Para 15
SURAH 17
Surah Bani-Israaeel
ALLAH K NAAM SY SHUROO JO BOHUT MEHRBAN NEHAYAT REHEM FARMANY WALA HY
1.
Wo Zaat (har naqs
aur kmzori sy) Paak hy Jo Raat (yani Shabb-e-Meraaj) k thorhy sy hissa meiñ
Apny (Mehboob aur Muqarrab) Bndy (Hazrat Muhammad s.a.w.w) ko Masjid-e-Hraam sy
(os) Masjid-e-Aqsa tak ly gai jis k gird-o-nawaah ko Ham ny Ba-Barkat bna
dia hy ta k Ham Os (Bnda-e-Kaamil) ko Apni Nishaniaañ dikhaeñ (Jibraeel a.s
Sarwar-e-Aalam s.a.w.w ko Buraaq par swaar kr k Bait-ul-Muqaddas ly gaey jahañ
Aap s.a.w.w ny Tmaam Anmbia a.s ki imaamat farmai. Phir aasmanoñ ka rukh kia
aur Anmbia a.s ko Apni Ziaarat sy musharraf farmaya.Jannat-o-Dozakh ka
mushaheda farmaya. Aur Sidra-tul-Muntaha sy aagy os Qurb-e-Aa'la meiñ pohnchy k
jis k tasawwar tak khalq k ohaam-o-afkaar bhi parwaaz sy aajiz heñ), beshak
Wohi Khoob Sun'ny Wala Khoob Daikhny Wala hy¤ {1st Aayat of
15th Para}
2.
Aur Ham ny Moosa
(a.s) ko Kitaab (Toraat) ataa ki aur Ham ny Onheñ Bani-Israaeel k liye Hadaayat
bnaya (aur onheñ hukm dia) k Tum Mery siwa kisi ko kaar-saaz na thehrao¤
3.
(Ay) on logoñ ki
olaad jinheñ Ham ny Nooh (a.s) k sath (kashti meiñ) otha lia tha, beshak Nooh
(a.s) barhy shukr-guzaar Bndy thy (jab kuchh khaaty peety to Allah Ta'aala ki
Hamd krty aur Os ka shukr bjaa laty. So On ki olaad par laazim hy k wo apny
Jadd-e-Muhtram k treeqa par qaem rahy)¤
4.
Aur Ham ny Kitab
(Toraat) meiñ Bani-Israaeel ko qattai tor par bta dia tha k tum
(Shaam-o-Bait-ul-Muqaddas ki) zmeen meiñ zuroor 2 martba fasaad kro gy aur
(ata'at-e-Elahi sy) sarkashi barto gy¤
5.
Phir jab on donoñ
meiñ sy pehli martba (k azaab ka waa'da) ka waa'da aa pohncha to Ham ny tum par
Apny aisy bndy musallat kr diye jo sakht jang-joo thy phir wo (tumhari) tlaash
meiñ (tumhary) ghroñ tak ja ghussy (k tumheñ looteñ aur qattal-o-qaid kreñ),
aur (ye azaab ka) waa'da zuroor poora hona he tha¤
6.
Phir (jab onhoñ ny
tobah ki aur takabbur sy baaz aa gaey to) Ham ny on k oopar ghalba ko
tumhary haq meiñ paltaa dia aur Ham ny amwaal-o-olaad (ki kasrat) k
zarriye tumhari madad farmai aur Ham ny tumheñ afraadi quwwat meiñ (bhi) barha
dia¤
7.
Agar tum bhlai kro
gy to apny (he) liye bhlai kro gy (tumheñ is ka ajr dia jaey ga), aur agar tum
burai kro gy to apni (he) jan k liye,phir jab (tum ny Zakariyya a.s aur Yah'ya
a.s ko shaheed kia aur) dusry waa'da ( e azaab) ki gharhi aai (to aur zaalimoñ
yani Ehl-e-Faris-o-Room ko tum par musallat kr dia) ta k (maar maar kr) tumhary
chehry bigaarh deñ aur ta k Masjid-e-Aqsa meiñ (osi tarrah) daakhil hoñjaisy Os
meiñ (hamla-aawar log) pehli martba daakhil huwy thy aur ta k jis (mqaam) par
ghalba paeñ osy tabaah-o-brbad kr daleñ¤
8.
Omeed hy (is dusri
martba k bad agar tum toba kro to) tumhara Rabb tum par rehem farmaey ga aur
agar tum ny phir wohi (sarkashi ka tarz-e-ammal ikhtiaar) kea to Ham bhi wohi
(azaab dubara) kreñ gy, aur Ham ny Dozakh ko Kaafiroñ k liye qaid-khana bna dia
hy¤
9.
Beshak Ye Quran os
(manzil) ki rehnumai krta hy jo sb sy durust hy aur on Mominoñ ko jo naik ammal
krty heñ is bat ki khush-khabri sunata hy k on k liye barha ajr hy ¤
10.
Aur ye k jo log
Aakhirat par Emaan naheeñ rakhti Ham ny on k liye dard-naak azaab tayyaar kr
rakha hy 10¤
11.
Aur insaan (kabhi
tang-dil aur preshaan ho kr apny liye aur apny ghr waloñ k liye aur apny
maal-o-olaad k liye) burai ki dua maangny lagta hy (aur on k liye bd-duaeñ krta
hy) jis tarrah (apny aur apny ehl-o-maal k liye) bhlai ki dua maangta hy (agar
Allah os ki ye bd-dua qbool kr ly to wo shakhs ya os k ehl-o-maal hlaak ho jaeñ
laikin Allah apny Fazzal-o-Karram sy os ki bd-dua qbool naheeñ farmata), aur
insaan barha he jald-baaz waqea huwa hy¤
12.
Aur Ham ny raat
aur din ko (apni Qudrat ki) 2 nishaaniyañ bnaya phir Ham ny raat ki nishaani ko
tareek bnaya aur Ham ny din ki nishaani ko roshan bnaya ta k tum Apny Rabb ka
fazzal (rizq) tlaash kr sakko aur ta k tum (raat din k dory sy) barsoñ ka
shumaar aur hisaab maa'loom kr sakko, aur Ham ny har cheez ko poori tafseel sy
waazeh kr dia hy (khwaa os ki haajat Deen meiñ ho ya dunia meiñ)¤
13.
Aur Ham ny har
insaan k aa'maal ka noshta os ki gardan meiñ latka dia hy (yani jo kuchh khair
ya sharr os k liye muqaddar kia gea hy wo os ko os tarrah laazim hy jaisy gally
ka haar), aur Ham os k liye Qeyaamat k din (ye) naama-e-aa'maal nikaaleñ gy
jisy wo (apny saamny) khula huwa paey ga ¤
14.
(os sy kaha jaey
ga) Apni kitaab ( e aa'maal) parh ly, aaj tu apna hisaab jaanchny k liye khud
he kaafi hy ¤
15.
Jo koi
raah-e-hadaayat ikhtiaar krta hy to wo apny faeda k liye hadaayat par chalta hy
(os ka swaab wohi paey ga) aur jo shakhs gumraah hota hy to os ki gumraahi ka
wabaal (bhi) osi par hy,aur koi bojh othaany wala kisi dusry (k gunaahoñ) ka
bojh naheeñ othaey ga, aur Ham har giz azaab dainy waly naheeñ heñ yahaañ tak k
Ham (os qom meiñ) kisi Rasool ko bhaij leñ (jo Ommat ko os k fraaez sy aagaah
farmaey aur Raah-e-Haqq on par waazeh kry) ¤
16.
Aur jb Ham kisi
basti ko hlaak krny ka iraada krty heñ to Ham wahaañ k omraa aur khush-haal
logoñ ko (koi) hukam daity heñ (ta k on k zarriye awaam aur ghurbaa bhi durust
ho jaeñ) to wo os (basti) meiñ na-farmani krty heñ pus is par Hmara Farmaan ( e
azaab) waajib ho jata hy phir Ham os basti ko bilkul he masmaar kr daity heñ ¤
17.
Aur Ham ny Nooh
(a.s) k baad kitni he (takzeeb krny wali) qomoñ ko hlaak kr dala (misl
Aad-o-Smood waghaira k), aur Aap ka Rabb Kaafi hy (Wo) Apny bndoñ k gunaahoñ sy
khoob khabar-daar khoob daikhny wala hy¤
18.
Jo koi sirf dunia
ki khush-haali (ki soorat meiñ apni mehnat ka jaldi bdla) chahta hy to Ham isi
dunia meiñ jisy chahty heñ jitna chahty heñ jaldi dy daity heñ (ye zuroori
naheeñ k taalib-e-dunia ki har khwahesh poori ki jaey aur jo wo maangy wohi osy
dia jaey. Balky Allah jisy chahta hy daita hy or jisy chahta hy osy mehroom kr
daita hy) phir Ham ny os k liye Dozakh bna di hy jis meiñ wo mlaamat sunta huwa
(Rabb ki Rehmat sy) dhutkaara huwa daakhil ho ga ¤
19.
Aur jo shakhs
Aakhirat ka khwahesh-mnd huwa aur os ny is k liye is k laeq koshish ki (yani
amal-e-saleh bjaa laey) aur wo Momin (bhi) hy to aisy he logoñ ki koshish
maqbooliat paey gi (is Aayat sy maaloom huwa k amal ki maqbooliat k liye 3
cheezeñ darkaar heñ. 1. Taalib-e-Aakhirat hona yani niyyat naik hona 2. Amal KO
is k huqooq k sath ada krna. 3. Momin hona)¤
20.
Ham har aik ki
madad krty heñ on (taaliban-e-dunia) ki bhi aur in (taaliban-e-Aakaur walidain
k sath husn-e-sulook kia kro, agar tumhary samny donoñ meiñ sy koi aik ya donoñ
burhaapy ko pohnch jaeñ to onheñ 'of' bhi na kehna (yani aisd naheeñ hy¤
21.
Daikhiye Ham ny in
meiñ sy ba'az ko ba'az par (maal-o-kamaal aur jaah-o-sarwat meiñ) kis tarrah
fazilat dy rakhi hy, aur yaqinan Aakhirat (dunia k muqaabla meiñ) darjaat k
lehaaz sy (bhi) bohut barhi hy aur fazilat k lehaaz sy (bhi) bohut barhi hy¤
22.
(Ay sun'ny waly)
Allah k sath dusra ma'bood na bna (warna) tu mlaamat-zadda (aur)
bay-yaar-o-madad-gaar ho kr baitha reh jaey ga¤
23.
Aur Aap k Rabb ny
hukam farma dia hy k tum Allah k siwa kisi ki ibaadat matt kro aur walidain k
sath husn-e-sulook kia kro, agar tumhary samny donoñ meiñ sy koi aik ya donoñ
burhaapy ko pohnch jaeñ to onheñ 'UFF' bhi na kehna (yani aisa koi kalma zubaan
sy na nikaala jaey jis sy ye samjha jaey k on ki tarraf sy tabiat par kuchh
grani hy) aur onheñ jhirhkna bhi naheeñ aur on donoñ k sath barhy adab sy bat
kia kro (jaisy ghulam aaqa sy krta hy)¤
24.
Aur on donoñ k
liye narm-dili sy ijz-o-inksaari k bazoo jhukaey rakho aur (Allah k huzoor) arz
krty raho: Ay Mery Rabb! in donoñ par rehem farma jaisa k inhoñ ny bachpan meiñ
mujhy (rehmat-o-shafqat sy) pala tha (dua ka hukam is liye dia gea k behtar
sulook-o-khidmat meiñ kitna bhi mubaalgha kia jaey laikin walidain k ehsaan ka
haq ada naheeñ ho skta)¤
25.
Tumhara Rabb on
(batoñ) sy khoob aagah hy jo tumhary diloñ meiñ heñ (yani walidain ki ata'at ka
irada aur on ki khidmat ka zoq), agar tum naik seerat ho jao (aur tum sy
walidain ki khidmat meiñ taqseer waqea hui aur tum ny tobah ki) to beshak Wo
(Allah apni tarraf) rujoo krny waloñ ko bohut bakhshny wala hy¤
26.
Aur qraabat-daroñ
ko on ka haq ada kro (on k sath silah-rehmi kro aur muhabbat aur mail-jol aur
khabar-geeri aur moqa par madad aur husn-e-muaashrat kro) aur muhtajoñ aur
musafiroñ ko bhi (on ka haq yani Zakaat do) aur (apna maal na-jaez kaamoñ meiñ)
fuzool kharchi sy matt orhao¤
27.
Beshak fuzool
kharchi krny waly Shetan k bhai heñ (yani Shetan ki rah par chalty heñ), aur
Shetan apny Rabb ka barha he na-shukra hy (is liye os ka rasta ikhtiaar matt
kro)¤
28.
Aur agar tum (apni
tang-dasti k baes) in (mustehqeen yani qraabat-daroñ, muhtajoñ aur musafiroñ)
sy guraiz krna chahty ho apny Rabb ki janib sy Rehmat (yani khush-haali) k intzaar
meiñ jis ki tum tawaqqo rakhty ho to on sy narmi ki bat keh dia kro (on ki
khush-dili k liye on sy wada kro ya on k haq meiñ dua kr dia kro)¤
29.
Aur na apna hath
apni gardan sy baandha huwa rakho (k kisi ko kuchh na do) aur na he osy sara ka
sara khol do (k sb kuchh he luta dalo) k phir tumheñ khud mlaamat-zadda (aur)
thakka hara bn kr baithna parhy (aik Musalman bibi k samny aik Yahudia ny Moosa
a.s ki sakhaawat ka beyaan kia aur os meiñ is had tak mubalgha kia k Huzoor
s.a.w.w par tarjeeh di. Ye bat Musalman bibi ko nagwaar guzri aur onhoñ ny kaha
k Moosa a.s ki sakhaawat meiñ kuchh shak naheeñ laikin Huzoor s.a.w.w ka martba
sb sy aa'la hy. Ye keh kr onhoñ ny chaha k Yahudia ko Huzoor s.a.w.w k
Jood-o-Karam ki aazmaesh kra di jaey. Chunachy onhoñ ny aik chhoti bachi ko
bhaija k Huzoor s.a.w.w sy qmeez maang laey. Aap s.a.w.w k pas aik he qmeez the
jo zaib-e-tann the wohi otaar kr ata farma di. Is par ye Aayat naazal Hui)¤
30.
Beshak Aap ka Rabb
jis k liye chahta hy rizq kushada farma daita hy aur (jis k liye chahta
hy) tang kr daita hy, beshak Wo apny bndoñ (k aa'maal-o-ahwaal) ki khoob khabar
rakhny wala khoob daikhny wala hy¤
31.
Aur tum apni olaad
ko muflisi k khof sy qattal matt kro, Ham he onheñ (bhi) rozi daity heñ aur
tumheñ bhi, beshak on ko qattal krna bohut barha gunah hy (zamana-e-jaahiliat
meiñ log apni larhkiyoñ ko zinda gaarh dia krty thy aur is k kai sabbab thy
nadaari-o-muflisi ka khof, loot ka khof. is ki mamaaniat farmai gai) ¤
32.
Aur tum zanaa
(yani bd-kaari) k qreeb bhi matt jana beshak ye bay-ha'yai ka kaam hy, aur
bohut he buri raah hy¤
33.
Tum kisi jan ko
qattal matt krna jisy (qattal krna) Allah ny hraam qraar dia hy siwaey is k k
(os ka qattal krna shree'at ki roo sy) haq ho, aur jo shakhs zulman qattal kr
dia gea to beshak Ham ny os k waris k liye (qisaas ka) haq muqarrar kr dia hy
so wo bhi (qisaas k tor par bdla k) qattal meiñ hadd sy tajaawaz na kry (aik
maqtool k evaz kai kai ko qattal na kry ya bjaey qaatil k os ki qom k kisi aur
shakhs ko qattal na kry), beshak wo (yani maqtool ka waris ya maqtool mazloom
ya wo shakhs jisy maqtool ka waris na-haq qattal kry Allah ki tarraf sy)
madad-yaafta hy (so os ki madad-o-hmaayat ki zimma-daari hakoomat par ho gi)¤
34.
Aur tum yateem k
maal k (bhi) qreeb takk na jana magar aisy treeqa sy jo (yateem k liye) behtar
ho (wo ye hy k os k maal ki hifaazat kro aur os ko barhao) yahaañ takk k wo
apni jwani ko pohnch jaey (Hazrat Ibn-e-Abbas R.A k nazdeek yahaañ jwani sy
muraad 18 saal ki omar hy), aur wa'da poora kia kro (Allah ka bhi aur bndoñ ka
bhi), beshak wa'da ki zuroor poochh-gachh ho gi¤
35.
Aur naap poora
rakha kro jab (bhi) tum (koi cheez) napo aur (jab tolny laggo to) seedhy trazoo
sy tola kro, ye (de'yanat-dari) behtar hy aur anjaam k aitbaar sy (bhi)
khoob-tarr hy¤
36.
Aur (ay insan) Tu
os bat ki pairvi na kr jis ka tujhy (sahi) ilm naheeñ (yani jis cheez ko daikha
na ho os ki nisbat ye na kaho k maiñ ny daikha, jis ko suna na ho os ki nisbat
na kaho k maiñ ny suna. Na jhooti gwahi do, na kisi par wo ilzaam lgao jo tum
na janty ho), beshak kaan aur aankh aur dil, in meiñ sy har aik sy baaz-purs ho
gi (k in sy kia kaam lia gea)¤
37.
Aur zmeen meiñ
(takabbar-o-khud-numai sy) akkarh kr matt chall, beshak tu zmeen ko (apni
ra'oonat k zor sy) har giz cheer naheeñ skta aur na he har giz tu bulandi meiñ
pahaarhoñ ko pohnch skta hy (tu jo kuchh hy wohi rahy ga, takabbar-o-khud-numai
ka koi faeda naheeñ)¤
38.
(shirk, walidain ki bay-adbi, fuzool-kharchi,
bukhal, Muflisi k khof sy olaad ka qattal, zna-kaari, qattal-e-nahaq, yateem ka
maal khana, naap-tol meiñ kammi krna, kaan, aankh aur dil ka ghalt istmaal,
takabbar-o-khud-numai) in sb (mazkoora) baatoñ ki burai tery Rabb ko barhi
na-pasand hy ¤
39.
(Toheed ka hukam
daina aur dunia sy bay-raghbati aur Aakhirat ki tarraf raghbat dilana) Ye
Hikmat-o-Danai ki on batoñ meiñ sy hy jo Aap (s.a.w.w) k Rabb ny Aap (s.a.w.w)
ki tarraf Wahi farmai heñ, aur (ay insaan) Allah k sath koi dusra ma'bood na
thehra (warna) tu mlaamat-zadda (aur Allah ki Rehmat sy) dhutkaara huwa ho kr
Dozakh meiñ jhonk dia jaey ga¤
40.
(Ay Mushriko, khud
socho) Bhla tumheñ to tumhary Rabb ny baitoñ k liye chun lia hy aur (Apny liye)
Os ny Frishtoñ ko baitiyañ bna lia hy (ye khilaaf-e-hikmat bat kis tarrah kehty
ho), beshak tum (apny he gharhy huw kheyalaat k paimana par) barhi sakht bat
kehty ho (k Allah k liye olaad sabit krty ho jo khwaas-e-ajsaam sy hy aur Allah
is sy Paak hy phir is meiñ bhi apni barhai rakhty ho k apny liye to baity
pasand krty ho aur Allah k liye baitiyañ tajweez krty ho ye kitni bay-adbi aur
gustakhi hy)¤
41.
Aur beshak Ham ny
is Quran meiñ (haqaeq aur nasaeh ko daleeloñ sy bhi, misaloñ sy bhi, hikmatoñ
sy bhi, ibratoñ sy bhi aur ja-bja is mazmoon ko qisam qisam k pairaayoñ meiñ)
andaaz baddal kr bar bar beyaan kia hy ta k log nasihat hasil kreñ, magar
(munkreen ka aalam ye hy k) is sy on ki nafrat he mzeed barhti jati hy¤
42.
Farma deejiye:
Agar Os k sath kuchh aur bhi ma'bood hoty jaisa k wo (Kuffaar-o-Mushrikeen)
kehty heñ to wo (mil kr) Maalik-e-Arsh takk pohnchny (yani Os k
nizaam-e-iqtdaar meiñ dakhal-andazi krny) ka koi raasta zuroor tlaash kr laity
(aur Os sy bar-sar-e-paikaar hoty jaisa badshahoñ ka treeqa hy)¤
43.
Wo Pak hy, aur on
batoñ sy jo wo kehty rehty heñ bohut he buland-o-bartar hy¤
44.
Saatoñ aasmaan aur
zmeen aur wo sary mojudaat jo in meiñ heñ (zuban-e-haal sy ya zuban-e-qaal sy)
Allah ki Tasbeeh krty rehty heñ, aur (jumla kaenaat meiñ) koi bhi cheez aisi
naheeñ jo Os ki Hamd k sath Tasbeeh na krti ho laikin tum on ki Tasbeeh (ki
kaifiyyat) ko (ikhtlaaf-e-lughaat k baes ya dushwaari-e-adraak k sabbab) samajh
naheeñ skty, beshak Wo barha burd-baar barha bakhshny wala hy (k bndoñ ki
ghaflat par azaab meiñ jaldi naheeñ farmata)¤
45.
Aur jab Aap
(s.a.w.w) Quran parhty heñ (to) Ham Aap (s.a.w.w) k aur on logoñ k darmeyaan jo
Aakhirat par Emaan naheeñ rakhti aik poshida parda hael kr daity heñ (ta k wo
Aap s.a.w.w ko daikh na sakkeñ. is Aayat ki Shaan-e-Nazool ye hy k Abu Lahab ki
bivi pathar ly kr Aap s.a.w.w ko maarny ai magar jab Aap s.a.w.w k pas pohnchi
to Aap s.a.w.w osy nazar na aey q k aik Frishta Aap s.a.w.w aur os aurat k
darmeyaan hael raha)¤
46.
Aur Ham on k diloñ
par (bhi) pardy daal daity heñ ta k wo isy samajh (na) sakkeñ aur on k kaanoñ
meiñ bojh paida kr daity heñ (ta k isy sun na sakkeñ), aur jab Aap (s.a.w.w)
Quran meiñ apny Rabb ka tanha zikr krty heñ (on k buttoñ ka naam naheeñ aata)
to wo nafrat krty huwy peethh phair kr bhaag kharhy hoty heñ¤
47.
Ham khoob janty
heñ (k jab Aap s.a.w.w Quran parhty heñ to) ye (Kuffaar) jis maqsad k liye
dheyaan sy sunty heñ (yani sunty bhi heñ to tamas'khar aur takzeeb k liye aur)
jab ye Aap (s.a.w.w) ki tarraf kaan lgaty heñ aur jab ye sar-goshiyañ krty heñ
jab ye zalim log (Musalmanoñ sy) kehty heñ k tum to mehez aik aisy Shakhs ki
pairvi kr rahy ho Jo seher-zadda hy (yani Os par jadoo kr dia gea hy to Ham ye
sb kuchh daikh aur sun rahy heñ)¤
48.
(Ay
Habib-e-Mukarram s.a.w.w) Daikh'ye (ye log) Aap (s.a.w.w) k liye kaisi (kaisi)
tashbeeheñ daity heñ pus ye gumrah ho chuky, ab raah-e-raast par naheeñ aa skty¤
49.
Aur (Kuffaar bohut
ta'ajjub sy) kehty heñ: Jab ham (marr kr bosida) haddiyañ aur raiza raiza ho
jaeñ gy to kia hammeñ az-sar-e-no paida kr k othaya jaey ga?¤
50.
Farma deejiye: Tum
pathar ho jao ya loha¤
51.
Ya koi aisi
makhlooq jo tumhary kheyaal meiñ (in cheezoñ sy bhi) ziaada sakht ho (k os meiñ
zindagi pany ki bilkul slahiat he na ho aur hayaat sy door bay-jan ho tab b tum
dobara zinda kiye jao gy), phir wo (is haal meiñ) kahaiñ gy k hammeñ kon dobara
zinda kry ga? Farma deejiye: Wohi Jis ny tumheñ pehli bar paida farmaya tha,
phir wo (ta'ajjub aur tamas'khar k tor par) Aap (s.a.w.w) k samny apny sarr
hila deñ gy aur kahaiñ gy: Ye kab ho ga? (yani Qeyaamat kab qaem ho gi aur
murdoñ ko kab othaya jaey ga?) Farma deejiye: Ommeed hy (ye) jald he ho jaey ga¤
52.
(Qeyaamat ka Din
wo Din ho ga) Jis Din Wo tumheñ pukaary ga to tum Os ki Hamd k sath jawaab do
gy aur kheyaal krty ho gy k tum (dunia meiñ) bohut thorha arsa thehry ho¤
53.
Aur Aap (s.a.w.w)
Mery (Emaan-daar) bndoñ sy farma deñ k wo (Kaafiroñ sy) aisi bateñ kia kreñ jo
behtar hoñ (narm hoñ ya Pakiza hoñ, adab aur tehzeeb ki hoñ, irshaad-o-hadaayat
ki hoñ, Kuffaar agar bay-hoodgi kreñ to on ka jwab onhi k andaz meiñ na dia
jaey. Ye Hukam Jahaad k Hukam sy pehly tha, bad meiñ mansookh ho gea), beshak
Shetan logoñ k darmeyaan fasaad bapaa krta hy, yaqinan Shetan insan ka khula
dushman hy¤
54.
Tumhara Rabb
tumhary haal sy behtar waaqif hy, agar chahy tum par Rehem farma dy (aur tumheñ
Tobah aur Emaan ki tofeeq ata farmaey) Ya agar chahy tum par azaab kry, aur Ham
ny Aap (s.a.w.w) ko on par (on k omoor ka) zimma-daar bna kr naheeñ bhaija (k
on k aamaal k zimma-daar hoty)¤
55.
Aur Aap (s.a.w.w)
ka Rabb on (sb k ahwaal) ko khoob janta hy jo aasmanoñ aur zmeen meiñ (aabaad)
heñ (k kon kis laeq hy), aur beshak Ham ny ba'az Anmbia (a.s) ko (makhsoos
fazael k sath) ba'az par fazilat bakhshi (jaisy Ibrahim a.s ko Khaleel kea aur
Moosa a.s ko Kaleem aur Sayyad-e-Aalam s.a.w.w ko Habib) aur Ham ny Daood (a.s)
ko Zaboor ata ki (Jis meiñ 150 Surateñ heñ. Sb meiñ Dua aur Allah ki Sana hy.
Na Os meiñ halaal-o-haraam ka beyaan, na faraez, na hadood-o-ahkaam. Allah ny
Zaboor meiñ farmaya hy k Muhammad s.a.w.w Khaatam-ul-Anmbia heñ aur On ki Ommat
Khair-ul-Ommam. Yahood ka gumaan tha k Moosa a.s k bad koi Nabi naheeñ aur
Toraat k bad koi Kitab naheeñ, is Aayat meiñ Daood a.s ko Zaboor ataa farmany
ka zikr kr k Yahood ki takzeeb kr di gai)¤
56.
Farma deejiye: Tum
on sb ko bula lo jinheñ tum Allah k siwa (ma'bood) gumaan krty ho wo tum sy
takleef door krny par qaadir naheeñ heñ aur na (osy dusroñ ki tarraf) phair
dainy ka (ikhtiaar rakhty heñ. Kuffaar jab shadeed qehet meiñ mubtla huwy aur
nobat yahañ tak pohnchi k kutty aur murdaar kha gaey aur Sayyad-e-Aalam s.a.w.w
k huzoor far'yaad laey aur Aap s.a.w.w sy Dua ki iltija ki, is par ye Aayat
naazal hui aur farmaya gea k jab buttoñ ko khuda maanty ho to is waqt onheñ
pukaaro k wo tumhari maddad kreñ aur jab tum janty ho k wo tumhari maddad
naheeñ kr skty to q onheñ ma'bood bnaty ho)¤
57.
Ye log jin ki
ibaadat krty heñ (yani Malaeka, jinnaat, Eesa a.s aur Uzair a.s waghaira k but
aur tasveereñ bna kr onheñ poojty heñ) wo (to khud he) apny Rabb ki tarraf
waseela tlaash krty heñ k on meiñ sy (Baargaah-e-Elahi meiñ) ziaada muqarrab
kon hy (ta k jo sb sy ziaada Muqarrab ho os ko waseela bnaeñ) aur (wo khud) Os
ki Rehmat k omeed-waar heñ aur (wo khud he) Os k azaab sy drty rehty heñ (ab
tum he btao k wo ma'bood kaisy ho skty heñ wo to khud Ma'bood-e-barr-Haqq k
saamny jhuk rahy heñ), beshak Aap (s.a.w.w) k Rabb ka azaab drny ki cheez hy
(ye Aayat aik jama'at-e-Arab k haq meiñ naazal hui jo Jinnaat k aik groh ko
poojty thy wo Jinnaat Islam ly aey aur on ko poojny waloñ ko khabbar na hui.
Allah ny is Aayat meiñ onheñ aar dilai)¤
58.
Aur
(Kufr-o-sarkashi krny waloñ ki) koi basti aisi naheeñ magar Ham osy
Roz-e-Qeyaamat sy qabbal he tabaah kr deñ gy ya osy nehaayat he sakht azaab deñ
gy, ye (amr) Kitab (Loh-e-Mehfooz) meiñ likha huwa hy¤
59.
(Jab Ehl-e-Makkah
ny Aap s.a.w.w sy kaha k Safa pahaarh ko sona kr deñ to Allah ny farmaya) Aur
Ham ko (ab bhi in Kufr-o-sarkashi krny waloñ k mutalba par) nishaniaañ bhaijny
sy (kisi cheez ny) manna naheeñ kea siwaey is k k in he (nishaniyoñ) ko pehly
logoñ ny jhutla dia tha (so os k bad wo foran tabaah-o-barbaad kr diye gaey aur
koi muhlat baqi na rahi, Ay Habib s.a.w.w! Ham Aap s.a.w.w ki be'sat k bad Aap
s.a.w.w ki qom sy ye muaamla naheeñ krna chahty), aur Ham ny Qom-e-Samood ko
(Saleh a.s ki) oontni (ki) khuli nishani di the to onhoñ ny os par zulm kia,
aur Ham nishaniaañ naheeñ bhaija krty magar (azaab ki aamad sy qabbal aakhri
bar) khof-zadda krny k liye (phir jab os nishani ka inkaar ho jata hy to osi
waqt tabaah-kun azaab bhaij dia jata hy) ¤
60.
Aur (yad keejiye)
jab Ham ny Aap (s.a.w.w) sy farmaya k beshak Aap (s.a.w.w) k Rabb ny (sb) logoñ
ko (apny ilm-o-qudrat k) ahaata meiñ ly rakha hy, aur Ham ny to (Shabb-e-Meraaj
k) os nazzaara ko jo Ham ny Aap (s.a.w.w) ko dikhaya logoñ k liye sirf aik
aazmaesh bnaya hy (Emaan waly maan gaey aur zaahir-been ollajh gaey) aur os
darakht (Shajara-tuz-Zaqqoom) ko bhi jis par Quran meiñ la'nat ki gai hy (ye
darakht Jahannam meiñ paida hota hy. Laikin Abu-Jahhal ny Allah ki Qudrat ka
inkaar krty huwy kaha k aag meiñ darakht kahañ reh skta hy), aur Ham onheñ
draaty heñ magar ye (draana bhi) on meiñ koi izaafa naheeñ krta siwaey aur
barhi sarkashi k¤
61.
Aur (wo waqt yaad
keejiye) jab Ham ny Frishtoñ sy farmaya k tum Aadam (a.s) ko (tahiyyat ka)
Sajdah kro to Iblees k siwa sb ny Sajdah kia, os ny kaha: Kia isy Sajdah kroñ
jisy Tu ny matti sy paida kia hy?¤
62.
(Aur Shetan ye bhi
kehny lagga) Mujhy bta to sahi k ye wo Shakhs hy jisy Tu ny mujh par fazeelat
di hy? (aakhir is ki kia wajjah hy? Maiñ qassam khata hooñ k) agar Tu mujhy
Qeyaamat k Din takk muhlat dy dy to maiñ is ki olaad ko siwaey chnd (mukhlis)
afraad k (apny qabza meiñ ly kr) jarh sy okhaarh dooñ ga¤
63.
(Shetan k is
kalaam par) Allah ny farmaya: Ja (tujhy Nafkha-e-Ola takk muhlat hy) pus on
meiñ sy jo bhi teri pairvi kry ga to beshak Dozakh (he) tum sb ki poori poori
saza hy¤
64.
(Jab Iblees ny
olaad-e-Aadam ko gumrah krny k liye Allah sy muhlat maangi to Allah ny farmaya)
Aur jis par bhi tera bas chal skta hy tu (osy) apni aawaaz sy (yani was'wasy
dal kr aur ma'siyyat ki tarraf bula kr) dagmaga ly aur on par apni (foj k)
sawaar aur peyaada-dastoñ ko charha dy (yani apny sb makr tmaam kr ly aur apny
tmaam lashkroñ sy maddad ly ly) aur on k maal-o-olaad meiñ on ka shareek bn ja
(sood aur dusry hraam triqoñ sy maal kmany sy maal meiñ Shetan ki shirkat ho
jati hy aur zanaa sy olaad meiñ) aur on sy (jhooty) wa'dy kr, aur on sy Shetan
dhoka-o-fraib k siwa (koi) wa'da naheeñ krta¤
65.
Beshak jo Mery
(naik mukhlis) bndy heñ on par tera tasallat naheeñ ho sakky ga, aur tera Rabb
on (Allah waloñ) ki kaar-sazi k liye kaafi hy (k onheñ tujh sy mehfooz rakhy
ga) ¤
66.
Tumhara Rabb Wo hy
Jo samundar (aur dar'ya) meiñ tumhary liye (jahaaz aur) kashtiyaañ rawaañ
farmata hy ta k tum (androoni-o-bairooni tijaarat k zarriye) Os ka Fazzal (yani
Rizq) tlaash kro, beshak Wo tum par barha Mehrban hy ¤
67.
Aur jab samundar
meiñ tumheñ koi musibat la-haqq hoti hy (aur doobny ka andaisha krty ho) to wo
(sb but tumhary zehnoñ sy) gum ho jaty heñ jin ki tum purastish krty rehty ho
(on jhooty ma'boodoñ meiñ sy kisi ka naam zuban par naheeñ aata) siwaey Os
(Allah) k (Jisy tum os waqt yaad krty ho), phir jab Wo (Allah) tumheñ bacha kr
khushki ki tarraf ly jata hy (to phir os sy) roo-gardaani krny lagty ho (Os ki
Toheed sy mooñh phair laity ho), aur insaan barha na-shukra waqea huwa hy ¤
68.
Kia tum (samundar
k khatraat sy nijaat pa kr) is bat sy bay-khof ho gaey ho k Wo tumheñ khushki k
kinaary par he (zameen meiñ) dhansaa dy (jaisa k Qaroon ko dhansaa dia tha) ya
tum par pathar barsaany wali aandhi bhaij dy (jaisa k Qom-e-Loot par bhaiji
the) phir tum apny liye koi kaar-saaz na pa sakko gy (jo tumheñ bacha sakky)¤
69.
Ya tum is bat sy
bay-khof ho gaey ho k Wo tumheñ dubara os (samundar) meiñ paltaa kr ly jae aur
tum par kashtiyañ torh dainy wali aandhi bhaij dy phir tumheñ os Kufr k baes jo
tum krty thy (samundar meiñ) gharq kr dy phir tum apny liye os (dabony) par Ham
sy mu'aakhza krny wala koi naheeñ pao gy (jo Ham sy dar'yaaft kr sakky k Ham ny
aisa q kia. Q k Ham Qaadir Mukhtaar heñ jo chahty heñ krty heñ. Hmary kaam me
koi dakhal dainy wala naheeñ) ¤
70.
Aur beshak Ham ny
Banni-Aadam ko (aqqal-o-ilm-o-go'yai ataa farma kr) izzat bakhshi aur Ham ny on
ko khushki aur tarri (yani shehroñ aur sehraoñ aur samundroñ aur dar'yaoñ) meiñ
(mukhtlif sawaar'yoñ yani jaanwaroñ kashtiyoñ aur jahaazoñ waghaira par) sawaar
kea aur Ham ny onheñ pakiza cheezoñ sy (lateef aur khush-zaeqa) rizq ataa kea
aur Ham ny onheñ aksar makhlooqat par jinheñ Ham ny paida kia hy fazilat dy kr
bar-tar bna dia hy (yahañ aksar sy muraad kul hy. Momin Allah k nazdeek
Malaekah sy zeyaada kraamat rakhta hy. Farishtoñ meiñ aqqal hy shehwat naheeñ,
haivanaat meiñ shehwat hy aqqal naheeñ aur insaan shehwat-o-aqqal donoñ ka
jaamy hy, to jis ny aqqal ko shehwat par ghalib kea wo Malaekah sy Afzal hy aur
jis ny shehwat ko aqqal par ghaalib kea wo haivanaat sy bd-tar hy)¤
71.
Wo din (yaad kreñ)
jab Ham logoñ k har tabqa ko on k paishwa k sath bulaeñ gy (har qom apny sardar
k pas jamma ho gi jis k hukam par dunia meiñ chalti rahi khwaa os ny haq ki
da'wat di ho ya baatil ki), so jisy os ka noshta-e-aa'maal os k daeñ hath meiñ
dia jaey ga pus ye log apna naama-e-aa'maal (musarrat-o-shaadmani sy) parheñ gy
aur on par dhaagy brabar bhi zulm naheeñ kia jaey ga (yani sawaab-e-aa'maal
meiñ adna bhi kammi na ki jaey gi) ¤
72.
Aur jo shakhs is
(dunia) meiñ (haq sy) andha raha so wo Aakhirat meiñ bhi andha aur raah ( e
nijaat) sy bhatka rahy ga ¤
73.
Aur Kuffaar to
yehi chahty thy k Aap (s.a.w.w) ko os (Hukm-e-Elahi) sy phair deñ jis ki Ham ny
Aap (s.a.w.w) ki tarraf Wahi farmai hy ta k Aap (s.a.w.w) os (Wahi) k siwa Ham
par kuchh aur (baatoñ) ko mansoob kr deñ aur tab Aap (s.a.w.w) ko apna dost bna
leñ (Saqaif ka aik wafd Aap s.a.w.w k pas aa kr kehny lagga k agar Aap s.a.w.w
3 bateñ manzoor kr leñ to ham Aap s.a.w.w ki Bait kr leñ, Aik to ye k Namaz
meiñ Ruku-o-Sajood na kreñ gy, dusri ye k ham apny but apny hathoñ sy na torheñ
gy, teesri ye k Laat ko poojeñ gy to naheeñ magar aik saal os k poojny waly jo
nazreñ charhaawy laeñ os ko wasool kr leñ. Aap s.a.w.w ny inkaar kia to wo log
kehny laggy k agar Aap s.a.w.w ko andaisha ho k Arab shakaet kreñ gy to Aap
s.a.w.w on sy keh deejiye k Allah ka Hukam aisa he tha, is par ye Aayat naazal
hui) ¤
74.
(Kuffaar ny Aap
s.a.w.w sy kaha k Aap s.a.w.w Wahi k siwa kuchh aur bateñ bhi Allah k sath
mansoob kr deñ to Aap s.a.w.w ny on ki bat maan'ny sy inkaar kr dia, is par
Allah ny farmaya) Aur agar Ham ny Aap (s.a.w.w) ko (pehly he sy
ismat-e-Nabuwwat k zarriye) saabit-qaddam na bnaya hota to tab bhi Aap
(s.a.w.w) on ki taraf (apny pakiza nafs aur tabbai ista'daad k baes) bohut he
ma'mooli sy jhukao k qreeb jaty (on ki tarraf phir bhi zeyaada mael na hoty aur
wo na-kaam rehty magar Allah ny Aap s.a.w.w ko ismat-e-Nabuwwat k zarriye is
ma'mooli sy mailaan k qreeb jany sy bhi mehfooz farma lia hy) ¤
75.
(Agar bil-farz Aap
s.a.w.w mael ho jaty to) os waqt Ham Aap (s.a.w.w) ko 2 gunna mazza zindagi
meiñ aur 2 gunna mot meiñ chakhaaty phir Aap (s.a.w.w) Apny liye (bhi) Ham par
koi maddad-gaar na paaty¤
76.
Aur Kuffaar ye bhi
chahty thy k Aap (s.a.w.w) k Qaddam Sarzameen ( e Makkah) sy okhaarh deñ ta k
wo Aap (s.a.w.w) ko yahaañ sy nikaal sakkeñ aur (agar bil-farz aisa ho jata to)
os waqt wo (khud bhi) Aap (s.a.w.w) k peechhy thorhi see muddat k siwa thehr na
skty (aur jald he halaak kr diye jaty) ¤
77.
On sb Rasooloñ (k
liye Allah) ka Dastoor (yehi raha hy) jinheñ Ham ny Aap (s.a.w.w) sy pehly
bhaija tha (k jis qom ny apny darmeyaan sy apny Rasool ko nikaala onheñ halaak
kr dia gea) aur Aap (s.a.w.w) Hmary Dastoor meiñ koi tabdeeli naheeñ paeñ gy ¤
78.
Aap (s.a.w.w)
Sooraj dhalny sy ly kr rat ki tareeki tak (Zuhar, Asar, Maghrib aur Isha ki)
Namaz qaem farmaya kreñ aur Namaz-e-Fajr ka Quran parhna bhi (laazim kr leñ),
Beshak Namaz-e-Fajr k Quran meiñ (Frishtoñ ki) haazri hoti hy (Rat k Frishty
bhi mojood hoty heñ aur Din k Frishty bhi aa jaty heñ. Aur hazoori bhi naseeb
hoti hy)¤
79.
Aur raat k kuchh
hissa meiñ (bhi) Quran k sath (shabb-khaizi krty huwy) Namaz-e-Tahajjud parha
kreñ ye khaas Aap (s.a.w.w) k liye zeyaada (ki gai) hy.Yaqinan Aap (s.a.w.w) ka
Rabb Aap (s.a.w.w) KO Maqaam-e-Mahmood par faez farmaey ga (yani wo Maqaam-e-Shafa'at-e-Uzma
jahañ jumla Awwaleen-o-Aakhireen Aap s.a.w.w ki tarraf rujoo aur Aap s.a.w.w ki
Hamd kreñ gy)¤
80.
Aur Aap (s.a.w.w
Apny Rabb k hazoor ye) arz krty rahaiñ: Ay Mery Rabb! Mujhy sachai (khushnoodi)
k sath daakhil farma (jahañ bhi daakhil farmana ho khwaa wo koi mkaan ho ya
qabbar, koi mansab ho ya koi kaam,) aur Mujhy sachai ( o khushnoodi) k sath
baahir ly aa (jahañ sy bhi lana ho) aur Mujhy apni janib sy maddad-gaar
ghalba-o-quwwat ataa farma dy (jis sy Tery dushmanoñ par ghaalib hooñ)¤
81.
Aur farma deejiye:
Haq aa gea aur baatil bhaag gea (yani Islam aaya aur Kufr mit gea ya Quran aaya
aur Shetan halaak huwa), beshak baatil ny zael-o-nabood he ho jana hy (Kaa'ba k
gird 360 but nasb kiye gaey thy, jin ko lohy aur raang sy jorh kr mazboot kia
gea tha.Fattah-e-Makkah k din Sarwar-e-Aalam s.a.w.w k Dast-e-Mubarak meiñ aik
lakrhi the. Aap s.a.w.w ye Aayat parh kr os lakrhi sy jis but ki tarraf ishara
farmaty jaty thy wo girta jata tha)¤
82.
Aur Ham Quran meiñ
wo cheez naazal farma rahy heñ jo Emaan waloñ k liye Shifa aur Rehmat hy (k os
sy amraaz-e-zahira aur baatina, zalaalat-o-jahaalat waghaira door hoty heñ aur
zahiri-o-baatni sehat haasil hoti hy. Aitqadaat-e-baatina-o-akhlaaq-e-razeela
daffa hoty heñ. Is ka aik aik harf barkaat ka ganjeena hy jis sy jismani amraaz
aur aasaib door hoty heñ) aur zalimoñ (yani Kaafiroñ) k liye to sirf nuqsaan he
meiñ izafa kr raha hy¤
83.
Aur jab Ham insan
par (koi) inaam farmaty heñ (os ko sehat aur wus'at ataa farmaty heñ) to wo
(Hmary Zikr-o-Shukr sy) guraiz krta (hy) aur pehloo-tahi (yani takabbar) kr
jata hy aur jab osy koi (zarrar ya faqr-o-haadisa ya koi aur) takleef pohnch
jati hy (to gir'ya-o-zaari sy duaeñ krta hy aur on duaoñ k qabool ka assar
zaahir na ho) to ma'yoos ho jata hy (goya na shakir hy na sabir. Momin ko
chahye k agar ajaabat-e-dua meiñ takheer ho to wo ma'yoos na ho, Allah ki
Rehmat ka omeed-waar rahy)¤
84.
Farma deejiye: Har
koi (apny) apny treeqa-o-fitrat par ammal paira hy (ham apny treeqa par, tum
apny treeqa par. Jis ka johar-e-zaat shareef-o-tahir hy os sy
af'aal-e-jameela-o-akhlaq-e-pakiza saadir hoty heñ aur jis ka nafs khabees hy
os sy af'aal-e-khabeesa sar-zad hoty heñ), aur Aap (s.a.w.w) ka Rabb khoob
janta hy k sb sy zeyaada seedhi raah par kon hy¤
85.
Aur ye (Kuffaar)
Aap (s.a.w.w) sy Rooh k mut'alliq sawaal krty heñ, farma deejiye: Rooh Mery
Rabb k amr sy hy aur tumheñ bohut he thorha sa ilm dia gea hy (Yahood ny Quresh
ko mashwra dia k Hazoor s.a.w.w sy 3 sawaal kro, agar teenoñ ka jawaab na deñ
to Wo Nabi naheeñ aur agar teenoñ ka jawaab dy deñ jab bhi Nabi naheeñ. Aur
agar 2 ka jawaab dy deñ aur aik ka jawaab na deñ to Wo sachy Nabi heñ. Wo 3
sawaal ye heñ. 1. As'haab-e-Kahf ka waqea 2. Zulqurnain ka waqea 3. Rooh ka
haal. Quresh ny Hazoor s.a.w.w sy ye sawaal kiye. Aap s.a.w.w ny As'haab-e-Kahf
aur Zulqurnain k waqe'aat to mufassal beyaan kr diye aur Rooh ka mu'aamla
ab'haam meiñ rakha jaisa k Toraat meiñ mub'ham rakha gea tha. Quresh ye sawaal
kr k naadim huwy)¤
86.
Aur agar Ham
chaheñ to is (Kitab) ko jo Ham ny Aap (s.a.w.w) ki tarraf Wahi farmai hy (logoñ
k diloñ aur tehreeri nuskhoñ yani seenoñ aur saheefoñ sy) mehv farma deñ (aur
is ka koi assar baqi na chhorheñ) phir Aap (s.a.w.w) Apny liye is (Wahi) k ly
jany par Hmari Bargah meiñ koi wakaalat krny wala bhi na paeñ gy¤
87.
Magar ye k Aap
(s.a.w.w) k Rabb ki Rehmat sy (Ham ny isy Qeyaamat tak qaem rakha hy aur har
taghayyar-o-tabaddal sy mehfooz farmaya), beshak (ye) Aap (s.a.w.w) par (aur
Aap s.a.w.w k waseela sy Aap s.a.w.w ki Ommat par) Os ka bohut barha Fazzal hy
(k Os ny Aap s.a.w.w par Quran naazal farmaya aur is ko baqi-o-mehfooz rakha
aur Aap s.a.w.w ko tmaam Banni-Aadam ka Sardaar aur Khaatam-un-Nabiyyeen kia
aur Maqaam-e-Mahmood ata farmaya) ¤
88.
Farma deejiye:
Agar tmaam insan aur jinnaat is bat par jamma ho jaeñ k wo (Blaaghat aur
Husn-o-Nazm-o-Tarteeb aur Uloom-e-Ghaibia-o-Ma'aarif-e-Elahia meiñ sy kisi
Kamaal meiñ) is Quran k misl (koi dusra kalaam bna) laeñ gy to (bhi) wo is ki
misl naheeñ la skty agarchy wo aik dusry k maddad-gaar bn jaeñ¤
89.
Aur beshak Ham ny
is Quran meiñ logoñ k liye har tarrah ki misaal (mukhtlif treeqoñ sy) bar bar
beyaan ki hy magar aksar logoñ ny (isy) qabool na kia (ye) siwaey na-shukri k
(aur kuchh naheeñ)¤
90.
Aur wo (Kuffaar-e-Makkah)
kehty heñ k ham Aap (s.a.w.w) par har giz Emaan naheeñ laeñ gy yahañ tak k Aap
(s.a.w.w) hmary liye zameen sy koi chashma jari kr deñ 90¤
91.
Ya Aap (s.a.w.w) k
pas khajooroñ aur angooroñ ka koi baagh ho to Aap (s.a.w.w) os k andar behti
hui nehreñ jari kr deñ¤
92.
Ya jaisa k Aap
(s.a.w.w) ka kheyaal hy ham par (abhi) aasmaan k chnd tukrhy gira deñ ya Aap
(s.a.w.w) Allah ko aur Frishtoñ ko hmary samny ly aeñ ¤
93.
(Kuffaar kehty heñ
k Aap s.a.w.w Allah ko aur Frishtoñ ko hmary saamny ly aaeñ) Ya Aap
(s.a.w.w) ka koi sony ka ghr ho (jis meiñ Aap s.a.w.w khoob aish sy raheñ) ya
Aap (s.a.w.w) aasmaan par charh jaeñ, phir bhi ham Aap (s.a.w.w) k (aasmaan
meiñ) charh jany par har giz Emaan naheeñ laeñ gy yahañ tak k Aap (s.a.w.w
wahañ sy) hmary oopar koi Kitab otaar laeñ jisy ham (khud) parh sakkeñ, Farma
deejiye:Mera Rabb (in khraafaat meiñ oljhny sy) Pak hy Maiñ to aik insaan (aur)
Allah ka bhaija huwa (Rasool) hooñ¤
94.
Aur (on) logoñ ko
Emaan lany sy aur koi cheez maany na hui jab k on k pas Hadaayat (bhi) aa chuki
the siwaey is k k wo kehny laggy: Kia Allah ny (aik) Bashar ko Rasool bna kr
bhaija? (Rasooloñ ko bashar he jaanty rahy aur On k Mansab-e-Nabuwwat aur Allah
Ta'aala k ataa farmaey huwy Kamaalaat k mo'trif na huwy. Yehi on k Kufr ki
assal the)¤
95.
Farma deejiye:
Agar zameen meiñ (insanoñ ki bjaey) Frishty chalty phirty sakoonat pazeer hoty
to yaqinan Ham (bhi) on par aasmaan sy kisi Frishta ko Rasool bna kr otaarty (q
k wo on ki jins sy hota) ¤
96.
Farma deejiye:
Mery (Sidq-o-adaa-e-Farz-e-Risalat) aur tumhary (Kizb-o-Adawat k) darmeyaan
Allah he Gawaah k tor par Kaafi hy, beshak Wo Apny bndoñ sy khoob aagaah khoob
daikhny wala hy ¤
97.
Aur Allah jisy
Hadaayat farma dy to wohi Hadaayat-yaafta hy, aur jisy Wo gumraah thehra dy
(aur tofeeq na dy) to Aap on k liye Os k siwa maddad-gaar naheeñ paeñ gy (jo
onheñ Hadaayat kreñ), aur Ham onheñ Qeyaamat k Din oundhy mooñh (ghaseet kr)
othaeñ gy is haal meiñ k wo andhy, goongy aur behry hoñ gy (jaisy wo dunia meiñ
Haqq k daikhny, bolny aur sun'ny sy andhy, goongy aur behry bny rahy aisy he
othaey jaeñ gy), on ka thikaana Dozakh hy, jab bhi wo bujhny laggy gi Ham onheñ
(azaab dainy k liye) aur zeyaada bharhka deñ gy ¤
98.
Ye on logoñ ki
saza hy is wajjah sy k onhoñ ny Hmari Aayatoñ sy Kufr kia aur ye kehty rahy k
kia jab ham (mr kr boseeda) haddiyañ aur raiza raiza ho jaeñ gy to kia ham
az-sar-e-no paida kr k othaey jaeñ gy? ¤
99.
Kia onhoñ ny
naheeñ daikha k Jis Allah ny aasmanoñ aur zameen ko paida farmaya hy (Wo) is
bat par (bhi) Qaadir hy k Wo on logoñ ki misl (dobara) paida farma dy (ye Os ki
Qudrat sy kuchh ajeeb naheeñ) aur Os ny on k liye (azaab ka ya mot-o-be'sat ka)
aik waqt muqarrar farma dia hy jis meiñ koi shakk naheeñ, phir bhi zaalimoñ ny
inkaar kr dia hy magar (ye) na-shukri hy¤
100.
Farma deejiye:
Agar tum Mery Rabb ki Rehmat k khazaanoñ k maalik hoty (jin ki kuchh intaha
naheeñ) to tab bhi (sb) kharch ho jany k khof sy tum (apny hath) roky rakhty,
aur insaan bohut he tang dil aur bakheel waqea huwa hy¤
101.
Aur beshak Ham ny
Moosa (a.s) ko 9 Roshan Nishaniyañ deeñ (wo 9 Nishaniyañ ye heñ: 1. Asaa, 2.
Yadd-e-Baiza 3. Wo Oqda jo Moosa a.s ki Zubaan Mubarak meiñ tha phir Allah
Ta'aala ny os ko hal farma dia. 4. Dar'ya ka phatna aur os meiñ rasty ban'na 5.
Toofaan 6. Tiddi 7. Ghann 8. Maindak 9. Khoon) to Aap (s.a.w.w) Banni-Israeel
sy poochhiye jab (Moosa a.s) on k pas aey to Firon ny on sy kaha: Maiñ to yehi
kheyaal krta hooñ k ay Moosa (a.s)! Tum seher-zadda ho (Tumheñ jadoo kr dia gea
hy jis sy Tumhari Aqqal bjaa na rahi)¤
102.
Moosa (a.s) ny
(Firon sy) farmaya: Tu (dil sy) jaanta hy k in (9) Nishaniyoñ ko kisi aur ny
naheeñ otaara magar aasmanoñ aur zameen k Rabb ny ibrat-o-baseerat bna kr, aur
Maiñ to yehi kheyaal krta hooñ k ay Firon! Tu halaak-zadda ho (tu jald halaak
huwa chahta hy)¤
103.
Phir (Firon ny)
erada kia k on ko (yani Moosa a.s aur On ki qom ko) sar-zameen ( e Misr) sy
okhaarh kr phaink dy pus Ham ny osy (yani Firon ko) aur jo os k sath thy sb ko
gharq kr dia (aur Moosa a.s ko aur On ki qom ko salaamti ataa farmai)¤
104.
Aur Ham ny os k
bad Banni Israeel sy farmaya: Tum is mulk (yani Misr-o-Shaam) meiñ aabaad ho
jao phir jab Aakhirat (yani Qeyaamat) ka wa'da aa jaey ga (to) Ham tum sb ko ekatha
samait kr ly jaeñ gy¤
105.
Aur Haq k sath he
Ham ny is (Quran) ko otaara hy aur Haq he k sath Wo otra hy (Aayat ka ye jumla
har aik bimari k liye amal-e-mujarrab hy. Marz par hath rakh kr parh kr dam kr
dia jaey to Allah k Fazzal sy bimari door ho jati hy), aur (Ay Habib-e-Mukarram
s.a.w.w) Ham ny Aap (s.a.w.w) ko khush-khabri sunany wala aur darr sunany wala
he bna kr bhaija hy ¤
106.
Aur Quran ko Ham
ny juda juda kr k (23 saal k arsa meiñ) otaara ta k Aap (s.a.w.w) isy logoñ par
theher theher kr parheñ (ta k is k mazameen ba-aasani sun'ny waloñ k
zehen-nasheen hoty raheñ) aur Ham ny isy rafta rafta (haalaat aur masaaleh k
mutabiq) tadreejan otaara hy¤
107.
Farma deejiye: Tum
is (Quran) par Emaan lao ya Emaan na lao (aur apny liye Naimat-e-Aakhirat
ikhtiaar kro ya Azaab-e-Jahannam), beshak jin logoñ ko is sy qabl ilm ( e
Kitab) ataa kia gea tha jab ye (Quran) onheñ parh kr sunaya jata hy wo
thorhiyoñ k bal Sajdah meiñ gir parhty heñ¤
108.
Aur kehty heñ:
Hmara Rabb Pak hy, beshak Hmary Rabb ka wa'da poora ho kr he rehna tha (jo Os
ny Apni pehli Kitaboñ meiñ farmaya tha k Nabi-e-Aakhir-uz-Zamaañ Muhammad
s.a.w.w ko mab'oos farmaeñ gy)¤
109.
Aur (Apny Rabb k
hazoor ijz-o-niaz sy aur narm dili sy) thorhiyoñ k bal gir'ya-o-zaari krty huwy
gir jaty heñ, aur Ye (Quran) on k khushoo-o-khuzoo meiñ mazeed izafa krta chala
jata hy ¤{AAYAT-E-SAJDAH}
110.
Farma deejiye k
Allah ko pukaro ya Rehman ko pukaro, jis Naam sy bhi pukaarty ho (sb) achhy
Naam Osi k heñ (aik shabby Aap s.a.w.w ny taweel Sajdah kia aur apny Sajdah
meiñ Ya Allah Ya Rehman farmaty rahy. Abu Jahhal ny suna to kehny lagga k
Muhammad s.a.w.w hammeñ to kai ma'boodoñ k poojny sy manna krty heñ aur Aap
khud 2 ko pukaarty heñ Allah ko aur Rehman ko, is par farmaya gea Allah aur
Rehman 2 Naam aik he Ma'bood-e-Bar-Haq k heñ khwaa kisi Naam sy pukaro), aur na
apni Namaz (meiñ Qirrat) buland aawaaz sy kreñ aur na bilkul aahista parheñ aur
donoñ k darmeyaan (mo'tadil) raasta ikhtiaar farmaeñ (Hazoor s.a.w.w
Makkah-e-Mukarrama meiñ jab Apny As'haab ki imaamat farmaty to Qirrat buland
aawaaz sy farmaty. Mushrikeen aawaaz sunty to Quran ko gaaliañ daity. Is par ye
Aayat naazal hui)¤
111.
Aur farmaeye k sb
tareefaiñ Allah he k liye heñ Jis ny na to (Apny liye) koi baita bnaya (jaisa k
Yahood-o-Nasaara ka gumaan hy) aur na he (Os ki) Saltanat-o-Farmaañ-Rawai meiñ
koi shreek hy (jaisa k Mushrikeen kehty heñ) aur na kmzori k baes Os ka koi
maddad-gaar hy (yani Wo kmzor naheeñ k Os ko kisi hmaeti aur maddad-gaar ki
haajat ho. Ay Habib s.a.w.w) Aap (s.a.w.w) Osi ko Buzurg-tarr jaan kr Os ki
khoob Barhai (beyaan) krty reh'ye (Roz-e-Qeyaamat Jannat ki tarraf sb sy pehly
wohi log bulaey jaeñ gy jo har haal meiñ Allah ki Hamd krty heñ, is Aayat ka
naam Aayatul-Oz hy, Bani-Abdul Mutallib k bachy jab bolna shuroo krty thy to on
ko sb sy pehly yehi Aayat sikhai jati the) ¤ {LAST AAYAT OF SURAH
BANI-ISRAAEEL}
Surah
BANI-ISRAAEEL ka Tarjuma (January 11 to March 31, 2013) 80 din meiñ mukammal
huwa.
BANI-ISRAAEEL
Makki Surah hy.
SURAH BANI-ISRAAEEL ki tafseel ye hy.
Ruku : 12
Para : 15 (Ruku 01 to 12)
Aayaat : 111
Kalimaat : 533
Huroof : 3460
Para 15
SURAH 17
SURAH 17
Surah Bani-Israaeel
ALLAH K NAAM SY SHUROO JO BOHUT MEHRBAN NEHAYAT REHEM FARMANY WALA HY
1.
Wo Zaat (har naqs
aur kmzori sy) Paak hy Jo Raat (yani Shabb-e-Meraaj) k thorhy sy hissa meiñ
Apny (Mehboob aur Muqarrab) Bndy (Hazrat Muhammad s.a.w.w) ko Masjid-e-Hraam sy
(os) Masjid-e-Aqsa tak ly gai jis k gird-o-nawaah ko Ham ny Ba-Barkat bna
dia hy ta k Ham Os (Bnda-e-Kaamil) ko Apni Nishaniaañ dikhaeñ (Jibraeel a.s
Sarwar-e-Aalam s.a.w.w ko Buraaq par swaar kr k Bait-ul-Muqaddas ly gaey jahañ
Aap s.a.w.w ny Tmaam Anmbia a.s ki imaamat farmai. Phir aasmanoñ ka rukh kia
aur Anmbia a.s ko Apni Ziaarat sy musharraf farmaya.Jannat-o-Dozakh ka
mushaheda farmaya. Aur Sidra-tul-Muntaha sy aagy os Qurb-e-Aa'la meiñ pohnchy k
jis k tasawwar tak khalq k ohaam-o-afkaar bhi parwaaz sy aajiz heñ), beshak
Wohi Khoob Sun'ny Wala Khoob Daikhny Wala hy¤ {1st Aayat of
15th Para}
2.
Aur Ham ny Moosa
(a.s) ko Kitaab (Toraat) ataa ki aur Ham ny Onheñ Bani-Israaeel k liye Hadaayat
bnaya (aur onheñ hukm dia) k Tum Mery siwa kisi ko kaar-saaz na thehrao¤
3.
(Ay) on logoñ ki
olaad jinheñ Ham ny Nooh (a.s) k sath (kashti meiñ) otha lia tha, beshak Nooh
(a.s) barhy shukr-guzaar Bndy thy (jab kuchh khaaty peety to Allah Ta'aala ki
Hamd krty aur Os ka shukr bjaa laty. So On ki olaad par laazim hy k wo apny
Jadd-e-Muhtram k treeqa par qaem rahy)¤
4.
Aur Ham ny Kitab
(Toraat) meiñ Bani-Israaeel ko qattai tor par bta dia tha k tum
(Shaam-o-Bait-ul-Muqaddas ki) zmeen meiñ zuroor 2 martba fasaad kro gy aur
(ata'at-e-Elahi sy) sarkashi barto gy¤
5.
Phir jab on donoñ
meiñ sy pehli martba (k azaab ka waa'da) ka waa'da aa pohncha to Ham ny tum par
Apny aisy bndy musallat kr diye jo sakht jang-joo thy phir wo (tumhari) tlaash
meiñ (tumhary) ghroñ tak ja ghussy (k tumheñ looteñ aur qattal-o-qaid kreñ),
aur (ye azaab ka) waa'da zuroor poora hona he tha¤
6.
Phir (jab onhoñ ny
tobah ki aur takabbur sy baaz aa gaey to) Ham ny on k oopar ghalba ko
tumhary haq meiñ paltaa dia aur Ham ny amwaal-o-olaad (ki kasrat) k
zarriye tumhari madad farmai aur Ham ny tumheñ afraadi quwwat meiñ (bhi) barha
dia¤
7.
Agar tum bhlai kro
gy to apny (he) liye bhlai kro gy (tumheñ is ka ajr dia jaey ga), aur agar tum
burai kro gy to apni (he) jan k liye,phir jab (tum ny Zakariyya a.s aur Yah'ya
a.s ko shaheed kia aur) dusry waa'da ( e azaab) ki gharhi aai (to aur zaalimoñ
yani Ehl-e-Faris-o-Room ko tum par musallat kr dia) ta k (maar maar kr) tumhary
chehry bigaarh deñ aur ta k Masjid-e-Aqsa meiñ (osi tarrah) daakhil hoñjaisy Os
meiñ (hamla-aawar log) pehli martba daakhil huwy thy aur ta k jis (mqaam) par
ghalba paeñ osy tabaah-o-brbad kr daleñ¤
8.
Omeed hy (is dusri
martba k bad agar tum toba kro to) tumhara Rabb tum par rehem farmaey ga aur
agar tum ny phir wohi (sarkashi ka tarz-e-ammal ikhtiaar) kea to Ham bhi wohi
(azaab dubara) kreñ gy, aur Ham ny Dozakh ko Kaafiroñ k liye qaid-khana bna dia
hy¤
9.
Beshak Ye Quran os
(manzil) ki rehnumai krta hy jo sb sy durust hy aur on Mominoñ ko jo naik ammal
krty heñ is bat ki khush-khabri sunata hy k on k liye barha ajr hy ¤
10.
Aur ye k jo log
Aakhirat par Emaan naheeñ rakhti Ham ny on k liye dard-naak azaab tayyaar kr
rakha hy 10¤
11.
Aur insaan (kabhi
tang-dil aur preshaan ho kr apny liye aur apny ghr waloñ k liye aur apny
maal-o-olaad k liye) burai ki dua maangny lagta hy (aur on k liye bd-duaeñ krta
hy) jis tarrah (apny aur apny ehl-o-maal k liye) bhlai ki dua maangta hy (agar
Allah os ki ye bd-dua qbool kr ly to wo shakhs ya os k ehl-o-maal hlaak ho jaeñ
laikin Allah apny Fazzal-o-Karram sy os ki bd-dua qbool naheeñ farmata), aur
insaan barha he jald-baaz waqea huwa hy¤
12.
Aur Ham ny raat
aur din ko (apni Qudrat ki) 2 nishaaniyañ bnaya phir Ham ny raat ki nishaani ko
tareek bnaya aur Ham ny din ki nishaani ko roshan bnaya ta k tum Apny Rabb ka
fazzal (rizq) tlaash kr sakko aur ta k tum (raat din k dory sy) barsoñ ka
shumaar aur hisaab maa'loom kr sakko, aur Ham ny har cheez ko poori tafseel sy
waazeh kr dia hy (khwaa os ki haajat Deen meiñ ho ya dunia meiñ)¤
13.
Aur Ham ny har
insaan k aa'maal ka noshta os ki gardan meiñ latka dia hy (yani jo kuchh khair
ya sharr os k liye muqaddar kia gea hy wo os ko os tarrah laazim hy jaisy gally
ka haar), aur Ham os k liye Qeyaamat k din (ye) naama-e-aa'maal nikaaleñ gy
jisy wo (apny saamny) khula huwa paey ga ¤
14.
(os sy kaha jaey
ga) Apni kitaab ( e aa'maal) parh ly, aaj tu apna hisaab jaanchny k liye khud
he kaafi hy ¤
15.
Jo koi
raah-e-hadaayat ikhtiaar krta hy to wo apny faeda k liye hadaayat par chalta hy
(os ka swaab wohi paey ga) aur jo shakhs gumraah hota hy to os ki gumraahi ka
wabaal (bhi) osi par hy,aur koi bojh othaany wala kisi dusry (k gunaahoñ) ka
bojh naheeñ othaey ga, aur Ham har giz azaab dainy waly naheeñ heñ yahaañ tak k
Ham (os qom meiñ) kisi Rasool ko bhaij leñ (jo Ommat ko os k fraaez sy aagaah
farmaey aur Raah-e-Haqq on par waazeh kry) ¤
16.
Aur jb Ham kisi
basti ko hlaak krny ka iraada krty heñ to Ham wahaañ k omraa aur khush-haal
logoñ ko (koi) hukam daity heñ (ta k on k zarriye awaam aur ghurbaa bhi durust
ho jaeñ) to wo os (basti) meiñ na-farmani krty heñ pus is par Hmara Farmaan ( e
azaab) waajib ho jata hy phir Ham os basti ko bilkul he masmaar kr daity heñ ¤
17.
Aur Ham ny Nooh
(a.s) k baad kitni he (takzeeb krny wali) qomoñ ko hlaak kr dala (misl
Aad-o-Smood waghaira k), aur Aap ka Rabb Kaafi hy (Wo) Apny bndoñ k gunaahoñ sy
khoob khabar-daar khoob daikhny wala hy¤
18.
Jo koi sirf dunia
ki khush-haali (ki soorat meiñ apni mehnat ka jaldi bdla) chahta hy to Ham isi
dunia meiñ jisy chahty heñ jitna chahty heñ jaldi dy daity heñ (ye zuroori
naheeñ k taalib-e-dunia ki har khwahesh poori ki jaey aur jo wo maangy wohi osy
dia jaey. Balky Allah jisy chahta hy daita hy or jisy chahta hy osy mehroom kr
daita hy) phir Ham ny os k liye Dozakh bna di hy jis meiñ wo mlaamat sunta huwa
(Rabb ki Rehmat sy) dhutkaara huwa daakhil ho ga ¤
19.
Aur jo shakhs
Aakhirat ka khwahesh-mnd huwa aur os ny is k liye is k laeq koshish ki (yani
amal-e-saleh bjaa laey) aur wo Momin (bhi) hy to aisy he logoñ ki koshish
maqbooliat paey gi (is Aayat sy maaloom huwa k amal ki maqbooliat k liye 3
cheezeñ darkaar heñ. 1. Taalib-e-Aakhirat hona yani niyyat naik hona 2. Amal KO
is k huqooq k sath ada krna. 3. Momin hona)¤
20.
Ham har aik ki
madad krty heñ on (taaliban-e-dunia) ki bhi aur in (taaliban-e-Aakaur walidain
k sath husn-e-sulook kia kro, agar tumhary samny donoñ meiñ sy koi aik ya donoñ
burhaapy ko pohnch jaeñ to onheñ 'of' bhi na kehna (yani aisd naheeñ hy¤
21.
Daikhiye Ham ny in
meiñ sy ba'az ko ba'az par (maal-o-kamaal aur jaah-o-sarwat meiñ) kis tarrah
fazilat dy rakhi hy, aur yaqinan Aakhirat (dunia k muqaabla meiñ) darjaat k
lehaaz sy (bhi) bohut barhi hy aur fazilat k lehaaz sy (bhi) bohut barhi hy¤
22.
(Ay sun'ny waly)
Allah k sath dusra ma'bood na bna (warna) tu mlaamat-zadda (aur)
bay-yaar-o-madad-gaar ho kr baitha reh jaey ga¤
23.
Aur Aap k Rabb ny
hukam farma dia hy k tum Allah k siwa kisi ki ibaadat matt kro aur walidain k
sath husn-e-sulook kia kro, agar tumhary samny donoñ meiñ sy koi aik ya donoñ
burhaapy ko pohnch jaeñ to onheñ 'UFF' bhi na kehna (yani aisa koi kalma zubaan
sy na nikaala jaey jis sy ye samjha jaey k on ki tarraf sy tabiat par kuchh
grani hy) aur onheñ jhirhkna bhi naheeñ aur on donoñ k sath barhy adab sy bat
kia kro (jaisy ghulam aaqa sy krta hy)¤
24.
Aur on donoñ k
liye narm-dili sy ijz-o-inksaari k bazoo jhukaey rakho aur (Allah k huzoor) arz
krty raho: Ay Mery Rabb! in donoñ par rehem farma jaisa k inhoñ ny bachpan meiñ
mujhy (rehmat-o-shafqat sy) pala tha (dua ka hukam is liye dia gea k behtar
sulook-o-khidmat meiñ kitna bhi mubaalgha kia jaey laikin walidain k ehsaan ka
haq ada naheeñ ho skta)¤
25.
Tumhara Rabb on
(batoñ) sy khoob aagah hy jo tumhary diloñ meiñ heñ (yani walidain ki ata'at ka
irada aur on ki khidmat ka zoq), agar tum naik seerat ho jao (aur tum sy
walidain ki khidmat meiñ taqseer waqea hui aur tum ny tobah ki) to beshak Wo
(Allah apni tarraf) rujoo krny waloñ ko bohut bakhshny wala hy¤
26.
Aur qraabat-daroñ
ko on ka haq ada kro (on k sath silah-rehmi kro aur muhabbat aur mail-jol aur
khabar-geeri aur moqa par madad aur husn-e-muaashrat kro) aur muhtajoñ aur
musafiroñ ko bhi (on ka haq yani Zakaat do) aur (apna maal na-jaez kaamoñ meiñ)
fuzool kharchi sy matt orhao¤
27.
Beshak fuzool
kharchi krny waly Shetan k bhai heñ (yani Shetan ki rah par chalty heñ), aur
Shetan apny Rabb ka barha he na-shukra hy (is liye os ka rasta ikhtiaar matt
kro)¤
28.
Aur agar tum (apni
tang-dasti k baes) in (mustehqeen yani qraabat-daroñ, muhtajoñ aur musafiroñ)
sy guraiz krna chahty ho apny Rabb ki janib sy Rehmat (yani khush-haali) k intzaar
meiñ jis ki tum tawaqqo rakhty ho to on sy narmi ki bat keh dia kro (on ki
khush-dili k liye on sy wada kro ya on k haq meiñ dua kr dia kro)¤
29.
Aur na apna hath
apni gardan sy baandha huwa rakho (k kisi ko kuchh na do) aur na he osy sara ka
sara khol do (k sb kuchh he luta dalo) k phir tumheñ khud mlaamat-zadda (aur)
thakka hara bn kr baithna parhy (aik Musalman bibi k samny aik Yahudia ny Moosa
a.s ki sakhaawat ka beyaan kia aur os meiñ is had tak mubalgha kia k Huzoor
s.a.w.w par tarjeeh di. Ye bat Musalman bibi ko nagwaar guzri aur onhoñ ny kaha
k Moosa a.s ki sakhaawat meiñ kuchh shak naheeñ laikin Huzoor s.a.w.w ka martba
sb sy aa'la hy. Ye keh kr onhoñ ny chaha k Yahudia ko Huzoor s.a.w.w k
Jood-o-Karam ki aazmaesh kra di jaey. Chunachy onhoñ ny aik chhoti bachi ko
bhaija k Huzoor s.a.w.w sy qmeez maang laey. Aap s.a.w.w k pas aik he qmeez the
jo zaib-e-tann the wohi otaar kr ata farma di. Is par ye Aayat naazal Hui)¤
30.
Beshak Aap ka Rabb
jis k liye chahta hy rizq kushada farma daita hy aur (jis k liye chahta
hy) tang kr daita hy, beshak Wo apny bndoñ (k aa'maal-o-ahwaal) ki khoob khabar
rakhny wala khoob daikhny wala hy¤
31.
Aur tum apni olaad
ko muflisi k khof sy qattal matt kro, Ham he onheñ (bhi) rozi daity heñ aur
tumheñ bhi, beshak on ko qattal krna bohut barha gunah hy (zamana-e-jaahiliat
meiñ log apni larhkiyoñ ko zinda gaarh dia krty thy aur is k kai sabbab thy
nadaari-o-muflisi ka khof, loot ka khof. is ki mamaaniat farmai gai) ¤
32.
Aur tum zanaa
(yani bd-kaari) k qreeb bhi matt jana beshak ye bay-ha'yai ka kaam hy, aur
bohut he buri raah hy¤
33.
Tum kisi jan ko
qattal matt krna jisy (qattal krna) Allah ny hraam qraar dia hy siwaey is k k
(os ka qattal krna shree'at ki roo sy) haq ho, aur jo shakhs zulman qattal kr
dia gea to beshak Ham ny os k waris k liye (qisaas ka) haq muqarrar kr dia hy
so wo bhi (qisaas k tor par bdla k) qattal meiñ hadd sy tajaawaz na kry (aik
maqtool k evaz kai kai ko qattal na kry ya bjaey qaatil k os ki qom k kisi aur
shakhs ko qattal na kry), beshak wo (yani maqtool ka waris ya maqtool mazloom
ya wo shakhs jisy maqtool ka waris na-haq qattal kry Allah ki tarraf sy)
madad-yaafta hy (so os ki madad-o-hmaayat ki zimma-daari hakoomat par ho gi)¤
34.
Aur tum yateem k
maal k (bhi) qreeb takk na jana magar aisy treeqa sy jo (yateem k liye) behtar
ho (wo ye hy k os k maal ki hifaazat kro aur os ko barhao) yahaañ takk k wo
apni jwani ko pohnch jaey (Hazrat Ibn-e-Abbas R.A k nazdeek yahaañ jwani sy
muraad 18 saal ki omar hy), aur wa'da poora kia kro (Allah ka bhi aur bndoñ ka
bhi), beshak wa'da ki zuroor poochh-gachh ho gi¤
35.
Aur naap poora
rakha kro jab (bhi) tum (koi cheez) napo aur (jab tolny laggo to) seedhy trazoo
sy tola kro, ye (de'yanat-dari) behtar hy aur anjaam k aitbaar sy (bhi)
khoob-tarr hy¤
36.
Aur (ay insan) Tu
os bat ki pairvi na kr jis ka tujhy (sahi) ilm naheeñ (yani jis cheez ko daikha
na ho os ki nisbat ye na kaho k maiñ ny daikha, jis ko suna na ho os ki nisbat
na kaho k maiñ ny suna. Na jhooti gwahi do, na kisi par wo ilzaam lgao jo tum
na janty ho), beshak kaan aur aankh aur dil, in meiñ sy har aik sy baaz-purs ho
gi (k in sy kia kaam lia gea)¤
37.
Aur zmeen meiñ
(takabbar-o-khud-numai sy) akkarh kr matt chall, beshak tu zmeen ko (apni
ra'oonat k zor sy) har giz cheer naheeñ skta aur na he har giz tu bulandi meiñ
pahaarhoñ ko pohnch skta hy (tu jo kuchh hy wohi rahy ga, takabbar-o-khud-numai
ka koi faeda naheeñ)¤
38.
(shirk, walidain ki bay-adbi, fuzool-kharchi,
bukhal, Muflisi k khof sy olaad ka qattal, zna-kaari, qattal-e-nahaq, yateem ka
maal khana, naap-tol meiñ kammi krna, kaan, aankh aur dil ka ghalt istmaal,
takabbar-o-khud-numai) in sb (mazkoora) baatoñ ki burai tery Rabb ko barhi
na-pasand hy ¤
39.
(Toheed ka hukam
daina aur dunia sy bay-raghbati aur Aakhirat ki tarraf raghbat dilana) Ye
Hikmat-o-Danai ki on batoñ meiñ sy hy jo Aap (s.a.w.w) k Rabb ny Aap (s.a.w.w)
ki tarraf Wahi farmai heñ, aur (ay insaan) Allah k sath koi dusra ma'bood na
thehra (warna) tu mlaamat-zadda (aur Allah ki Rehmat sy) dhutkaara huwa ho kr
Dozakh meiñ jhonk dia jaey ga¤
40.
(Ay Mushriko, khud
socho) Bhla tumheñ to tumhary Rabb ny baitoñ k liye chun lia hy aur (Apny liye)
Os ny Frishtoñ ko baitiyañ bna lia hy (ye khilaaf-e-hikmat bat kis tarrah kehty
ho), beshak tum (apny he gharhy huw kheyalaat k paimana par) barhi sakht bat
kehty ho (k Allah k liye olaad sabit krty ho jo khwaas-e-ajsaam sy hy aur Allah
is sy Paak hy phir is meiñ bhi apni barhai rakhty ho k apny liye to baity
pasand krty ho aur Allah k liye baitiyañ tajweez krty ho ye kitni bay-adbi aur
gustakhi hy)¤
41.
Aur beshak Ham ny
is Quran meiñ (haqaeq aur nasaeh ko daleeloñ sy bhi, misaloñ sy bhi, hikmatoñ
sy bhi, ibratoñ sy bhi aur ja-bja is mazmoon ko qisam qisam k pairaayoñ meiñ)
andaaz baddal kr bar bar beyaan kia hy ta k log nasihat hasil kreñ, magar
(munkreen ka aalam ye hy k) is sy on ki nafrat he mzeed barhti jati hy¤
42.
Farma deejiye:
Agar Os k sath kuchh aur bhi ma'bood hoty jaisa k wo (Kuffaar-o-Mushrikeen)
kehty heñ to wo (mil kr) Maalik-e-Arsh takk pohnchny (yani Os k
nizaam-e-iqtdaar meiñ dakhal-andazi krny) ka koi raasta zuroor tlaash kr laity
(aur Os sy bar-sar-e-paikaar hoty jaisa badshahoñ ka treeqa hy)¤
43.
Wo Pak hy, aur on
batoñ sy jo wo kehty rehty heñ bohut he buland-o-bartar hy¤
44.
Saatoñ aasmaan aur
zmeen aur wo sary mojudaat jo in meiñ heñ (zuban-e-haal sy ya zuban-e-qaal sy)
Allah ki Tasbeeh krty rehty heñ, aur (jumla kaenaat meiñ) koi bhi cheez aisi
naheeñ jo Os ki Hamd k sath Tasbeeh na krti ho laikin tum on ki Tasbeeh (ki
kaifiyyat) ko (ikhtlaaf-e-lughaat k baes ya dushwaari-e-adraak k sabbab) samajh
naheeñ skty, beshak Wo barha burd-baar barha bakhshny wala hy (k bndoñ ki
ghaflat par azaab meiñ jaldi naheeñ farmata)¤
45.
Aur jab Aap
(s.a.w.w) Quran parhty heñ (to) Ham Aap (s.a.w.w) k aur on logoñ k darmeyaan jo
Aakhirat par Emaan naheeñ rakhti aik poshida parda hael kr daity heñ (ta k wo
Aap s.a.w.w ko daikh na sakkeñ. is Aayat ki Shaan-e-Nazool ye hy k Abu Lahab ki
bivi pathar ly kr Aap s.a.w.w ko maarny ai magar jab Aap s.a.w.w k pas pohnchi
to Aap s.a.w.w osy nazar na aey q k aik Frishta Aap s.a.w.w aur os aurat k
darmeyaan hael raha)¤
46.
Aur Ham on k diloñ
par (bhi) pardy daal daity heñ ta k wo isy samajh (na) sakkeñ aur on k kaanoñ
meiñ bojh paida kr daity heñ (ta k isy sun na sakkeñ), aur jab Aap (s.a.w.w)
Quran meiñ apny Rabb ka tanha zikr krty heñ (on k buttoñ ka naam naheeñ aata)
to wo nafrat krty huwy peethh phair kr bhaag kharhy hoty heñ¤
47.
Ham khoob janty
heñ (k jab Aap s.a.w.w Quran parhty heñ to) ye (Kuffaar) jis maqsad k liye
dheyaan sy sunty heñ (yani sunty bhi heñ to tamas'khar aur takzeeb k liye aur)
jab ye Aap (s.a.w.w) ki tarraf kaan lgaty heñ aur jab ye sar-goshiyañ krty heñ
jab ye zalim log (Musalmanoñ sy) kehty heñ k tum to mehez aik aisy Shakhs ki
pairvi kr rahy ho Jo seher-zadda hy (yani Os par jadoo kr dia gea hy to Ham ye
sb kuchh daikh aur sun rahy heñ)¤
48.
(Ay
Habib-e-Mukarram s.a.w.w) Daikh'ye (ye log) Aap (s.a.w.w) k liye kaisi (kaisi)
tashbeeheñ daity heñ pus ye gumrah ho chuky, ab raah-e-raast par naheeñ aa skty¤
49.
Aur (Kuffaar bohut
ta'ajjub sy) kehty heñ: Jab ham (marr kr bosida) haddiyañ aur raiza raiza ho
jaeñ gy to kia hammeñ az-sar-e-no paida kr k othaya jaey ga?¤
50.
Farma deejiye: Tum
pathar ho jao ya loha¤
51.
Ya koi aisi
makhlooq jo tumhary kheyaal meiñ (in cheezoñ sy bhi) ziaada sakht ho (k os meiñ
zindagi pany ki bilkul slahiat he na ho aur hayaat sy door bay-jan ho tab b tum
dobara zinda kiye jao gy), phir wo (is haal meiñ) kahaiñ gy k hammeñ kon dobara
zinda kry ga? Farma deejiye: Wohi Jis ny tumheñ pehli bar paida farmaya tha,
phir wo (ta'ajjub aur tamas'khar k tor par) Aap (s.a.w.w) k samny apny sarr
hila deñ gy aur kahaiñ gy: Ye kab ho ga? (yani Qeyaamat kab qaem ho gi aur
murdoñ ko kab othaya jaey ga?) Farma deejiye: Ommeed hy (ye) jald he ho jaey ga¤
52.
(Qeyaamat ka Din
wo Din ho ga) Jis Din Wo tumheñ pukaary ga to tum Os ki Hamd k sath jawaab do
gy aur kheyaal krty ho gy k tum (dunia meiñ) bohut thorha arsa thehry ho¤
53.
Aur Aap (s.a.w.w)
Mery (Emaan-daar) bndoñ sy farma deñ k wo (Kaafiroñ sy) aisi bateñ kia kreñ jo
behtar hoñ (narm hoñ ya Pakiza hoñ, adab aur tehzeeb ki hoñ, irshaad-o-hadaayat
ki hoñ, Kuffaar agar bay-hoodgi kreñ to on ka jwab onhi k andaz meiñ na dia
jaey. Ye Hukam Jahaad k Hukam sy pehly tha, bad meiñ mansookh ho gea), beshak
Shetan logoñ k darmeyaan fasaad bapaa krta hy, yaqinan Shetan insan ka khula
dushman hy¤
54.
Tumhara Rabb
tumhary haal sy behtar waaqif hy, agar chahy tum par Rehem farma dy (aur tumheñ
Tobah aur Emaan ki tofeeq ata farmaey) Ya agar chahy tum par azaab kry, aur Ham
ny Aap (s.a.w.w) ko on par (on k omoor ka) zimma-daar bna kr naheeñ bhaija (k
on k aamaal k zimma-daar hoty)¤
55.
Aur Aap (s.a.w.w)
ka Rabb on (sb k ahwaal) ko khoob janta hy jo aasmanoñ aur zmeen meiñ (aabaad)
heñ (k kon kis laeq hy), aur beshak Ham ny ba'az Anmbia (a.s) ko (makhsoos
fazael k sath) ba'az par fazilat bakhshi (jaisy Ibrahim a.s ko Khaleel kea aur
Moosa a.s ko Kaleem aur Sayyad-e-Aalam s.a.w.w ko Habib) aur Ham ny Daood (a.s)
ko Zaboor ata ki (Jis meiñ 150 Surateñ heñ. Sb meiñ Dua aur Allah ki Sana hy.
Na Os meiñ halaal-o-haraam ka beyaan, na faraez, na hadood-o-ahkaam. Allah ny
Zaboor meiñ farmaya hy k Muhammad s.a.w.w Khaatam-ul-Anmbia heñ aur On ki Ommat
Khair-ul-Ommam. Yahood ka gumaan tha k Moosa a.s k bad koi Nabi naheeñ aur
Toraat k bad koi Kitab naheeñ, is Aayat meiñ Daood a.s ko Zaboor ataa farmany
ka zikr kr k Yahood ki takzeeb kr di gai)¤
56.
Farma deejiye: Tum
on sb ko bula lo jinheñ tum Allah k siwa (ma'bood) gumaan krty ho wo tum sy
takleef door krny par qaadir naheeñ heñ aur na (osy dusroñ ki tarraf) phair
dainy ka (ikhtiaar rakhty heñ. Kuffaar jab shadeed qehet meiñ mubtla huwy aur
nobat yahañ tak pohnchi k kutty aur murdaar kha gaey aur Sayyad-e-Aalam s.a.w.w
k huzoor far'yaad laey aur Aap s.a.w.w sy Dua ki iltija ki, is par ye Aayat
naazal hui aur farmaya gea k jab buttoñ ko khuda maanty ho to is waqt onheñ
pukaaro k wo tumhari maddad kreñ aur jab tum janty ho k wo tumhari maddad
naheeñ kr skty to q onheñ ma'bood bnaty ho)¤
57.
Ye log jin ki
ibaadat krty heñ (yani Malaeka, jinnaat, Eesa a.s aur Uzair a.s waghaira k but
aur tasveereñ bna kr onheñ poojty heñ) wo (to khud he) apny Rabb ki tarraf
waseela tlaash krty heñ k on meiñ sy (Baargaah-e-Elahi meiñ) ziaada muqarrab
kon hy (ta k jo sb sy ziaada Muqarrab ho os ko waseela bnaeñ) aur (wo khud) Os
ki Rehmat k omeed-waar heñ aur (wo khud he) Os k azaab sy drty rehty heñ (ab
tum he btao k wo ma'bood kaisy ho skty heñ wo to khud Ma'bood-e-barr-Haqq k
saamny jhuk rahy heñ), beshak Aap (s.a.w.w) k Rabb ka azaab drny ki cheez hy
(ye Aayat aik jama'at-e-Arab k haq meiñ naazal hui jo Jinnaat k aik groh ko
poojty thy wo Jinnaat Islam ly aey aur on ko poojny waloñ ko khabbar na hui.
Allah ny is Aayat meiñ onheñ aar dilai)¤
58.
Aur
(Kufr-o-sarkashi krny waloñ ki) koi basti aisi naheeñ magar Ham osy
Roz-e-Qeyaamat sy qabbal he tabaah kr deñ gy ya osy nehaayat he sakht azaab deñ
gy, ye (amr) Kitab (Loh-e-Mehfooz) meiñ likha huwa hy¤
59.
(Jab Ehl-e-Makkah
ny Aap s.a.w.w sy kaha k Safa pahaarh ko sona kr deñ to Allah ny farmaya) Aur
Ham ko (ab bhi in Kufr-o-sarkashi krny waloñ k mutalba par) nishaniaañ bhaijny
sy (kisi cheez ny) manna naheeñ kea siwaey is k k in he (nishaniyoñ) ko pehly
logoñ ny jhutla dia tha (so os k bad wo foran tabaah-o-barbaad kr diye gaey aur
koi muhlat baqi na rahi, Ay Habib s.a.w.w! Ham Aap s.a.w.w ki be'sat k bad Aap
s.a.w.w ki qom sy ye muaamla naheeñ krna chahty), aur Ham ny Qom-e-Samood ko
(Saleh a.s ki) oontni (ki) khuli nishani di the to onhoñ ny os par zulm kia,
aur Ham nishaniaañ naheeñ bhaija krty magar (azaab ki aamad sy qabbal aakhri
bar) khof-zadda krny k liye (phir jab os nishani ka inkaar ho jata hy to osi
waqt tabaah-kun azaab bhaij dia jata hy) ¤
60.
Aur (yad keejiye)
jab Ham ny Aap (s.a.w.w) sy farmaya k beshak Aap (s.a.w.w) k Rabb ny (sb) logoñ
ko (apny ilm-o-qudrat k) ahaata meiñ ly rakha hy, aur Ham ny to (Shabb-e-Meraaj
k) os nazzaara ko jo Ham ny Aap (s.a.w.w) ko dikhaya logoñ k liye sirf aik
aazmaesh bnaya hy (Emaan waly maan gaey aur zaahir-been ollajh gaey) aur os
darakht (Shajara-tuz-Zaqqoom) ko bhi jis par Quran meiñ la'nat ki gai hy (ye
darakht Jahannam meiñ paida hota hy. Laikin Abu-Jahhal ny Allah ki Qudrat ka
inkaar krty huwy kaha k aag meiñ darakht kahañ reh skta hy), aur Ham onheñ
draaty heñ magar ye (draana bhi) on meiñ koi izaafa naheeñ krta siwaey aur
barhi sarkashi k¤
61.
Aur (wo waqt yaad
keejiye) jab Ham ny Frishtoñ sy farmaya k tum Aadam (a.s) ko (tahiyyat ka)
Sajdah kro to Iblees k siwa sb ny Sajdah kia, os ny kaha: Kia isy Sajdah kroñ
jisy Tu ny matti sy paida kia hy?¤
62.
(Aur Shetan ye bhi
kehny lagga) Mujhy bta to sahi k ye wo Shakhs hy jisy Tu ny mujh par fazeelat
di hy? (aakhir is ki kia wajjah hy? Maiñ qassam khata hooñ k) agar Tu mujhy
Qeyaamat k Din takk muhlat dy dy to maiñ is ki olaad ko siwaey chnd (mukhlis)
afraad k (apny qabza meiñ ly kr) jarh sy okhaarh dooñ ga¤
63.
(Shetan k is
kalaam par) Allah ny farmaya: Ja (tujhy Nafkha-e-Ola takk muhlat hy) pus on
meiñ sy jo bhi teri pairvi kry ga to beshak Dozakh (he) tum sb ki poori poori
saza hy¤
64.
(Jab Iblees ny
olaad-e-Aadam ko gumrah krny k liye Allah sy muhlat maangi to Allah ny farmaya)
Aur jis par bhi tera bas chal skta hy tu (osy) apni aawaaz sy (yani was'wasy
dal kr aur ma'siyyat ki tarraf bula kr) dagmaga ly aur on par apni (foj k)
sawaar aur peyaada-dastoñ ko charha dy (yani apny sb makr tmaam kr ly aur apny
tmaam lashkroñ sy maddad ly ly) aur on k maal-o-olaad meiñ on ka shareek bn ja
(sood aur dusry hraam triqoñ sy maal kmany sy maal meiñ Shetan ki shirkat ho
jati hy aur zanaa sy olaad meiñ) aur on sy (jhooty) wa'dy kr, aur on sy Shetan
dhoka-o-fraib k siwa (koi) wa'da naheeñ krta¤
65.
Beshak jo Mery
(naik mukhlis) bndy heñ on par tera tasallat naheeñ ho sakky ga, aur tera Rabb
on (Allah waloñ) ki kaar-sazi k liye kaafi hy (k onheñ tujh sy mehfooz rakhy
ga) ¤
66.
Tumhara Rabb Wo hy
Jo samundar (aur dar'ya) meiñ tumhary liye (jahaaz aur) kashtiyaañ rawaañ
farmata hy ta k tum (androoni-o-bairooni tijaarat k zarriye) Os ka Fazzal (yani
Rizq) tlaash kro, beshak Wo tum par barha Mehrban hy ¤
67.
Aur jab samundar
meiñ tumheñ koi musibat la-haqq hoti hy (aur doobny ka andaisha krty ho) to wo
(sb but tumhary zehnoñ sy) gum ho jaty heñ jin ki tum purastish krty rehty ho
(on jhooty ma'boodoñ meiñ sy kisi ka naam zuban par naheeñ aata) siwaey Os
(Allah) k (Jisy tum os waqt yaad krty ho), phir jab Wo (Allah) tumheñ bacha kr
khushki ki tarraf ly jata hy (to phir os sy) roo-gardaani krny lagty ho (Os ki
Toheed sy mooñh phair laity ho), aur insaan barha na-shukra waqea huwa hy ¤
68.
Kia tum (samundar
k khatraat sy nijaat pa kr) is bat sy bay-khof ho gaey ho k Wo tumheñ khushki k
kinaary par he (zameen meiñ) dhansaa dy (jaisa k Qaroon ko dhansaa dia tha) ya
tum par pathar barsaany wali aandhi bhaij dy (jaisa k Qom-e-Loot par bhaiji
the) phir tum apny liye koi kaar-saaz na pa sakko gy (jo tumheñ bacha sakky)¤
69.
Ya tum is bat sy
bay-khof ho gaey ho k Wo tumheñ dubara os (samundar) meiñ paltaa kr ly jae aur
tum par kashtiyañ torh dainy wali aandhi bhaij dy phir tumheñ os Kufr k baes jo
tum krty thy (samundar meiñ) gharq kr dy phir tum apny liye os (dabony) par Ham
sy mu'aakhza krny wala koi naheeñ pao gy (jo Ham sy dar'yaaft kr sakky k Ham ny
aisa q kia. Q k Ham Qaadir Mukhtaar heñ jo chahty heñ krty heñ. Hmary kaam me
koi dakhal dainy wala naheeñ) ¤
70.
Aur beshak Ham ny
Banni-Aadam ko (aqqal-o-ilm-o-go'yai ataa farma kr) izzat bakhshi aur Ham ny on
ko khushki aur tarri (yani shehroñ aur sehraoñ aur samundroñ aur dar'yaoñ) meiñ
(mukhtlif sawaar'yoñ yani jaanwaroñ kashtiyoñ aur jahaazoñ waghaira par) sawaar
kea aur Ham ny onheñ pakiza cheezoñ sy (lateef aur khush-zaeqa) rizq ataa kea
aur Ham ny onheñ aksar makhlooqat par jinheñ Ham ny paida kia hy fazilat dy kr
bar-tar bna dia hy (yahañ aksar sy muraad kul hy. Momin Allah k nazdeek
Malaekah sy zeyaada kraamat rakhta hy. Farishtoñ meiñ aqqal hy shehwat naheeñ,
haivanaat meiñ shehwat hy aqqal naheeñ aur insaan shehwat-o-aqqal donoñ ka
jaamy hy, to jis ny aqqal ko shehwat par ghalib kea wo Malaekah sy Afzal hy aur
jis ny shehwat ko aqqal par ghaalib kea wo haivanaat sy bd-tar hy)¤
71.
Wo din (yaad kreñ)
jab Ham logoñ k har tabqa ko on k paishwa k sath bulaeñ gy (har qom apny sardar
k pas jamma ho gi jis k hukam par dunia meiñ chalti rahi khwaa os ny haq ki
da'wat di ho ya baatil ki), so jisy os ka noshta-e-aa'maal os k daeñ hath meiñ
dia jaey ga pus ye log apna naama-e-aa'maal (musarrat-o-shaadmani sy) parheñ gy
aur on par dhaagy brabar bhi zulm naheeñ kia jaey ga (yani sawaab-e-aa'maal
meiñ adna bhi kammi na ki jaey gi) ¤
72.
Aur jo shakhs is
(dunia) meiñ (haq sy) andha raha so wo Aakhirat meiñ bhi andha aur raah ( e
nijaat) sy bhatka rahy ga ¤
73.
Aur Kuffaar to
yehi chahty thy k Aap (s.a.w.w) ko os (Hukm-e-Elahi) sy phair deñ jis ki Ham ny
Aap (s.a.w.w) ki tarraf Wahi farmai hy ta k Aap (s.a.w.w) os (Wahi) k siwa Ham
par kuchh aur (baatoñ) ko mansoob kr deñ aur tab Aap (s.a.w.w) ko apna dost bna
leñ (Saqaif ka aik wafd Aap s.a.w.w k pas aa kr kehny lagga k agar Aap s.a.w.w
3 bateñ manzoor kr leñ to ham Aap s.a.w.w ki Bait kr leñ, Aik to ye k Namaz
meiñ Ruku-o-Sajood na kreñ gy, dusri ye k ham apny but apny hathoñ sy na torheñ
gy, teesri ye k Laat ko poojeñ gy to naheeñ magar aik saal os k poojny waly jo
nazreñ charhaawy laeñ os ko wasool kr leñ. Aap s.a.w.w ny inkaar kia to wo log
kehny laggy k agar Aap s.a.w.w ko andaisha ho k Arab shakaet kreñ gy to Aap
s.a.w.w on sy keh deejiye k Allah ka Hukam aisa he tha, is par ye Aayat naazal
hui) ¤
74.
(Kuffaar ny Aap
s.a.w.w sy kaha k Aap s.a.w.w Wahi k siwa kuchh aur bateñ bhi Allah k sath
mansoob kr deñ to Aap s.a.w.w ny on ki bat maan'ny sy inkaar kr dia, is par
Allah ny farmaya) Aur agar Ham ny Aap (s.a.w.w) ko (pehly he sy
ismat-e-Nabuwwat k zarriye) saabit-qaddam na bnaya hota to tab bhi Aap
(s.a.w.w) on ki taraf (apny pakiza nafs aur tabbai ista'daad k baes) bohut he
ma'mooli sy jhukao k qreeb jaty (on ki tarraf phir bhi zeyaada mael na hoty aur
wo na-kaam rehty magar Allah ny Aap s.a.w.w ko ismat-e-Nabuwwat k zarriye is
ma'mooli sy mailaan k qreeb jany sy bhi mehfooz farma lia hy) ¤
75.
(Agar bil-farz Aap
s.a.w.w mael ho jaty to) os waqt Ham Aap (s.a.w.w) ko 2 gunna mazza zindagi
meiñ aur 2 gunna mot meiñ chakhaaty phir Aap (s.a.w.w) Apny liye (bhi) Ham par
koi maddad-gaar na paaty¤
76.
Aur Kuffaar ye bhi
chahty thy k Aap (s.a.w.w) k Qaddam Sarzameen ( e Makkah) sy okhaarh deñ ta k
wo Aap (s.a.w.w) ko yahaañ sy nikaal sakkeñ aur (agar bil-farz aisa ho jata to)
os waqt wo (khud bhi) Aap (s.a.w.w) k peechhy thorhi see muddat k siwa thehr na
skty (aur jald he halaak kr diye jaty) ¤
77.
On sb Rasooloñ (k
liye Allah) ka Dastoor (yehi raha hy) jinheñ Ham ny Aap (s.a.w.w) sy pehly
bhaija tha (k jis qom ny apny darmeyaan sy apny Rasool ko nikaala onheñ halaak
kr dia gea) aur Aap (s.a.w.w) Hmary Dastoor meiñ koi tabdeeli naheeñ paeñ gy ¤
78.
Aap (s.a.w.w)
Sooraj dhalny sy ly kr rat ki tareeki tak (Zuhar, Asar, Maghrib aur Isha ki)
Namaz qaem farmaya kreñ aur Namaz-e-Fajr ka Quran parhna bhi (laazim kr leñ),
Beshak Namaz-e-Fajr k Quran meiñ (Frishtoñ ki) haazri hoti hy (Rat k Frishty
bhi mojood hoty heñ aur Din k Frishty bhi aa jaty heñ. Aur hazoori bhi naseeb
hoti hy)¤
79.
Aur raat k kuchh
hissa meiñ (bhi) Quran k sath (shabb-khaizi krty huwy) Namaz-e-Tahajjud parha
kreñ ye khaas Aap (s.a.w.w) k liye zeyaada (ki gai) hy.Yaqinan Aap (s.a.w.w) ka
Rabb Aap (s.a.w.w) KO Maqaam-e-Mahmood par faez farmaey ga (yani wo Maqaam-e-Shafa'at-e-Uzma
jahañ jumla Awwaleen-o-Aakhireen Aap s.a.w.w ki tarraf rujoo aur Aap s.a.w.w ki
Hamd kreñ gy)¤
80.
Aur Aap (s.a.w.w
Apny Rabb k hazoor ye) arz krty rahaiñ: Ay Mery Rabb! Mujhy sachai (khushnoodi)
k sath daakhil farma (jahañ bhi daakhil farmana ho khwaa wo koi mkaan ho ya
qabbar, koi mansab ho ya koi kaam,) aur Mujhy sachai ( o khushnoodi) k sath
baahir ly aa (jahañ sy bhi lana ho) aur Mujhy apni janib sy maddad-gaar
ghalba-o-quwwat ataa farma dy (jis sy Tery dushmanoñ par ghaalib hooñ)¤
81.
Aur farma deejiye:
Haq aa gea aur baatil bhaag gea (yani Islam aaya aur Kufr mit gea ya Quran aaya
aur Shetan halaak huwa), beshak baatil ny zael-o-nabood he ho jana hy (Kaa'ba k
gird 360 but nasb kiye gaey thy, jin ko lohy aur raang sy jorh kr mazboot kia
gea tha.Fattah-e-Makkah k din Sarwar-e-Aalam s.a.w.w k Dast-e-Mubarak meiñ aik
lakrhi the. Aap s.a.w.w ye Aayat parh kr os lakrhi sy jis but ki tarraf ishara
farmaty jaty thy wo girta jata tha)¤
82.
Aur Ham Quran meiñ
wo cheez naazal farma rahy heñ jo Emaan waloñ k liye Shifa aur Rehmat hy (k os
sy amraaz-e-zahira aur baatina, zalaalat-o-jahaalat waghaira door hoty heñ aur
zahiri-o-baatni sehat haasil hoti hy. Aitqadaat-e-baatina-o-akhlaaq-e-razeela
daffa hoty heñ. Is ka aik aik harf barkaat ka ganjeena hy jis sy jismani amraaz
aur aasaib door hoty heñ) aur zalimoñ (yani Kaafiroñ) k liye to sirf nuqsaan he
meiñ izafa kr raha hy¤
83.
Aur jab Ham insan
par (koi) inaam farmaty heñ (os ko sehat aur wus'at ataa farmaty heñ) to wo
(Hmary Zikr-o-Shukr sy) guraiz krta (hy) aur pehloo-tahi (yani takabbar) kr
jata hy aur jab osy koi (zarrar ya faqr-o-haadisa ya koi aur) takleef pohnch
jati hy (to gir'ya-o-zaari sy duaeñ krta hy aur on duaoñ k qabool ka assar
zaahir na ho) to ma'yoos ho jata hy (goya na shakir hy na sabir. Momin ko
chahye k agar ajaabat-e-dua meiñ takheer ho to wo ma'yoos na ho, Allah ki
Rehmat ka omeed-waar rahy)¤
84.
Farma deejiye: Har
koi (apny) apny treeqa-o-fitrat par ammal paira hy (ham apny treeqa par, tum
apny treeqa par. Jis ka johar-e-zaat shareef-o-tahir hy os sy
af'aal-e-jameela-o-akhlaq-e-pakiza saadir hoty heñ aur jis ka nafs khabees hy
os sy af'aal-e-khabeesa sar-zad hoty heñ), aur Aap (s.a.w.w) ka Rabb khoob
janta hy k sb sy zeyaada seedhi raah par kon hy¤
85.
Aur ye (Kuffaar)
Aap (s.a.w.w) sy Rooh k mut'alliq sawaal krty heñ, farma deejiye: Rooh Mery
Rabb k amr sy hy aur tumheñ bohut he thorha sa ilm dia gea hy (Yahood ny Quresh
ko mashwra dia k Hazoor s.a.w.w sy 3 sawaal kro, agar teenoñ ka jawaab na deñ
to Wo Nabi naheeñ aur agar teenoñ ka jawaab dy deñ jab bhi Nabi naheeñ. Aur
agar 2 ka jawaab dy deñ aur aik ka jawaab na deñ to Wo sachy Nabi heñ. Wo 3
sawaal ye heñ. 1. As'haab-e-Kahf ka waqea 2. Zulqurnain ka waqea 3. Rooh ka
haal. Quresh ny Hazoor s.a.w.w sy ye sawaal kiye. Aap s.a.w.w ny As'haab-e-Kahf
aur Zulqurnain k waqe'aat to mufassal beyaan kr diye aur Rooh ka mu'aamla
ab'haam meiñ rakha jaisa k Toraat meiñ mub'ham rakha gea tha. Quresh ye sawaal
kr k naadim huwy)¤
86.
Aur agar Ham
chaheñ to is (Kitab) ko jo Ham ny Aap (s.a.w.w) ki tarraf Wahi farmai hy (logoñ
k diloñ aur tehreeri nuskhoñ yani seenoñ aur saheefoñ sy) mehv farma deñ (aur
is ka koi assar baqi na chhorheñ) phir Aap (s.a.w.w) Apny liye is (Wahi) k ly
jany par Hmari Bargah meiñ koi wakaalat krny wala bhi na paeñ gy¤
87.
Magar ye k Aap
(s.a.w.w) k Rabb ki Rehmat sy (Ham ny isy Qeyaamat tak qaem rakha hy aur har
taghayyar-o-tabaddal sy mehfooz farmaya), beshak (ye) Aap (s.a.w.w) par (aur
Aap s.a.w.w k waseela sy Aap s.a.w.w ki Ommat par) Os ka bohut barha Fazzal hy
(k Os ny Aap s.a.w.w par Quran naazal farmaya aur is ko baqi-o-mehfooz rakha
aur Aap s.a.w.w ko tmaam Banni-Aadam ka Sardaar aur Khaatam-un-Nabiyyeen kia
aur Maqaam-e-Mahmood ata farmaya) ¤
88.
Farma deejiye:
Agar tmaam insan aur jinnaat is bat par jamma ho jaeñ k wo (Blaaghat aur
Husn-o-Nazm-o-Tarteeb aur Uloom-e-Ghaibia-o-Ma'aarif-e-Elahia meiñ sy kisi
Kamaal meiñ) is Quran k misl (koi dusra kalaam bna) laeñ gy to (bhi) wo is ki
misl naheeñ la skty agarchy wo aik dusry k maddad-gaar bn jaeñ¤
89.
Aur beshak Ham ny
is Quran meiñ logoñ k liye har tarrah ki misaal (mukhtlif treeqoñ sy) bar bar
beyaan ki hy magar aksar logoñ ny (isy) qabool na kia (ye) siwaey na-shukri k
(aur kuchh naheeñ)¤
90.
Aur wo (Kuffaar-e-Makkah)
kehty heñ k ham Aap (s.a.w.w) par har giz Emaan naheeñ laeñ gy yahañ tak k Aap
(s.a.w.w) hmary liye zameen sy koi chashma jari kr deñ 90¤
91.
Ya Aap (s.a.w.w) k
pas khajooroñ aur angooroñ ka koi baagh ho to Aap (s.a.w.w) os k andar behti
hui nehreñ jari kr deñ¤
92.
Ya jaisa k Aap
(s.a.w.w) ka kheyaal hy ham par (abhi) aasmaan k chnd tukrhy gira deñ ya Aap
(s.a.w.w) Allah ko aur Frishtoñ ko hmary samny ly aeñ ¤
93.
(Kuffaar kehty heñ
k Aap s.a.w.w Allah ko aur Frishtoñ ko hmary saamny ly aaeñ) Ya Aap
(s.a.w.w) ka koi sony ka ghr ho (jis meiñ Aap s.a.w.w khoob aish sy raheñ) ya
Aap (s.a.w.w) aasmaan par charh jaeñ, phir bhi ham Aap (s.a.w.w) k (aasmaan
meiñ) charh jany par har giz Emaan naheeñ laeñ gy yahañ tak k Aap (s.a.w.w
wahañ sy) hmary oopar koi Kitab otaar laeñ jisy ham (khud) parh sakkeñ, Farma
deejiye:Mera Rabb (in khraafaat meiñ oljhny sy) Pak hy Maiñ to aik insaan (aur)
Allah ka bhaija huwa (Rasool) hooñ¤
94.
Aur (on) logoñ ko
Emaan lany sy aur koi cheez maany na hui jab k on k pas Hadaayat (bhi) aa chuki
the siwaey is k k wo kehny laggy: Kia Allah ny (aik) Bashar ko Rasool bna kr
bhaija? (Rasooloñ ko bashar he jaanty rahy aur On k Mansab-e-Nabuwwat aur Allah
Ta'aala k ataa farmaey huwy Kamaalaat k mo'trif na huwy. Yehi on k Kufr ki
assal the)¤
95.
Farma deejiye:
Agar zameen meiñ (insanoñ ki bjaey) Frishty chalty phirty sakoonat pazeer hoty
to yaqinan Ham (bhi) on par aasmaan sy kisi Frishta ko Rasool bna kr otaarty (q
k wo on ki jins sy hota) ¤
96.
Farma deejiye:
Mery (Sidq-o-adaa-e-Farz-e-Risalat) aur tumhary (Kizb-o-Adawat k) darmeyaan
Allah he Gawaah k tor par Kaafi hy, beshak Wo Apny bndoñ sy khoob aagaah khoob
daikhny wala hy ¤
97.
Aur Allah jisy
Hadaayat farma dy to wohi Hadaayat-yaafta hy, aur jisy Wo gumraah thehra dy
(aur tofeeq na dy) to Aap on k liye Os k siwa maddad-gaar naheeñ paeñ gy (jo
onheñ Hadaayat kreñ), aur Ham onheñ Qeyaamat k Din oundhy mooñh (ghaseet kr)
othaeñ gy is haal meiñ k wo andhy, goongy aur behry hoñ gy (jaisy wo dunia meiñ
Haqq k daikhny, bolny aur sun'ny sy andhy, goongy aur behry bny rahy aisy he
othaey jaeñ gy), on ka thikaana Dozakh hy, jab bhi wo bujhny laggy gi Ham onheñ
(azaab dainy k liye) aur zeyaada bharhka deñ gy ¤
98.
Ye on logoñ ki
saza hy is wajjah sy k onhoñ ny Hmari Aayatoñ sy Kufr kia aur ye kehty rahy k
kia jab ham (mr kr boseeda) haddiyañ aur raiza raiza ho jaeñ gy to kia ham
az-sar-e-no paida kr k othaey jaeñ gy? ¤
99.
Kia onhoñ ny
naheeñ daikha k Jis Allah ny aasmanoñ aur zameen ko paida farmaya hy (Wo) is
bat par (bhi) Qaadir hy k Wo on logoñ ki misl (dobara) paida farma dy (ye Os ki
Qudrat sy kuchh ajeeb naheeñ) aur Os ny on k liye (azaab ka ya mot-o-be'sat ka)
aik waqt muqarrar farma dia hy jis meiñ koi shakk naheeñ, phir bhi zaalimoñ ny
inkaar kr dia hy magar (ye) na-shukri hy¤
100.
Farma deejiye:
Agar tum Mery Rabb ki Rehmat k khazaanoñ k maalik hoty (jin ki kuchh intaha
naheeñ) to tab bhi (sb) kharch ho jany k khof sy tum (apny hath) roky rakhty,
aur insaan bohut he tang dil aur bakheel waqea huwa hy¤
101.
Aur beshak Ham ny
Moosa (a.s) ko 9 Roshan Nishaniyañ deeñ (wo 9 Nishaniyañ ye heñ: 1. Asaa, 2.
Yadd-e-Baiza 3. Wo Oqda jo Moosa a.s ki Zubaan Mubarak meiñ tha phir Allah
Ta'aala ny os ko hal farma dia. 4. Dar'ya ka phatna aur os meiñ rasty ban'na 5.
Toofaan 6. Tiddi 7. Ghann 8. Maindak 9. Khoon) to Aap (s.a.w.w) Banni-Israeel
sy poochhiye jab (Moosa a.s) on k pas aey to Firon ny on sy kaha: Maiñ to yehi
kheyaal krta hooñ k ay Moosa (a.s)! Tum seher-zadda ho (Tumheñ jadoo kr dia gea
hy jis sy Tumhari Aqqal bjaa na rahi)¤
102.
Moosa (a.s) ny
(Firon sy) farmaya: Tu (dil sy) jaanta hy k in (9) Nishaniyoñ ko kisi aur ny
naheeñ otaara magar aasmanoñ aur zameen k Rabb ny ibrat-o-baseerat bna kr, aur
Maiñ to yehi kheyaal krta hooñ k ay Firon! Tu halaak-zadda ho (tu jald halaak
huwa chahta hy)¤
103.
Phir (Firon ny)
erada kia k on ko (yani Moosa a.s aur On ki qom ko) sar-zameen ( e Misr) sy
okhaarh kr phaink dy pus Ham ny osy (yani Firon ko) aur jo os k sath thy sb ko
gharq kr dia (aur Moosa a.s ko aur On ki qom ko salaamti ataa farmai)¤
104.
Aur Ham ny os k
bad Banni Israeel sy farmaya: Tum is mulk (yani Misr-o-Shaam) meiñ aabaad ho
jao phir jab Aakhirat (yani Qeyaamat) ka wa'da aa jaey ga (to) Ham tum sb ko ekatha
samait kr ly jaeñ gy¤
105.
Aur Haq k sath he
Ham ny is (Quran) ko otaara hy aur Haq he k sath Wo otra hy (Aayat ka ye jumla
har aik bimari k liye amal-e-mujarrab hy. Marz par hath rakh kr parh kr dam kr
dia jaey to Allah k Fazzal sy bimari door ho jati hy), aur (Ay Habib-e-Mukarram
s.a.w.w) Ham ny Aap (s.a.w.w) ko khush-khabri sunany wala aur darr sunany wala
he bna kr bhaija hy ¤
106.
Aur Quran ko Ham
ny juda juda kr k (23 saal k arsa meiñ) otaara ta k Aap (s.a.w.w) isy logoñ par
theher theher kr parheñ (ta k is k mazameen ba-aasani sun'ny waloñ k
zehen-nasheen hoty raheñ) aur Ham ny isy rafta rafta (haalaat aur masaaleh k
mutabiq) tadreejan otaara hy¤
107.
Farma deejiye: Tum
is (Quran) par Emaan lao ya Emaan na lao (aur apny liye Naimat-e-Aakhirat
ikhtiaar kro ya Azaab-e-Jahannam), beshak jin logoñ ko is sy qabl ilm ( e
Kitab) ataa kia gea tha jab ye (Quran) onheñ parh kr sunaya jata hy wo
thorhiyoñ k bal Sajdah meiñ gir parhty heñ¤
108.
Aur kehty heñ:
Hmara Rabb Pak hy, beshak Hmary Rabb ka wa'da poora ho kr he rehna tha (jo Os
ny Apni pehli Kitaboñ meiñ farmaya tha k Nabi-e-Aakhir-uz-Zamaañ Muhammad
s.a.w.w ko mab'oos farmaeñ gy)¤
109.
Aur (Apny Rabb k
hazoor ijz-o-niaz sy aur narm dili sy) thorhiyoñ k bal gir'ya-o-zaari krty huwy
gir jaty heñ, aur Ye (Quran) on k khushoo-o-khuzoo meiñ mazeed izafa krta chala
jata hy ¤{AAYAT-E-SAJDAH}
110.
Farma deejiye k
Allah ko pukaro ya Rehman ko pukaro, jis Naam sy bhi pukaarty ho (sb) achhy
Naam Osi k heñ (aik shabby Aap s.a.w.w ny taweel Sajdah kia aur apny Sajdah
meiñ Ya Allah Ya Rehman farmaty rahy. Abu Jahhal ny suna to kehny lagga k
Muhammad s.a.w.w hammeñ to kai ma'boodoñ k poojny sy manna krty heñ aur Aap
khud 2 ko pukaarty heñ Allah ko aur Rehman ko, is par farmaya gea Allah aur
Rehman 2 Naam aik he Ma'bood-e-Bar-Haq k heñ khwaa kisi Naam sy pukaro), aur na
apni Namaz (meiñ Qirrat) buland aawaaz sy kreñ aur na bilkul aahista parheñ aur
donoñ k darmeyaan (mo'tadil) raasta ikhtiaar farmaeñ (Hazoor s.a.w.w
Makkah-e-Mukarrama meiñ jab Apny As'haab ki imaamat farmaty to Qirrat buland
aawaaz sy farmaty. Mushrikeen aawaaz sunty to Quran ko gaaliañ daity. Is par ye
Aayat naazal hui)¤
111.
Aur farmaeye k sb
tareefaiñ Allah he k liye heñ Jis ny na to (Apny liye) koi baita bnaya (jaisa k
Yahood-o-Nasaara ka gumaan hy) aur na he (Os ki) Saltanat-o-Farmaañ-Rawai meiñ
koi shreek hy (jaisa k Mushrikeen kehty heñ) aur na kmzori k baes Os ka koi
maddad-gaar hy (yani Wo kmzor naheeñ k Os ko kisi hmaeti aur maddad-gaar ki
haajat ho. Ay Habib s.a.w.w) Aap (s.a.w.w) Osi ko Buzurg-tarr jaan kr Os ki
khoob Barhai (beyaan) krty reh'ye (Roz-e-Qeyaamat Jannat ki tarraf sb sy pehly
wohi log bulaey jaeñ gy jo har haal meiñ Allah ki Hamd krty heñ, is Aayat ka
naam Aayatul-Oz hy, Bani-Abdul Mutallib k bachy jab bolna shuroo krty thy to on
ko sb sy pehly yehi Aayat sikhai jati the) ¤ {LAST AAYAT OF SURAH
BANI-ISRAAEEL}
Surah
BANI-ISRAAEEL ka Tarjuma (January 11 to March 31, 2013) 80 din meiñ mukammal
huwa.
BANI-ISRAAEEL
Makki Surah hy.
SURAH BANI-ISRAAEEL ki tafseel ye hy.
Ruku : 12
|
Para : 15 (Ruku 01 to 12)
|
Aayaat : 111
|
Kalimaat : 533
|
Huroof : 3460
|
