Makkah jo ye kehty k Ye kalaam Muhammad s.a.w.w ny khud bna lia. Is Aayat me on kuffaar ka radd farmaya gea)¤
  2. Aur Allah Wo hy Jis ny Aasmanoñ ko baghair satoon k (khlaa meiñ) buland farmaya (jaisa k) tum daikh rahy ho phir (poori kaenaat pr muheet Apny) takht-e-iqt'daar pr mutamakkan huwa aur Os ny Sooraj aur Chaand ko nizaam ka paaband bna dia. Har aik apni muqarrarah me'aad (meiñ musaafat mukammal krny) k liye (apny apny madaar meiñ) chalta hy, Wohi (sari kaenaat k) poory nizaam ki tadbeer farmata hy, (sb) nishaniyoñ (ya qawaaneen-e-fitrat) ko tafseelan wazeh farmata hy ta k tum Apny Rabb k roo-broo hazir hony ka yaqeen kr lo¤
  3. Aur Wohi hy Jis ny (golai k bawjood) zmeen ko phailaya aur is meiñ pahaarh aur dar'ya bnaey, aur har qisam k phalloñ meiñ (bhi) Os ny do do (jinsoñ k) jorhy bnaey (Wohi) raat sy din ko dhaank leta hy, beshak is meiñ tafakkur krny waloñ k liye (bohut) nishaniyañ heñ¤
  4. Aur Zmeen meiñ (mukhtlif qisam k) qit'aat heñ jo aik dusry k qreeb heñ (koi qaabil-e-zraat aur koi pathreela aur raitla) aur Angooroñ k baghaat heñ aur khaitiaañ heñ aur Khajoor k darakht heñ, jhund-daar aur baghair jhund k, in (sb) ko aik he pani sy sairaab kia jata hy, aur (is k bawjood) Ham zaeqa meiñ baaz ko baaz pr fazilat bakhshty heñ (yehi haal insani quloob ka hy k baaz dil narm aur baaz sakht ho gaey), beshak is meiñ aqal-mandoñ k liye (barhi) nishaniyañ heñ¤
  5. Aur agar Aap (Kuffaar k inkaar pr) ta'ajjub kreñ to on ka (ye) kehna ajeeb (tarr) hy k kia jb ham (marr kr) khaak ho jaeñ gy to kia ham azsar-e-no takhleeq kiye jaeñ gy? Yehi wo log heñ jinhoñ ny apny Rabb ka inkaar kia, or inhi logoñ ki gardnoñ meiñ toq (parhy) hoñ gy or yehi log ehl-e-Jahannum heñ, wo os me hmesha rehny waly heñ¤
  6. Aur ye log Rehmat sy pehly Aap (s.a.w.w) sy azaab talab krny meiñ jaldi krty heñ, halanky in sy pehly kai azaab guzr chuky heñ, aur (Ay Habib s.a.w.w) beshak Aap (s.a.w.w) ka Rabb logoñ k liye on k zulm k bawjood bakhshish wala hy aur yaqinan Aap (s.a.w.w) ka Rabb sakht azaab deny wala (b) hy¤ 
  7. Aur Kaafir log kehty heñ k Os (Rasool s.a.w.w) pr On k Rabb ki taraf sy koi nishani q naheeñ otaari gai? (Kaafiroñ ka ye qol nehaayat bay-emaani ka qol tha jitni Aayat naazal ho chuki theeñ aur mojzaat dikhaey ja chuky thy sb ko onhoñ ny kal-adam qraar dy dia. Ay Rasool-e-Mukarram s.a.w.w) Aap to faqat (na-farmanoñ ko anjaam-e-badd sy) draany waly aur (dunia ki) har qom k liye hadaayat ba-ham pohnchaany waly heñ¤ 
  8. Allah janta hy jo kuchh har mada apny pait meiñ othaati hy aur rehem jis qadar sukarhty aur jis qadar barhty heñ (yani muddat meiñ kis ka hamal jald wazzah ho ga kis ka dair meiñ. Hamal ki km az km muddat 6 maah aur ziaada sy ziaada 2 saal hy), aur har cheez Os k hañ muqarrar hadd k sath hy¤ 
  9. Wo har nehaañ aur ayaañ ko jan'ny wala hy. Sb sy Bartar (aur) Aala rutba wala hy¤ 
  10. Tum meiñ sy jo shakhs aahesta bat kry aur jo buland aawaaz sy kry aur jo raat (ki tareeki) meiñ chhupa ho aur jo din (ki roshni) meiñ chalta phirta ho (Os k liye) sb brabar heñ¤ 
  11. (Har) insan k liye yakky-bad-deegry aany waly (Frishty) heñ jo os k aagy aur os k peechhy Allah k hukm sy os ki nigehbani krty heñ. Beshak Allah kisi qom ki haalat ko naheeñ badalta yahañ takk k wo log apny aap meiñ khud tabdili paida kr dalaiñ, aur jb Allah kisi qom k sath (os ki apni badd-aamaliyoñ ki wajjah sy) azaab ka irada farma leta hy to osy koi taal naheeñ skta, aur na he on k liye Allah k muqabla meiñ koi madad-gaar hota hy¤ 
  12. Wohi hy jo tumheñ (kabhi) draany aur (kabhi) omeed dilaany k liye bijli dikhaata hy aur (kabhi) bhaari (ghanny) baadloñ ko othaata hy¤ 
  13. (Bijliyoñ aur baadloñ ki) garraj (ya os pr mut'ayyan Frishta) aur tmaam Frishty Os k khof sy Os ki Hamd k sath tasbeeh krty heñ, aur Wo karhakti bijliyañ bhaijta hy phir jis par chahta hy osy gira deta hy, aur Wo (Kuffaar Qudrat ki in nishaniyoñ k bawjood) Allah k bary meiñ jhagrha krty heñ, aur Wo sakht tadbeer-o-grift wala hy¤ 
  14. Osi k liye Haq (yani Toheed) ki daawat hy, aur wo (Kaafir) log jo Os k siwa (maboodaan-e-batila yani buttoñ) ki ibaadat krty heñ, wo onheñ kisi cheez ka jwaab bhi naheeñ dy skty. On (Kaafiroñ) ki misaal to sirf os shakhs jaisi hy jo apni donoñ hatheliyañ pani ki taraf phailaey (betha) ho k pani (khud) os k moohñ takk pohnch jaey aur (yoñ to) wo (pani) os takk pohnchny wala naheeñ, aur (isi tarah) Kaafiroñ ka (buttoñ ki ibaadat aur on sy) dua krna gumrahi meiñ bhatakny k siwa kuchh naheeñ¤ 
  15. Aur jo koi (bhi) aasmanoñ aur zmeen meiñ hy wo to Allah he k liye Sajdah krta hy (ba'az) khushi sy (jaisy k Momin) aur (ba'az) majbooran (jaisy k Munafiq) aur on k saaey (bhi) subah-o-shaam (Osi ko Sajdah krty heñ to phir in Kaafiroñ ny Allah ko chhorh kr buttoñ ki Sajdah-raizi kiyoñ shuroo kr li hy)¤{AAYAT-E-SAJDAH} 
  16. (On Kafiroñ k samny) farmaeye k aasmanoñ or zmeen ka Rabb kon hy? Aap (s.a.w.w khud he) farma dejiye: Allah hy. (Phir) Aap (s.a.w.w on sy dar'yaft) farmaeye: Kia tum ny Os k siwa (on buttoñ) ko kaar-saaz bna lia hy jo na apni zatoñ k liye kisi naffa k malik heñ or na kisi nuqsan k. Aap (s.a.w.w) farma dejiye: Kia andha or bena brabar ho skty heñ ya kia tarikiyañ or roshni brabar ho skti heñ. Kia onhoñ ny Allah k liye aisy shreek bnaey heñ jinhoñ ny Allah ki makhlooq ki tarah (kuchh makhlooq) khud (b) paida ki ho, so (on buttoñ ki peda-krda) os makhlooq sy on ko mutashabah (yani mughaalta) ho gea ho, farma dejiye: Allah he hr cheez ka Khaliq hy or Wo Aik hy, Wo sb pr Ghalib hy¤ 
  17. Os ny aasmaan ki janib sy pani otaara to wadiyañ apni (apni) gunjaesh k mutabiq beh nikleeñ, phir sailaab ki ro ny obra huwa jhaag otha lia, or jin chezoñ ko aag pr tapaaty heñ, zaiwar ya dusra saamaan bnany k liye os pr bhi wesa he jhaag oth'ta hy, is tarah Allah haq or batil ki misaalaiñ beyaan farmata hy, so jhaag to (pani wala ho ya aag wala sb) bay-kaar ho kr reh jata hy or albatta jo kuchh logoñ k liye naffa bakhsh hota hy wo zmeen meiñ baqi rehta hy, Allah is tarah misaalaiñ beyaan farmata hy¤ 
  18. Aisy logoñ k liye jinhoñ ny apny Rabb ka hukam qbool kia bhlai hy, aur jinhoñ ny Os ka hukam qbool naheeñ kia agar on k pas wo sb kuchh ho jo zmeen meiñ hy aur is k sath itna aur bhi ho so wo osy (azaab sy nijaat k liye) fid'ya dy dalaiñ (tabb bhi) onhi logoñ ka hisaab bura ho ga, aur on ka thikaana Dozakh hy, aur wo nehaayat bura thikana hy¤ 
  19. Bhla wo shakhs jo ye janta hy k jo kuchh Aap (s.a.w.w) ki taraf Aap (s.a.w.w) k Rabb ki janib sy naazal kia gea hy Haq hy, os shakhs k maanind ho skta hy jo andha hy (yani Haq ko naheeñ janta), bat yehi hy k nasihat aqal-mand he qbool krty heñ¤ 
  20. Jo log Allah k aihed ko poora krty heñ aur qol-o-qraar ko naheeñ torhty¤ 
  21. Aur jo log on sb (haqooqullah, haqooqurrasool, haqooq-ul-ebaad aur apny haqooq-e-qraabat) ko jorhy rakhty heñ, jin k jorhy rakhny ka Allah ny hukam farmaya hy aur apny Rabb ki khashiyyat meiñ rehty heñ aur bury hisaab sy khaef rehty heñ¤ 
  22. Aur jo log apny Rabb ki raza-joi k liye sabr krty heñ aur Namaz qaem rakhty heñ aur jo rizq Ham ny onheñ dia hy os meiñ sy poshida aur ailaania (donoñ tarah) kharch krty heñ aur naiki k zarriye burai ko door krty rehty heñ yehi wo log heñ jin k liye Aakhrat ka (haseen) ghr hy¤ 
  23. (Jahaañ) sadaa-bahaar baghaat heñ. On meiñ wo log dakhil hoñ gy aur on k aaba-o-ajdaad aur on ki biviyañ aur on ki olaad meiñ sy jo bhi neiko-kaar ho ga aur Frishty on k pas (Jannat k) har darwazy sy aaeñ gy¤ 
  24. (Onheñ khush-aamdeed kehty aur mubarak-baad dety huwy kahaiñ gy) Tum pr salaamti ho tumhary sabr krny k silla meiñ, pus (ab daikho) Aakhrat ka ghr kia khoob hy¤ 
  25. Aur jo log Allah ka aihed os k mazboot krny k bad torh dety heñ aur on tmaam (rishtoñ aur haqooq) ko qatta kr dety heñ jin k jorhy rakhny ka Allah ny hukam farmaya hy aur zmeen meiñ fasaad-angaizi krty heñ onhi logoñ k liye laanat hy aur on k liye bura ghr (yani Jahannum) hy¤ 
  26. Allah jis k liye chahta hy rizq kushaada farma deta hy aur (jis k liye chahta hy) tang kr deta hy, aur wo (Kaafir) dunia ki zindagi sy bohut masroor heñ, halanky duniyavi zindagi Aakhrat k muqaabla meiñ aik haqeer mataa k siwa kuchh bhi naheeñ¤
  27. Aur Kaafir log ye kehty heñ k is (Rasool s.a.w.w) par is k Rabb ki janib sy koi nishaani kiyoñ naheeñ otri. Farma deejiye: Beshak Allah jisy chahta hy (nishaaniyoñ k bawjood) gumrah thehra deta hy aur jo Os ki taraf rujoo krta hy osy apni janib rehnumai farma deta hy¤
  28. Jo log Emaan laey aur on k dil Allah k ZIKR sy mutma'en hoty heñ, jan lo k Allah he k ZIKR sy diloñ ko itminaan naseeb hota hy¤
  29. Jo log Emaan laey aur naik amal krty rahy on k liye (Aakhirat meiñ) aish-o-musarrat hy aur omda thikaana hy¤
  30. (Ay Habib s.a.w.w) isi tarah Ham ny Aap (s.a.w.w) ko aisi Ommat meiñ (Rasool bna kr) bhaija hy k jis sy pehly haqiqat meiñ (saari) Ommatain guzr chuki heñ (ab ye sb sy aakhri Ommat hy) ta k Aap (s.a.w.w) in par wo (Kitab) parh kr suna deñ jo Ham ny Aap (s.a.w.w) ki taraf Wahi ki hy aur wo Rehman ka inkaar kr rahy heñ, Aap (s.a.w.w) farma dejiye: Wo Mera Rabb hy Os k siwa koi Mabood naheeñ, Os par Maiñ ny bhrosa kia hy aur Osi ki taraf Mera rujoo hy¤
  31. Aur agar koi aisa Quran hota jis k zarriye pahaarh chla diye jaty ya os sy zmeen phaarh di jati ya os k zarriye murdoñ sy bat kra di jati (tabb bhi wo Emaan na laty), balky sb kaam Allah he k ikhtiaar meiñ heñ, to kia Emaan waloñ ko (ye) maaloom naheeñ k agar Allah chahta to sb logoñ ko hadaayat farma deta, aur hamesha Kaafir logoñ ko on k kartootoñ k baes koi (na koi) museebat pohnchti rahy gi ya on k ghroñ (yani bastiyoñ) k aas paas otrti rahy gi yahaañ takk k Allah ka Wada ( e-azaab) aa pohnchy, beshak Allah wada khilaafi naheeñ krta¤
  32. Aur beshak Aap (s.a.w.w) sy qabal (bhi Kuffaar ki janib sy) Rasooloñ k sath mazaaq kia jata raha so MAIÑ ny Kaafiroñ ko muhlat di phir MAIÑ ny onheñ (azaab ki) grift meiñ ly lia, phir (daikhye) MERA azaab kaisa tha¤
  33. Kia Wo (Allah) Jo har jan par os k aamaal ki nigehbaani farma raha hy aur (wo butt jo Kaafir) logoñ ny Allah k shareek bna liye (aik jaisy ho skty heñ? Har giz naheeñ). Aap (s.a.w.w) farma dejiye k on k naam (to) btao. (Nadano) Kia tum Os (Allah) ko os cheez ki khabar dety ho jis (k wujood) ko Wo saari zmeen meiñ naheeñ janta ya (ye sirf) zahiri batain he heñ (jin ka haqiqat sy koi ta'alluq naheeñ) balky (haqiqat ye hy k) Kaafiroñ k liye on ka fraib khush-numa bna dia gea hy aur wo (seedhi) raah sy rok diye gaey heñ, aur jisy Allah gumrah thehra dy to os k liye koi haadi naheeñ ho skta¤
  34. On k liye duniyavi zindagi meiñ (bhi) azaab hy aur yaqinan Aakhirat ka azaab ziaada sakht hy aur onheñ Allah (k azaab) sy koi bachaany wala naheeñ¤
  35. Os Jannat ka haal jis ka par-haizgaroñ sy wada kia gea hy (ye hy) k os k neechy sy nehraiñ beh rahi heñ, os ka phall bhi hamesha rehny wala hy aur os ka saya (bhi), ye on logoñ ka (husn-e ) anjaam hy jinhoñ ny taqwa ikhtiaar kia, aur Kaafiroñ ka anjaam Aatish-e-Dozakh hy¤
  36. Aur jin logoñ ko Ham Kitab (Toorat) dy chuky heñ (agar wo sahi Momin heñ to) wo is (Quran) sy khush hoty heñ jo Aap (s.a.w.w) ki taraf naazal kia gea hy aur on (he k) firqoñ meiñ sy baaz aisy bhi heñ jo is (Quran) k kuchh hissa ka inkaar krty heñ, farma dejiye k bs Mujhy to yehi hukam dia gea hy k Maiñ Allah ki ibaadat kroñ aur Os k sath (kisi ko) shareek na thehraoñ, Osi ki taraf Maiñ bulaata huñ aur Osi ki taraf Mujhy laut kr jana hy¤
  37. Aur isi tarah Ham ny is (Quran) ko hukam bna kr Arbi zubaan meiñ otaara hy, aur (ay sun'ny waly) agar tu ny on (Kaafiron) ki khwaheshaat ki pairvi ki is k bad k tery pas (qattai) ilm aa chuka hy to tery liye Allah k muqaabla meiñ na koi madad-gaar ho ga aur na koi muhaafiz¤
  38. Aur (Ay Rasool s.a.w.w) Beshak Ham ny Aap (s.a.w.w) sy pehly (bohut sy) Paighambroñ ko bhaija aur Ham ny On k liye biviaañ (bhi) bnaeeñ aur olaad (bhi), aur kisi Rasool ka ye kaam naheeñ k Wo nishaani ly aey magar Allah k hukam sy, har aik meaad k liye aik noshta (yani likhat) hy¤
  39. Allah jis (likhy huwy) ko chahta hy mita deta hy aur (jisy chahta hy) sabt farma deta hy, aur Osi k paas asal Kitab (Loh-e-Mehfooz) hy¤
  40. Aur agar Ham (os azaab ka) kuchh hissa jis ka Ham ny on (Kaafiroñ) sy wada kia hy Aap (s.a.w.w) ko (hayaat-e-zahiri meiñ he) dikha deñ ya Ham Aap (s.a.w.w) ko (os sy qabal) otha laiñ (ye donoñ cheezaiñ Hmari marzi par munhasir heñ) Aap (s.a.w.w) par to sirf (ahkaam k) pohncha deny ki zimma-daari hy aur hisaab lena Hmara kaam hy¤
  41. Kia wo (Kaafir) naheeñ daikh rahy k Ham (on k zair-e-tasallut) zmeen ko har taraf sy ghtaaty chaly ja rahy heñ (aur on k baishtar elaaqy rafta rafta Islam k taby hoty ja rahy heñ), aur Allah he hukam farmata hy koi bhi Os k hukam ko radd krny wala naheeñ, aur Wo hisaab jald leny wala hy¤
  42. Aur beshak on logoñ ny bhi makr-o-fraib kia tha jo in sy pehly ho guzry heñ so in sb tadbeeroñ ko torhna (bhi) Allah k ikhtiaar meiñ hy. Wo khoob janta hy jo kuchh har shakhs kma raha hy, aur Kuffaar jald he jan leñ gy k Aakhirat ka ghr kis k liye hy¤
  43. Aur Kaafir log kehty heñ k Aap (s.a.w.w) Paighambar naheeñ heñ, farma dejiye: (Meri Risaalat par) Mery aur tumhary darmiaan Allah bator-e-gwah kafi hy aur wo shakhs bhi jis k pas (sahi tor par Aasmani) Kitab ka ilm hy¤ {LAST AAYAT OF SURAH AR-RA'AD}
Surah AR-RA'AD (By tilawat 13th and by Reveal 96th Surah of Holy Quran), ka tarjuma

ALLAH k fazal-o-karam aur aap ki duaoñ sy aaj 7 Shawaal ko mukammal ho gea.

Surah AR-RA'AD Madni Surah hy.
Surah AR-RA'AD ka tarjuma (33 din (July 25 to August 26, 2012 ) meiñ mukammal huwa.

SURAH AR-RA'AD ki tafseel ye hy.
Ruku : 6
Para  : 13 (Ruku 7 to 12)
Aayaat    :    43
Kalimaat :  855 
Huroof    :  3506
 

Subscribe to: Comments (Atom)