Surah IBRAHIM

 Para 13
SURAH 14

 Surah  IBRAHIM

 ALLAH K NAAM SY SHUROO JO BOHUT MEHRBAN NEHAYAT REHEM FARMANY WALA HY

1. ALIF LAAAM RAA, Ye (Azeem) Kitab hy Jisy Ham ny Aap (s.a.w.w) ki taraf otaara hy ta k Aap (s.a.w.w) logoñ ko (Kufr ki) tareekiyoñ sy nikaal kr (Emaan k) Noor ki janib ly aeñ (mazeed ye k) on k Rabb k hukam sy Os ki raah ki taraf (laeñ) Jo ghalba wala sb khoobiyoñ wala hy¤
2. Wo Allah k jo kuchh aasmanoñ meiñ aur jo kuchh zameen meiñ hy (sb) Osi ka hy, aur Kuffaar k liye sakht azaab k baes barbaadi hy¤
3. (Ye) wo log heñ jo duniyavi zindagi ko Aakhirat k muqaabla meiñ ziaada pasand krty heñ aur (logoñ ko) Allah ki raah sy rokty heñ aur is (Deen-e-Haqq) meiñ kajji tlaash krty heñ. Ye log door ki gumrahi meiñ (parh chuky) heñ¤
4. Aur Ham ny kisi Rasool ko naheeñ bhaija magar apni qom ki zubaan k sath ta k Wo on k liye (phaighaam-e-haq) khoob waazeh kr saky, phir Allah jisy chahta hy gumraah thehra deta hy aur jisy chahta hy hadaayat bakhshta hy, aur Wo Ghalib Hikmat wala hy¤
5. Aur beshak Ham ny Moosa (a.s) ko apni nishaaniyoñ k sath bhaija k (Ay Moosa a.s) Tum apni qom ko andheroñ sy nikaal kr Noor ki taraf ly jao aur onheñ Allah k dinoñ ki yaad dilao (jo on par aur pehli Ommatoñ par aa chuky thy). Beshak is meiñ har ziaada sabr krny waly (aur) khoob shukr bjaa lany waly k liye nishaaniaañ heñ¤
6. Aur (wo waqt yaad keejiye) jb Moosa (a.s) ny apni qom sy kaha: Tum apny oopar Allah k (os) inaam ko yaad kro jb Os ny tumheñ Aal-e-Firon sy nijaat di jo tumheñ sakht azaab pohnchaaty thy aur tumhary larhkoñ ko zibbah kr daalty thy aur tumhari aurtoñ ko zinda chhorh dety thy, aur is meiñ tumhary Rabb ki janib sy barhi bhaari aazmaesh the¤
7. Aur (yaad kro) jb tumhary Rabb ny aagaah farmaya k agar tum shukr ada kro gy to MAIÑ tum par (Naimtoñ meiñ) zuroor izafa kroñ ga aur agar tum na-shukri kro gy to MERA azaab yaqinan sakht hy¤
8. Aur Moosa (a.s) ny (apni qom sy) kaha: Agar tum aur wo sb k sb log jo zmeen meiñ heñ Kufr krny laggaiñ to beshak Allah (on sb sy) yaqinan bay-Niaz laeq-e-hamd-o-sana hy¤
9. Kia tumheñ on logoñ ki khabar naheeñ pohnchi jo tum sy pehly ho guzry heñ, (wo) qom-e-Nooh aur Aad aur Samood (ki qomoñ k log) thy aur (kuchh) log jo on k bad huwy, onheñ Allah k siwa koi naheeñ janta (q k wo saf'ha-e-hasti sy bilkul neest-o-nabood ho chuky heñ), on k pas on k Rasool waazeh nishaniyoñ k sath aey thy pus onhoñ ny (azraah-e-tamassukhar o anaad) apny hath apny moohoñ meiñ daal liye aur (barhi jasaarat k sath) kehny laggy: Ham ny os (Deen) ka inkaar kr dia jis k sath Tum bhaijy gaey ho aur yaqinan ham os cheez ki nisbat iztraab-angaiz shakk meiñ mubtla heñ jis ki taraf tum hammeñ daawat dety ho¤
10. On k Paighambroñ ny kaha: Kia Allah k bary meiñ shakk hy Jo aasmaanoñ aur zmeen ka paida farmaany wala hy, (Jo) tumheñ bulata hy k tumhary gunahoñ ko tumhari khatir bakhsh dy aur (tumhari na-farmaaniyoñ k bawjood) tumheñ aik muqarrarah muhlat diye rakhta hy. Wo (Kaafir) boly: Tum to sirf hmary jaisy bashar he ho, Tum ye chahty ho k hammeñ in (buttoñ) sy rok do jin ki purastish hmary baap dada kia krty thy,So Tum hmary paas koi roshan daleel lao¤
11. On k Rasooloñ ny on sy kaha:Agarchy Ham (nafs-e-bashriyyat meiñ) tumhari tarah insan he heñ lekin (is farq par bhi ghor kro k) Allah apny bndoñ meiñ sy jis par chahta hy ehsaan farmata hy (aur Nabuwwat-o-Risaalat k sath barguzida krta hy phir brabri kesi ?) aur (reh gai roshan daleel ki bat) ye Hmara kaam naheeñ k Ham Allah k hukam k baghair tumhary pas koi daleel ly aeñ, aur Allah he par Mominoñ ko bhrosa krna chahye¤
12. Aur Hammeñ kia hy k Ham Allah par bhrosa na kreñ jab k Osi ny Hammeñ (Hadaayat-o-Kaam'yabi ki) raahaiñ dikhai heñ, aur Ham zuroor tumhari aziat rasaaniyoñ par sabr kreñ gy aur Ehl-e-Tawakkal ko Allah he par tawakkal krna chahye¤
13. Aur Kaafir log apny Paighambroñ sy kehny laggy: Ham behr-soorat Tumheñ apny mulk sy nikaal deñ gy ya Tumheñ zuroor hmary maz'hab meiñ laut aana ho ga, to On k Rabb ny On ki taraf Wahi bhaiji k Ham zalimoñ ko zuroor halaak kr deñ gy¤
14. Aur on k bad Tumheñ zuroor (osi) mulk meiñ aabaad farmaeñ gy (jo apny hamsaey ko aziat deta hy Allah os k ghr ka osi hamsaey ko malik bna deta hy). Ye (wada) har os shakhs k liye hy jo Mery Huzoor kharha hony sy darra Aur Mery Wada ( e azaab) sy khaef huwa¤
15. Aur (bil-aakhir) Rasooloñ ny (Allah sy) fattah maangi aur har sarkash ziddi na-muraad ho gea¤
16. Is (barbaadi) k peechhy (phir) Jahannam hy. Aur osy peep ka pani pilaya jaey ga¤
17. Jisy wo ba-mushkil aik aik ghoont piye ga, aur osy halq sy neechy otaar na saky ga (Jahannami ko peep ka pani pilaya jaey ga, jab wo moohn k paas aey ga to os ko bohut naagwaar maaloom ho ga, jab aur qreeb ho ga to os sy chehra bhun jaey ga aur sarr tak ki khaal jal kr gir parhy gi. Jb piye ga to aantaiñ katt kr nikal jaeñ gi), aur osy har taraf sy mot aa ghairy gi aur wo marr (bhi) na saky ga, aur (phir) os k peechhy (aik aur) barha he sakht azaab ho ga (yani har azaab k bad os sy ziaada shadeed-o-ghaleez azaab ho ga)¤
18. Jin logoñ ny apny Rabb sy Kufr kia hy, on ki misaal ye hy k on k aamaal (jin ko wo naik samajhty thy jaisy k muhtajoñ ki imdaad, musafiroñ ki madad aur bimaroñ ki khabar-geeri waghaira chooñky Emaan par mabni naheeñ is liye sab bay-kaar heñ aur wo aamaal os) raakh ki manind heñ jis par taiz aandhi k din sakht hawa ka jhonka aa gea, wo on (aamaal) meiñ sy jo onhoñ ny kmaey thy kisi cheez par qaboo naheeñ pa sakkaiñ gy. Yehi bohut door ki gumrahi hy¤
19. (Ay sun'ny waly) Kia tu ny naheeñ daikha k beshak Allah ny aasmaanoñ aur zmeen ko haq (par mabni hikmat) k sath paida farmaya. Agar Wo chahy (to) tumheñ neest-o-nabood farma dy aur (tumhari jagga) nai makhlooq ly aey¤
20. Aur ye (kaam) Allah par (kuchh bhi) dushwaar naheeñ hy¤
21. Aur (Roz-e-Mehshar) Allah k saamny sab (chhoty barhy) hazir hoñ gy to (pairvi krny waly) kmzor log (taaqatwar) mutakabbroñ sy kahaiñ gy: Ham to (omar bhr) tumhary tabay rahy to kia tum Allah k azaab sy bhi hammeñ kisi qadar bacha sakty ho? Wo (omra apny peechhy lagny waly ghreeboñ sy) kahaiñ gy: Agar Allah hammeñ hadaayat krta to ham tumheñ bhi zuroor hadaayat ki raah dikhaty (ham khud bhi gumrah thy so tumheñ bhi gumrah krty rahy, ab khulasi ki koi raah naheeñ, ao roeñ aur far'yaad kreñ. 500 bars far'yaad-o-zaari kreñ gy aur kuchh kaam na aey gi to kahaiñ gy k ab sabr kr k daikho shaed is sy kuchh kaam nikly. 500 bars sabr kreñ gy wo bhi kaam na aey ga to kahaiñ gy k) Ham par brabar hy khwa (aaj) ham aah-o-zaari kreñ ya sabr kreñ, hmary liye koi raah-e-fraar naheeñ hy¤
22. Aur Shetan kahy ga jab k faisla ho chuky ga k beshak Allah ny tum sy sacha wada kia tha aur maiñ ny (bhi) tum sy wada kia tha, so maiñ ny tum sy wada khilaafi ki hy,aur mujhy (dunia meiñ) tum par kisi qisam ka zor naheeñ tha siwaey is k k maiñ ny tumheñ (batil ki taraf) bulaya so tum ny (apny mafaad ki khatir) meri daawat qabool ki, ab tum mujhy mlaamat na kro balky (khud) apny aap ko mlaamat kro. Na maiñ (aaj) tumhari far'yaad-rassi kr skta huñ aur na tum meri far'yaad-rassi kr skty ho. Is sy pehly jo tum mujhy (Allah ka) shareek thehraaty rahy ho beshak maiñ (aaj) os sy inkaar krta huñ. Yaqinan zalimoñ k liye dard-naak azaab hy¤
23. Aur jo log Emaan laey aur naik amal krty rahy wo Jannatoñ meiñ dakhil kiye jaeñ gy jin k neechy sy nehraiñ beh rahi heñ (wo) on meiñ apny Rabb k hukam sy hamesha rahaiñ gy, (mulaqaat k waqt) os meiñ on ka duaeya kalma "SALAAM" ho ga¤
24. Kia Aap ny naheeñ daikha, Allah ny kaisi misaal biaan farmai hy k Pakiza Baat (yani Kalma-e-Toheed) os pakiza drakht (yani Khujoor k drakht) ki manind hy jis ki jarh (zmeen meiñ) mazboot hy aur os ki shakhaiñ aasmaan meiñ heñ¤
25. Wo (drakht) apny Rabb k hukam sy har waqt phal dy raha hy, aur Allah logoñ k liye misaaleñ biaan farmata hy ta k wo nasihat hasil kreñ¤
26. Aur na-paak baat (yani Kufri Kalaam) ki misaal os na-paak drakht ki see hy jisy zmeen k oupar he sy okhaarh lia jaey, osy zra bhi qraar ( o baqaa) na ho¤
27. Allah Emaan waloñ ko (os) mazboot Baat (yani Kalma-e-Emaan ki barkat) sy duniyavi zindagi meiñ bhi sabit qadam rakhta hy aur Aakhirat meiñ (bhi). Aur Allah zalimoñ ko gumraah thehra deta hy. Aur Allah jo chahta hy kr daalta hy¤
28. Kia Aap ny on logoñ ko naheeñ daikha jinhoñ ny Allah ki Naimat ( e Emaan) ko Kufr sy baddal dala aur onhoñ ny apni qom ko tabaahi k ghr meiñ otaar dia¤
29. (Wo) Dozakh hy jis meiñ jhoñky jaeñ gy, aur wo bura thikaana hy¤
30. Aur onhoñ ny Allah k liye shareek bna daly ta k wo (logoñ ko) Os ki raah sy behkaeñ. Farma deejiye: Tum (chnd roza) faeda otha lo beshak tumhara anjaam aag he ki taraf (jana) hy¤
31. Aap (s.a.w.w) Mery Momin bndoñ sy farma deñ k wo Namaz qaem rakhaiñ aur jo rizq Ham ny onheñ dia hy os meiñ sy poshida aur ailania (Hmari raah meiñ) kharch krty rahaiñ os Din k aany sy pehly jis Din meiñ na koi khareed-o-frokht ho gi aur na he koi (duniyavi) dosti (kaam aey gi)¤
32. Allah Wo hy Jis ny aasmaanoñ aur zmeen ko paida farmaya aur aasmaan ki janib sy pani otaara phir os pani k zarriye sy tumhary rizq k tor par phal paida kiye, aur Os ny tumhary liye kashtiyoñ ko musakhar kr dia ta k Os k hukam sy samundar meiñ chalti rahaiñ aur Os ny tumhary liye dar'yaoñ ko (bhi) musakhar kr dia¤
33. Aur Os ny tumhary faida k liye Sooraj aur Chaand ko (ba-qaeda aik nizaam ka) mutee bna dia jo hamesha (apny apny madaar meiñ) gardish krty rehty heñ, aur tumhary (nizaam-e-hayaat k) liye Raat aur Din ko bhi (aik nizaam k) tabay kr dia¤
34. Aur Os ny tumheñ har wo cheez ata farma di jo tum ny Os sy maangi, aur agar tum Allah ki naimtoñ ko shumaar krna chaho (to) poora shumaar na kr sakko gy, beshak insan barha he zalim barha he na-shukr guzaar hy¤
35. Aur (yaad kejiye) jb Ibrahim (a.s) ny arz kia: Ay Mery Rabb! is Shehr (Makkah) ko jaey aman bna dy (is meiñ na kisi insan ka khoon bahaaya jaey na kisi par zulm kia jaey na wahaañ shikaar kia jaey na wahaañ sabza kata jaey) aur Mujhy aur Mery bachoñ ko is (baat) sy bacha ly k Ham buttoñ ki purastish kreñ¤
36. Ay Mery Rabb! in (buttoñ) ny bohut sy logoñ ko gumraah kr dala hy. Pus jis ny Meri pairvi ki wo to Mera ho ga aur jis ny Meri na-farmani ki to beshak Tu barha bakhshny wala nehaayat Mehrban hy¤
37. (Ismaeel a.s Mulk-e-Shaam meiñ Hajra a.s k batn-e-Pak sy paida huwy. Ibrahim a.s ki bivi Sara a.s k koi olaad na the is liye Onheñ rashk paida huwa aur Ibrahim a.s sy kaha k Aap Hajra a.s aur On k Bety Ismaeel a.s ko Mery pas sy juda kr dejiye. Wahi k mutabiq Ibrahim a.s Hajra a.s aur Ismaeel a.s ko Makkah ly gaey aur arz kia) Ay Hmary Rabb! Beshak Maiñ ny apni olaad (Ismaeel a.s) ko (Makkah ki) bay aab-o-geyaah wadi meiñ Tery Hurmat waly Ghr k paas basaa dia hy (yaheeñ Ismaeel a.s k Qadam Mubarak sy Zam Zam ka chashma phoota.Ibrahim ny mzeed arz kia), Ay Hmary Rabb! Ta k wo Namaz qaem rakheñ Pus Tu logoñ k diloñ ko aisa kr dy k wo shoq-o-muhabbat k sath in ki taraf mael rahaiñ (onheñ Bait-ullah ka Hajj muyassar aey) aur onheñ (har tarah k) phalloñ ka rizq ata farma, ta k wo shukr bjaa laty rahaiñ¤
38. (Ibrahim a.s ny mzeed arz kia) Ay Hmary Rabb! Baishak Tu wo (sb kuchh) janta hy jo ham chhupaty heñ aur jo ham zahir krty heñ, aur Allah par koi bhi cheez na zmeen meiñ poshida hy aur na he aasmaan meiñ (makhfi) hy¤
39. (Ismaeel a.s, Hajra a.s k Batan sy thy jb k Sara a.s k koi olaad na the. Ibrahim a.s ny aik aur Farzand ki Dua ki the jo maqbool hui. Sara a.s ki Omar Mubarak 90 saal sy zaed the aur Ibrahim a.s 120 saal k thy jb Sara a.s ko On k Baity Is'haaq a.s ki khush khabri di gai. Ibrahim a.s ny is par shukar ada kia aur arz kia) Sb tareefaiñ Allah he k liye heñ Jis ny Mujhy burhapy meiñ Ismaeel (a.s) aur Is'haaq (a.s 2 Farzand) ata farmaey, baishak Mera Rabb Duaa khoob sun'ny wala hy¤
40. (Ibrahim a.s ny arz kia) Ay Mery Rabb! Mujhy aur Meri Olaad ko Namaz qaem rakhny wala bna dy, Ay Hmary Rabb! Aur Tu Meri Duaa qbool farma¤
41. Ay Hmary Rabb! Mujhy bakhsh dy aur Mery Walidain ko (bakhsh dy. Yahaañ Hazrat Ibrahim a.s k haqiqi Walid Taarakh ki taraf ishara hy, ye Kaafir-o-Mushrik na thy balky Deen-e-Haq par thy. Aazar dar'asal Aap a.s ka chacha tha, os ny Aap a.s ko Aap a.s k Walid ki wafaat k bad pala tha, is liye osy urfan baap kaha gea hy, wo Mushrik tha aur Aap a.s ko os k liye Dua-e-Maghfirat sy rok dia gea tha jb k yahaañ haqiqi Walidain k liye Dua-e-Maghfirat ki ja rahi hy. Ye Dua Allah Ta'aala ko is qadar pasand ai k isy Ommat-e-Muhammadi s.a.w.w Ki Namazoñ meiñ bhi bar-qraar rakh dia gea) aur deegar sb Mominoñ ko bhi (bakhsh dy), Jis Din Hisaab qaem ho ga¤
42. Aur Allah ko on kaamoñ sy har giz bay-khabar na samajhna jo zalim anjaam dy rahy heñ, bs Wo to on (zalimoñ) ko faqat Os Din k liye muhlat dy raha hy Jis meiñ (khof k maary) aankhaiñ phatti reh jaeñ gi¤
43. Wo log (Maidaan-e-Hashar ki taraf) apny sarr oopar othaey dorhty ja rahy hoñ gy is haal meiñ k on ki palkaiñ bhi na jhapakti hoñ gi aur on k dil sakkat sy khaali ho rahy hoñ gy (shiddat-e-hairat o dehshat sy dil seenoñ sy nikal kr galloñ meiñ aa phansaiñ gy, na bahir nikal sakkaiñ na apni jagga wapas ja sakkaiñ gy)¤
44. Aur Aap (s.a.w.w) logoñ ko os Din sy draeñ jb on par azaab aa pohnchy ga to wo log jo zulm krty rahy hoñ gy kahaiñ gy: Ay hmary Rabb! Hammeñ thorhi dair k liye muhlat dy dy (aur dunia meiñ wapas bhaij dy) k ham Tairi daawat qbool kr leñ aur Rasooloñ ki pairvi kr leñ. (on sy kaha jaey ga) k kia tum he log pehly qasmeñ naheeñ khaty rahy k tumheñ kabhi zwaal naheeñ aey ga¤
45. Aur tum (apni baari par) onhi logoñ (jaisy k qom-e-Nooh, Aad aur Samood) k (chhorhy huwy) mehellaat meiñ rehty thy (jinhoñ ny apny apny dor meiñ) apni jaanoñ par zulm kia tha halañky tum par ayaañ ho chuka tha k Ham ny on k sath kia muaamla kia tha (aur tum ny on k manaazil meiñ azaab k aasaar aur nishaan daikhy) aur Ham ny tumhary (fehem k) liye misaaleñ bhi biaan ki theeñ¤
46. Aur onhoñ ny (dolat-o-iqtadaar k nasha meiñ bd-mast ho kr) apni taraf sy barhi fraib-kariaañ keeñ (yahaañ tak k Sarwar-e-Aalam s.a.w.w k qatal krny ya qaid krny ya mulk sy nikaal deny ka iraada kia) jb k Allah k pas on k har fraib ka torh tha, agarchy on ki makkaraana tadbeereñ aisi theeñ k on sy pahaarh bhi okharh jaeñ¤
47. So Allah ko har giz apny Rasooloñ sy wada-khilaafi krny wala na samajhna (Wo Apny Rasool ki nusrat farmaey ga, On k Deen ko ghalib kry ga, On k dushmanoñ ko halaak kry ga), beshak Allah Ghalib, bdlaa leny wala hy¤
48. Jis Din (ye) zmeen dusri zmeen sy baddal di jaey gi aur jumla aasmaan bhi baddal diye jaeñ gy aur sb log Allah k roo-broo haazir hoñ gy Jo Aik hy sb par Ghalib hy¤
49. Aur os Din Aap mujrimoñ ko zanjeeroñ meiñ jakrhy huwy daikheñ gy¤
50. On k libaas gandhak (ya aisy roghan) k hoñ gy (jo aag ko khoob bharhkaata hy) aur on k chehroñ ko aag dhaañmp rahi ho gi¤
51. Ta k Allah har os shakhs ko on (aamaal) ka bdla dy dy jo os ny kamaa rakhy heñ. Beshak Allah hisab meiñ jaldi farmany wala hy¤
52. Ye (Quran) logoñ k liye kaamilan paighaam ka pohncha dena hy, ta k onheñ is k zarriye draaya jaey aur ye k wo khoob jaan leñ k bs Wohi (Allah) Mabood-e-Yakta hy aur ye k danish-mand log nasihat hasil kreñ¤ <LAST AAYAT OF SURAH IBRAHIM>

Surah IBRAHIM (By tilawat 14th and by Reveal 72nd Surah of Holy Quran) ka tarjuma

ALLAH k fazal-o-karam aur aap ki duaoñ sy aaj mukammal ho gea. Surah IBRAHIM Makki Surah hy.

Surah IBRAHIM ka tarjuma 28 din (August 27 to September 23, 2012) meiñ mukammal huwa.

SURAH IBRAHIM ki tafseel ye hy.

Ruku : 7

Para  : 13 (Ruku 13 to 19)

Aayaat    :    52

Kalimaat :  861

Huroof    :  3434