Para 17
Surah 21Surah Al-Añmbiyaa
ALLAH K NAAM SY SHUROO JO BOHUT MEHRBAN NEHAYAT REHEM
FARMANY WALA HY
1.
Logoñ k liye on k hisaab ka waqt (yani
Roz-e-Qeyaamat) qreeb aa pohncha (q k jitny din guzrty jaty heñ aany wala din
qreeb hota jata hy) magar wo ghaflat meiñ (parhy, ta'at sy) mooñh phairy huwy
heñ (ye Aayat munkreen-e-ba'as k haq meiñ naazal hui jo mrny k bad zinda kiye
jany ko naheeñ maanty thy)¤
2.
On k paas on k Rabb ki janib sy jab bhi koi
nai naseehat aati hy to wo usy yooñ (bay-parwahi sy) sunty heñ goya wo khail
kood meiñ laggy huwy heñ (na ibrat haasil krty heñ na aany waly waqt k liye
kuchh tayyari krty heñ)¤
3.
In
(Kaafiroñ) k dil ghaafil ho chukky heñ, aur (ye) zaalim log (Aap s.a.w.w k
khilaaf) aahista aahista sar-goshiyañ krty heñ k Ye to mehez tumhary he jaisa
aik bashar hy (ye Kufr ka usool tha k jab ye bat logoñ k zehen nasheen kr di
jaey gi k Muhammad s.a.w.w tum jaisy bashar heñ to phir koi On par Emaan naheeñ
laey ga. Kuffaar ye bat kehty waqt jaanty thy k on ki bat kisi k dil meiñ jammy
gi naheeñ q k log rat din Mojzaat daikhty heñ wo kis tarrah baavar kr sakkaiñ
gy k Hazoor s.a.w.w hmari tarrah bashar heñ is liye onhoñ ny Mojzaat ko jadoo
btaya aur kaha), kia phir (bhi) tum (Is Nabi k) jadoo k paas jaty ho Haalañky
tum daikh rahy ho¤
4.
(Nabi-e-Muazzam s.a.w.w ny) farmaya k Mera
Rabb aasmaan aur zmeen meiñ kehi jany wali (har) bat ko jaanta hy aur Wo khoob
sun'ny wala khoob jan'ny wala hy¤
5.
(Kuffaar ny Quran ka inkaar kia) Balky
(zaalimoñ ny yahañ tak) kaha k Ye (Quran) praishaan khwaaboñ (meiñ daikhi hui
baateñ) heñ (jinheñ Nabi s.a.w.w Wahi samajh gaey Kuffaar ny ye keh kr socha k
ye bat chispaañ naheeñ ho sakky gi to ab is ko chhorh kr kehny laggy) balky Is
(Rasool s.a.w.w) ny isy (khud he) gharh lia hy (ye keh kr kheyaal huwa k log
kahaiñ gy k agar ye Klaam Nabi s.a.w.w ka bnaya huwa hy to tum aisa klaam q
naheeñ bna sakty. So phir kehny laggy) balky (ye k) Wo shaaer hy (agar Ye sacha
hy) to Ye (bhi) hmary paas koi nishani ly aey jaisa k agly (Rasool nishaniyoñ k
sath) bhaijy gaey thy¤
6.
(Is k radd-o-jwaab meiñ Allah farmata hy) In
sy pehly Ham ny jis bhi basti ko hlaak kia wo (inhi nishaniyoñ par) Emaan
naheeñ lai the to kia ye Emaan ly aeñ gy (jo on sy zeyaada sarkash heñ)¤
7.
Aur (Ay Habib-e-Mukarram s.a.w.w) Ham ny Aap
(s.a.w.w) sy pehly (bhi) Mardoñ ko he (Rasool bna kr) bhaija tha (so On ka
ba-soorat-e-bashri zahoor farmana Nabuwwat k mnafi naheeñ) Ham On ki tarraf
Wahi bhaija krty thy (Logo!) Tum Ehl-e-Zikr sy poochh lia kro agar tum (khud)
na jaanty ho (so na-waaqif ko chahye k Aalim sy swaal kry aur us k hukam par
aamil ho. Is Aayat sy taqleed ka wajoob saabit hota hy)¤
8.
Aur Ham ny On (Añmbiyaa a.s) ko aisy jism
wala naheeñ bnaya tha k Wo khana na khaty hoñ (yani Wo khaty bhi thy peety bhi
thy) aur na he Wo (dunia meiñ ba-hayaat-e-zaahiri) hamesha rehny waly thy¤
9.
Phir Ham ny Onheñ Apna Wa'da sacha kr
dikhaya (k Wo nijaat paeñ gy aur On k dushman hlaakat) phir Ham ny Onheñ aur
jisy Ham ny chaha nijaat bakhshi aur Ham ny hadd sy barh jany waloñ ko hlaak kr
dala¤
10.
(Ay groh-e-Quraish) Beshak Ham ny tumhari
tarraf aisi Kitab naazal farmai hy Jis meiñ tumhari naseehat (ka saamaan) hy,
kia tum aqqal naheeñ rakhty (k Emaan la kr is izzat-o-kraamat aur sa'aadat ko
haasil kro)¤
11.
Aur Ham ny kitni he bastiyoñ ko
tabaah-o-barbaad kr dala jo zaalim (yani Kaafir) then aur on k baad Ham ny aur
qomoñ ko paida farma dia¤
12.
Phir jab onhoñ ny (yani zaalimoñ ny) Hmary
azaab (ki aamad) ko mehsoos kia to wo wahañ sy taizi k sath bhaagny laggy
(Yaman ki aik basti k bashindoñ ny apny Nabi ki takzeeb ki aur On ko qattal kia
to Allah ny on par Bukht-e-Nassar ko musallat kia. Wo onheñ qattal kr daita ya
griftaar kr laita. So wo log basti chhorh kr bhaagy)¤
13.
(On sy kaha gea) Tum jaldi matt bhago aur
usi jagga wapas lot jao jis meiñ tumheñ aasaeshaiñ di gai then aur apni
(pur'ta'ayyush) rehaesh-gahoñ ki tarraf (pallat jao) shaed tum sy baaz-purs ki
jaey (k tum par kia guzri)¤
14.
(Azaab daikhny k bad) Wo kehny laggy: Haaey
shomi-e-qismat! Beshak ham zaalim thy¤
15.
So hamesha on ki yehi far'yaad rahi (q k ab
aitraaf-e-gunah on k kaam na aaya) yahañ tak k Ham ny on ko katti hui khaiti (aur)
bhujji hui aag (k dhair) ki tarrah bna dia¤
16.
Aur Ham ny aasmaan aur zmeen ko aur jo kuchh
in k darmeyaan hy khail tmashy k tor par (bay-kaar) naheeñ bnaya (k on sy kuchh
faeda na ho balky is meiñ Hmari Hikmateñ heñ k Hmary bndy in sy Hmari
Qudrat-o-Hikmat par istadlaal kreñ aur onheñ Hmary Osaaf-o-Kamaal ki maarfat
ho)¤
17.
Agar Ham koi khail tmasha ikhteyaar krna
chahty (misl zann-o-farzand k jaisa k Nasaara kehty heñ aur Hmary liye bibi aur
baitiyaañ btaty heñ.Agar ye Hmary haq meiñ mumkin hota) to usy apni he tarraf
sy ikhteyaar kr laity agar Ham (aisa) krny waly hoty¤
18.
Balky Ham Haq sy baatil par poori quwwat k
sath chot lgaty heñ so Haq usy kuchal daita hy pus wo (baatil) hlaak ho jata
hy, aur (ay Kuffaar) tumhary liye on baatoñ k baes tbahi hy jo tum
(Shan-e-Elahi meiñ) beyaan krty ho (k Us k liye bivi-o-bacha thehraty ho)¤
19.
Aur
jo koi aasmanoñ aur zmeen meiñ hy Usi ka (bnda-o-mamlook) hy (to koi Us ki
olaad kaisy ho sakta hy mamlook hony aur olaad hony meiñ mnafaat hy), aur jo
(Frishty) Us ki qurbat meiñ (rehty) heñ wo na to Us ki ibaadat sy takabbar krty
heñ aur na wo (Us ki ta'at bjaa laty huwy) thakty heñ¤
20.
Wo raat din (Us ki) Tasbeeh krty rehty heñ aur
ma'mooli sa waqfa bhi naheeñ krty (Mlaeka k liye Tasbeeh aisy hy jaisy k Banni-Aadam
k liye saañs laina)¤
21.
Kia
on (Kaafiroñ) ny zmeen (ki cheezoñ misl sony, chaañdi, pathar waghaira) meiñ sy
aisy ma'bood bna liye heñ jo (murdoñ ko) zinda kr k utha sakty heñ? (aisa to
naheeñ hy aur na ye ho sakta hy k khud bay-jaan ho wo kisi ko jaan dy sakky to
phir us ko Ma'bood thehrana kitna khulla baatil hy. Ma'bood wohi hy jo har
mumkin par qaadir ho, jo qaadir naheeñ wo ma'bood kaisa)¤
22.
Agar in donoñ (zmeen-o-aasmaan) meiñ Allah k
siwa aur (bhi) ma'bood hoty to ye donoñ tbaah ho jaty pus Allah Jo Arsh ka
Maalik hy on (baatoñ) sy Paak hy jo ye (Mushrik) beyaan krty heñ (k Us k liye
ulaad-o-shreek thehraty heñ)¤
23.
Us sy is ki baaz-purs naheeñ ki ja sakti Wo
jo kuchh bhi krta hy (q k koi Us ka haakim naheeñ jo Us sy poochh sakky), aur
on sy (har kaam ki) baaz-purs ki jaey gi (q k sb Us k bndy aur mamlook heñ)¤
24.
Kia
in (Kaafiroñ) ny Usy chhorh kr aur ma'bood bna liye heñ? (Ay Habib s.a.w.w Aap
in Mushrikoñ sy) Farma deejiye: (Tum apny is baatil da'wa par) Apni dleel lao (aur
hujjat qaem kro, magar na koi dleel-e-aqli la sakty ho na koi dleel-e-naqli. Q
k tmaam Kutab-e-Smawiya meiñ Allah ki Toheed ka beyaan hy), Ye (Quran) on logoñ
ka Zikr hy jo Mery sath heñ (yani Aap s.a.w.w ki Ummat ka zikr k us ko ta'at
par kia swaab mily ga aur ma'siyyat par kia azaab) aur on ka (bhi) Zikr hy jo
Mujh sy pehly thy (yani pehly Añmbiyaa a.s ki Ummateñ), balky on meiñ sy aksar
log haq ko naheeñ jaanty is liye wo is sy roo-gardani kiye huwy heñ¤
25.
Aur Ham ny Aap (s.a.w.w) sy pehly koi Rasool
naheeñ bhaija magar Ham Us ki tarraf yehi Wahi krty rahy k Mery siwa koi
Ma'bood naheeñ pus tum Meri (he) ibaadat kia kro¤
26.
Ye log kehty heñ k (Khuda-e) Rehman ny (Frishtoñ
ko Apni) ulaad bna rakha hy Wo Paak hy (is sy k Us ki ulaad ho), balky (jin
Frishtoñ ko ye Us ki ulaad samajhty heñ) wo (Allah k) Muazzaz Bndy heñ¤
27.
Wo kisi baat (k krny) meiñ Us sy sabqat
naheeñ krty aur wo Usi k Amr ki ta'meel krty rehty heñ¤
28.
Wo (Allah) on cheezoñ ko jaanta hy jo on k
saamny heñ aur jo on k peechhy heñ (yani jo kuchh onhoñ ny kia aur jo kuchh wo
aaenda kreñ gy) aur wo (Us k hazoor) sifaarish bhi naheeñ krty magar us k liye
(krty heñ) jis sy Wo khush ho gea ho (yani jo Toheed ka qael ho) aur wo Us ki Haibat-o-Jalaal
sy khaef rehty heñ¤
29.
Aur on meiñ sy kon hy jo keh dy k maiñ Us
(Allah) k siwa ma'bood hooñ (ye kehny wala sirf Iblees he hy) so Ham usi ko
Dozakh ki saza deñ gy, isi tarrah Ham zaalimoñ ko saza dia krty heñ¤
30.
Aur kia Kaafir logoñ ny naheeñ daikha k jumla
aasmani kaenaat aur zmeen (sb) aik ikai ki shakkal meiñ jurhy huwy thy pus Ham
ny on ko phaarh kr juda kr dia, aur Ham ny (zmeen par) paikar-e-hayaat (ki
zindagi) ki namood pani sy ki (yani har jaandaar pani sy paida kia ya pani ko
jaandaroñ ki hayaat ka sabbab kia ya is pani sy muraad nutfa hy), to kia wo
(Quran k beyaan-krda in haqaeq sy aagah ho kr bhi) Emaan naheeñ laty¤
31.
Aur Ham ny zmeen meiñ mazboot pahaarh bna
diye ta k aisa na ho k kaheeñ wo (apny madaar meiñ harkat krty huwy) onheñ ly
kr kaañmpny laggy aur Ham ny is (zmeen) meiñ kushada raasty bnaey ta k log
(saffar k doraan mukhtlif manziloñ tak pohnchny k liye) raah pa sakkaiñ¤
32.
Aur Ham ny smaa (yani zmeen k baalai kurroñ)
ko mehfooz chhat bnaya (ta k ehl-e-zmeen ko khla sy aany wali muhlik quwwatoñ
aur jarehaana lehroñ k muzar asraat sy bchaeñ) aur wo (yani Kuffaar) in (smaavi
tabqaat ki) nishaniyoñ sy roo-gardaañ heñ (yani sooraj, chaand, sitaroñ ki
harkaat ki kaifiyyat aur in k tuloo'-o-ghuroob par ghor naheeñ krty aur in
dlael sy faeda naheeñ uthaty)¤
33.
Aur Wohi
(Allah) hy Jis ny raat aur din ko paida kia aur sooraj aur chaand ko (bhi), tmaam
(aasmani kurry) apny apny madaar k andar taizi sy tairty chally jaty heñ¤
34.
Aur Ham ny Aap (s.a.w.w) sy pehly kisi
insaan ko (dunia ki zaahiri zindagi meiñ) bqaaey dwaam naheeñ bakhshi (Aap
s.a.w.w k dushman kehty thy k ham hwadis-e-zmana ka intzaar kr rahy heñ, anqreeb
aisa zmana aany wala hy k Aap s.a.w.w ki wafaat ho jaey gi. Is par farmaya gea
k dushmanaan-e-Rasool s.a.w.w k liye ye koi khushi ki bat naheeñ, Ham ny dunia
meiñ kisi aadmi k liye hamaishgi naheeñ rakhi), to kia agar Aap (s.a.w.w yahañ sy)
intqaal farma jaeñ to ye log hamesha rehny waly heñ (aur ye mot k panjy sy bach
jaeñ gy? Jab aisa naheeñ hy to phir khush kis bat par hoty heñ)¤
35.
(Haqiqat ye hy k) Har jaan ko mot ka mazza
chakhna hy, aur Ham tumheñ burai aur bhlai meiñ aazmaesh k liye mubtla krty heñ
(ta k zaahir ho jaey k sabr-o-shukr meiñ kis darjy par ho), aur tum Hmari he
tarraf paltaey jao gy¤
36.
Aur jab Kaafir log Aap (s.a.w.w) ko daikhty
heñ to Aap (s.a.w.w) sy mehez tamaskhar he krny lagty heñ (Hazoor s.a.w.w Abu-Jehel
k qreeb sy guzry to wo Aap s.a.w.w ko daikh kr hañsa aur kehny lagga k Ye
Banni-Abd Munaaf k Nabi heñ. Aur ye Kaafir aapas meiñ aik dusry sy kehty heñ) Kia
Yehi hy Wo Shakhs Jo tumhary ma'boodoñ ka (radd-o-inkaar k sath) zikr krta hy aur
wo (Kuffaar) khud (Khuda-e) Rehman k Zikr sy inkari heñ (kehty heñ k ham Rehman
ko jaanty he naheeñ. Is jehel meiñ mubtla hony k bawjood Aap s.a.w.w k sath
tamaskhar krty heñ aur naheeñ daikhty k hañsi k qaabil khud on ka apna haal
hy)¤
37.
Insan (fitratan) jald-bazi meiñ sy paida kia
gea hy, Maiñ tumheñ jald he Apni Nishaniyañ dikhaoñ ga pus tum jaldi ka mutalba
na kro (Chunachy Roz-e-Badr wo manzar on ki nazzar k saamny aa gea)¤
38.
Aur wo (Kuffaar) kehty heñ: Ye wada
(e-azaab) kab (poora) ho ga agar Tum sachy ho¤
39.
Agar Kaafir log wo waqt jaan laity jab k wo
(Dozakh ki) aag ko na apny chehroñ sy rok sakkaiñ gy aur na apni pushtoñ sy aur
na he on ki maddad ki jaey gi (to phir azaab tallab krny meiñ jaldi ka shor na
krty)¤
40.
Balky (Qeyaamat) onheñ achanak aa pohnchy gi
to onheñ bd-hwaas kr dy gi so wo na to usy lota deny ki taaqat rakhty hoñ gy aur
na he onheñ (tobah-o-maazrat ki) muhlat di jaey gi¤
41.
Aur beshak Aap (s.a.w.w) sy pehly bhi
Rasooloñ k sath mzaaq kia gea so on logoñ meiñ sy onheñ jo tamaskhar krty thy usi
(azaab) ny ghair lia jis ka wo mzaaq urhaya krty thy (aur wo apny istehza k
azaab meiñ griftaar huwy. Is meiñ Aap s.a.w.w ki tasalli farmai gai k Aap
s.a.w.w k sath istehza krny waloñ ka bhi yehi injaam hona hy)¤
42.
Farma
deejiye: Shabb-o-roz (Khuda-e) Rehman (k azaab) sy tumhari hifaazat-o-nigehbani
kon kr sakta hy, balky wo apny (Usi) Rabb k zikr sy guraizaañ hy (so onheñ
azaab-e-Elahi ka kia khof ho aur wo apni hifaazat krny waly ko kia pehchanaiñ)¤
43.
Kia Hmary siwa on k kuchh aur ma'bood heñ jo
onheñ (Hmary azaab sy) bcha sakkaiñ, (aisa to naheeñ hy aur agar wo apny buttoñ
ki nisbat ye aitqaad rakhty heñ to on buttoñ ka haal ye hy k) wo to khud apni
he maddad par qudrat naheeñ rakhty aur na Hmari tarraf sy onheñ koi taeed-o-rafaaqat
muyassar ho gi¤
44.
Balky Ham ny on (Kuffaar) ko aur on k aaba-o-ajdaad
ko (frakhi-e-aish sy) behramand farmaya tha (aur dunia meiñ onheñ
naimat-o-muhlat di) yahañ tak k on ki umraiñ bhi draaz hoti gaeñ (aur wo is sy
aur maghroor huwy aur onhoñ ny gumaan kia k wo shaed aisy he rahaiñ gy), to kia
wo naheeñ daikhty k Ham (ab Islami Fatoohaat k zarriye on k zair-e-tasallat)
alaaqoñ ko tmaam atraaf sy ghtaaty chally ja rahy heñ (roz-baroz musalmanoñ ko
on par tasallat dy rahy heñ aur aik shehr k bad dusra shehr fattah hota challa
aa raha hy. Kia Mushrikeen jo azaab tallab krny meiñ jaldi krty heñ is ko
naheeñ daikhty aur ibrat haasil naheeñ krty), to kia wo (Kuffaar ab) ghalba
pany waly heñ (jin k qabza sy zmeen nikalti ja rahi hy)?¤
45.
Farma deejiye: Maiñ to tumheñ sirf Wahi k
zarriye he draata hooñ (aur azaab-e-Elahi ka Usi ki tarraf sy khof dilata
hooñ), aur behry pukaar ko naheeñ suna krty jab bhi onheñ draaya jaey (yani
Kaafir hadaayat krny waly aur khof dilany waly k klaam sy naffa' na uthany meiñ
behry ki tarrah heñ)¤
46.
Agar waqe'atan onheñ Aap k Rabb ki tarraf sy
thorha sa azaab (bhi) chhoo jaey to wo zaroor kehny laggeñ gy: Haaey hmari
bd-qismati! Beshak ham he zaalim thy (Nabi ki baat par kaan na rakha aur on par
Emaan na laey)¤
47.
Aur
Ham Qeyaamat k din addal-o-insaaf k trazoo rakh deñ gy so kisi jaan par koi
zulm na kia jaey ga, aur agar (kisi ka ammal) raai k dana k brabar bhi ho ga (to)
Ham usy (bhi) haazir kr deñ gy, aur Ham hisaab krny ko kaafi heñ¤
48.
Aur beshak Ham ny Moosa (a.s) aur Haroon
(a.s) ko (Haq-o-baatil meiñ) farq krny wali aur (sraapa) roshni aur par'haizgaroñ
k liye naseehat (par mabni Kitab Toraat) ataa farmai¤
49.
Jo log apny Rabb sy na-deeda darty heñ aur
jo Qeyaamat (ki holnakiyoñ) sy khaef rehty heñ¤
50.
Ye (Quran) Barkat wala Zikr hy Jisy Ham ny
(Apny Habib s.a.w.w par) naazal farmaya hy, kia tum is sy inkaar krny waly ho¤
51.
Aur beshak Ham ny pehly sy he Ibrahim (a.s)
ko On k (martba k mutabiq) fehm-o-hadaayat dy rakhi the aur Ham On (ki
ista'daad-o-ehliyyat) ko khoob jaan'ny waly thy¤
52.
Jab Onhoñ ny apny baap (yani chacha) aur
apni qom sy farmaya: Ye kaisi moortiyañ heñ jin (ki purastish) par tum jammy
baithy ho¤
53.
Wo boly: Ham ny apny baap-dada ko inhi ki
purastish krty paya tha (so ham bhi on ki iqtda meiñ waisa he krny laggy)¤
54.
(Ibrahim a.s ny) farmaya: Beshak tum aur
tumhary baap-dada (sb) sreeh gumrahi meiñ thy¤
55.
Wo boly: Kia (sirf) tum he haq laey ho ya tum
(mehez) tmasha-garroñ meiñ sy ho (wo apny treeqa ka inkaar krna bohut barhi
baat jaanty thy is liye onhoñ ny Ibrahim a.s sy ye kaha k kia Aap haqiqat meiñ
ye baat kr rahy heñ ya batreeq-e-khail k farma rahy heñ)¤
56.
(Ibrahim a.s ny apni qom sy) farmaya: (Maiñ
tmasha-garroñ meiñ sy naheeñ) Balky tumhara Rabb aasmanoñ aur zmeen ka Rabb hy Jis
ny in (sb) ko paida farmaya aur Maiñ is (baat) par gwahi deny waloñ meiñ sy
hooñ¤
57.
(Us qom ka aik salaana maila hota tha, jañggal
meiñ ja kr shaam tak lahv-o-la'ab meiñ mashghool rehty, waapsi par but-khana
meiñ ja kr buttoñ ki pooja krty. Ibrahim a.s ny on ki aik jama'at sy buttoñ k
mutalliq munazira kia to on logoñ ny kaha k kal hmari eid hy Aap wahañ ja kr
daikheñ k hmary deen meiñ kia bahaar hy. Aap ny jany sy inkaar kr dia Wo log
rawana ho gaey. Jab on k baqi kmzor log jo aahista aahista ja rahy thy guzry to
Aap ny farmaya) Aur Allah ki Qassam! Maiñ tumhary buttoñ k sath zaroor aik
tadbeer ammal meiñ laoñ ga is k baad k jab tum peethh phair kr (maily ko)
pallat jao gy¤
58.
Phir Ibrahim (a.s) ny on (buttoñ) ko tuk'rhy
tuk'rhy kr dala siwaey barhy (butt) k (usy chhorh dia aur basola us k kaañdhy
par rakh dia) ta k wo log us (barhy butt) ki tarraf rujoo' kreñ (aur us sy
poochheñ k chhoty buttoñ ko kis ny torha aur basola teri gardan par kaisy aaya.
Jawaab na milny par onheñ us butt ka ijz zaahir ho aur onheñ hosh aey k aisy
aajiz Khuda naheeñ ho sakty)¤
59.
(Jab qom k log shaam ko waapas huwy to butt
tooty parhy thy) Wo kehny laggy: Hmary ma'boodoñ ka ye haal kis ny kia hy? Beshak
wo zaroor zaalimoñ meiñ sy hy¤
60.
(Kuchh) log boly: Ham ny aik Nojawaan ka
sunna hy jo in ka zikr (inkaar-o-tanqeed sy) krta hy Usy Ibrahim (a.s) kaha
jata hy¤
61.
(Ye khabbar Namrood aur us k umraa tak
pohnchi to) Wo boly: Usy logoñ k saamny ly ao ta k wo (Usy) daikh leñ (aur
shahaadat qaem ho)¤
62.
(Jab
Ibrahim a.s aey to) wo (log) kehny laggy: Kia Tum ny hmary ma'boodoñ k sath ye
haal kia hy ay Ibrahim (a.s)?¤
63.
Aap (a.s) ny (on k sawaal ka to kuchh jawaab
na dia aur shaan-e-munazirana sy ta'reez k tor par aik ajeeb-o-ghreeb hujjat
qaem ki aur) farmaya: Balky ye (kaam) on k is barhy (butt) ny (ghussy meiñ) kia
ho ga (k tum is k chhoty buttoñ ko poojty ho. Is k kandhy par basola hony sy
yehi qeyaas kia ja sakta hy. Mujh sy kia poochhty ho, poochhna hy) to on
(buttoñ) sy he poochho agar wo bol sakty heñ (wo khud btaeñ k on k sath ye kis
ny kia. Mudda'aa ye tha k qom ghor kry k jo bol naheeñ sakta wo Khuda kaisy ho
sakta hy)¤
64.
Phir
wo (log) apni he (sochoñ ki) tarraf pallat gaey to (khud sy) kehny laggy: Beshak
tum khud he (in majboor-o-bay-bas buttoñ ki pooja kr k) zaalim (ho gaey) ho¤
65.
Phir wo (log) apny sarroñ k bal oundhy kr
diye gaey (yani on ki aqleñ oundhi ho gaeñ aur kalma-e-haq kehny k baad phir on
ki bd-bakhti on k sarroñ par sawaar hui aur wo Kufr ki tarraf palty aur kehny
laggy) Beshak (ay Ibrahim a.s) Tum khud he jaanty ho k ye (butt) to bolty
naheeñ heñ (to ham in sy kaisy poochheñ)¤
66.
(Ibrahim a.s ny) farmaya: Phir kia tum Allah
ko chhorh kr in (moortiyoñ) ko poojty ho jo na tumheñ kuchh naffa' dy sakti heñ
aur na tumheñ nuqsaan pohncha sakti heñ¤
67.
Tuff hy tum par (bhi) aur in (buttoñ) par
(bhi) jinheñ tum Allah k siwa poojty ho, kia tum aqqal naheeñ rakhty (k ye baat
samajh sakko)¤
68.
(Jab Kuffaar jwaab sy aajiz aa gaey aur
hujjat tamaam ho gai to) Wo boly: Is (Ibrahim a.s) ko jalaa do aur apny
(tbaah-haal) ma'boodoñ ki maddad kro agar tum (kuchh) krny waly ho¤
69.
(Namrood
aur us ki qom Ibrahim a.s ko jalaa daalny par muttafiq ho gai. Onhoñ ny qar'ya
Kosaa meiñ aik imaarat bnai. Aik maheena tak qissam qissam ki lak'rhiyañ jamma keen
aur aik azeem aag jalaai jis ki tappish sy hawa meiñ parwaaz krny waly prindy
jall jaty thy. Phir Aap a.s ko baandh kr aik manjneeq k zarriye us aag meiñ
phaiñka) Ham ny farmaya: Ay aag! Tu Ibrahim (a.s) par thandi aur sraapa slaamti
ho ja (to aag ny siwa Aap a.s ki bandish k aur kuchh na jalaya, aag ki garmi
zael ho gai aur roshni baqi rahi)¤
70.
Aur onhoñ ny Ibrahim (a.s) k sath burri
chaal ka irada kia tha magar Ham ny onheñ burri tarrah nakaam kr dia (k on ki
muraad poori na hui. Aur Allah ny on par machar bhaijy jo on k gosht kha gaey
aur khoon pee gaey. Aik machar Namrood k dmaagh meiñ ghus gea aur us ki hlaakat
ka sabbab bna)¤
71.
Aur
Ham Ibrahim (a.s) ko aur Loot (a.s) ko (Jo Aap a.s k bhateejy yani Aap a.s k
Bhai Haaraan k Baity thy, Namrood aur us ki qom sy) bcha kr (Iraq sy) us
sar-zmeen (e-Shaam) ki tarraf ly gaey jis meiñ Ham ny jahaan waloñ k liye
Barkataiñ rakhi heñ (k yahañ kasrat sy Añmbiyaa a.s huwy aur ashjaar-o-smaar ki
bhi kasrat hy. Ibrahim a.s ny Fallasteen meiñ aur Loot a.s ny Mo'taffika meiñ
nazool farmaya)¤
72.
Aur Ham ny Onheñ (yani Ibrahim a.s ko
Farzand) Is'haaq (a.s) bakhsha aur (Pota) Yaqoob (a.s On ki Duaa sy) izaafi
bakhsha, aur Ham ny On sb ko Saaleh bnaya tha¤
73.
Aur Ham ny Onheñ (insaniyat ka) Paishwa
bnaya Wo (logoñ ko) Hmary Hukam sy Hadaayat krty thy aur Ham ny On ki tarraf
Aamaal-e-Khair aur Namaz qaem krny aur Zakaat adaa krny (k Ahkaam) ki Wahi
bhaiji, aur Wo sb Hmary Ibaadat-Guzaar thy¤
74.
Aur
Loot (a.s) ko (bhi) Ham ny Hikmat aur ilm sy nawaaza tha aur Ham ny Onheñ us
basti sy nijaat di jahañ k log gandy kaam kia krty thy (us basti ka naam Sadoom
tha). Beshak wo bohut he burri (aur) bd-kirdaar qom the¤
75.
Aur Ham ny Loot (a.s) ko Apny
Hareem-e-Rehmat meiñ daakhil farma lia. Beshak Wo Saaliheen meiñ sy thy¤
76.
Aur Nooh (a.s ko bhi yaad kreñ) jab Onheñ ny
in (Añmbiyaa a.s yani Loot a.s aur Ibrahim a.s) sy pehly (Hammeñ) pukaara tha so
Ham ny On ki Duaa qabool farmai pus Ham ny On ko aur On k Ghr waloñ ko barhy shaded
gham-o-andoh (yani Tofaan aur takzeeb-e-ehl-tugh'yaan) sy nijaat bakhshi¤
77.
Aur Ham ny us qom (k aziyyat-naak mahool)
meiñ On ki maddad farmai jo Hmari Aayatoñ ko jhutlaty thy. Beshak wo (bhi)
bohut burri qom the so Ham ny on sb ko gharq kr dia¤
78.
Aur Da'ood (a.s) aur Suleman (a.s ka qissa
bhi yaad kreñ) jab Wo Donoñ khaiti (k aik muqadma) meiñ faisla krny laggy jab
aik qom ki bakriyaañ us meiñ raat k waqt baghair charwaahy k ghus gai then (aur
us khaiti ko tbaah kr dia tha. Bakkriyoñ ki qeemat khaiti k nuqsaan k braabar
the) aur Ham On k faisla ka mushaaheda farma rahy thy (jab Da'ood a.s ny
tajveez di k bakriyaañ khaiti waly ko dy di jaeñ jab k Suleman a.s ny 11 saal
ki umar meiñ tajveez paish ki k bakri wala kaasht kr k khaiti pehli haalat ko
pohnchaey us waqt tak khaiti wala bakriyoñ k dhood waghaira sy naffa' uthaey. Phir
khaiti waly ko us ki khaiti waapas dy di jaey aur bakri waly ko us ki
bakriyaañ. Da'ood a.s ny ye tajveez qabool kr li. Sharee'at-e-Muhammadi meiñ
hukam ye hy k chraany wala sath na ho to nuqsaan ka zmaan laazim naheeñ)¤
79.
Chunachy
Ham he ny Suleman (a.s) ko (khaiti ka) wo (faisla krny ka treeqa) sikhaya tha (Da'ood
a.s ny jo faisla kia tha wo us masla ka hukam tha aur Suleman a.s ny jo tajveez
farmai wo soorat-e-sullah the. Ye donoñ Hukam ijtehaadi thy aur us Sharee'at k
mutabiq thy) aur Ham ny On sb ko Hikmat aur ilm sy nawaaza tha aur Ham ny
pahaarhoñ aur prindoñ (tak) ko Da'ood (a.s) k (Hukam k) sath paaband kr dia
tha. Wo (sb On k sath mil kr) Tasbeeh parhty thy, aur Ham he (ye sb kuchh) krny
waly thy¤
80.
Aur Ham ny Da'ood (a.s) ko tumhary liye
zirra bnany ka fun sikhaya tha ta k wo tumhari larhaai meiñ tumheñ zarrar sy
bchaey (sb sy pehly zirra bnany waly Da'ood a.s heñ), to kia tum shukkar-guzaar
ho?¤
81.
ALLAH
K NAAM SY SHUROO JO BOHUT MEHRBAN NEHAYAT REHEM FARMANY WALA HY. Aur (Ham ny)
Suleman (a.s) k liye taiz hawaa ko (musakhar kr dia) jo On k hukam sy (jumla
atraaf-o-aknaaf sy) us sar-zmeen (e-Shaam) ki tarraf challa krti the (jo Aap
a.s ka maskan tha aur) jis meiñ Ham ny Barkataiñ rakhi heñ, aur Ham har cheez
ko (khoob) jaan'ny waly heñ¤
82.
Aur kuchh Shetan (deo'oñ aur jinnoñ) ko bhi
(Suleman a.s k taaby kr dia tha) jo On k liye (dar'ya meiñ) ghoty lgaty thy (aur
samundar ki teh sy Aap a.s k liye jawaaher nikaal kr laty) aur is k siwa (On k
hukam par) deegar khidmaat bhi anjaam daity thy (imaarteñ, mehel, bartan,
sheeshy ki cheezeñ waghaira bnaaty) aur Ham he on (deo'oñ) k nigehbaan thy (k
wo Aap a.s k hukam sy baahir na hoñ)¤
83.
Aur
Ayyub (a.s ka qissa yaad kreñ) jab Onhoñ ny Apny Rabb ko pukaara (Aap Is'haq
a.s ki olaad meiñ sy heñ. Allah ny Aap ko husn-e-soorat, kasrat-e-olaad aur
kasrat-e-amwaal sy nawaaza. Phir Allah ny Aap ko ibtlaa meiñ dala aur Aap k
Farzand-o-olaad mkaan k girny sy dabb kr jaañ-bahaq huwy. Hazaar-ha bakriyaañ
aur ooñt marr gaey. Khaitiyañ aur baghaat br-baad ho gaey, kuchh baqi na raha. Aur
jab Aap ko in cheezoñ k halaak aur zaya hony ki khabbar di jati to Aap
Hamd-e-Elahi bjaa laty aur farmaty: Mera kia hy, Jis ka tha Us ny ly lia. Phir
Aap bimaar huwy, tmaam Jism meiñ aably parhy. Sb ny sath chhorh dia bajuz Aap
ki Bibi Sahiba k. Kai saal guzzar gaey phir koi aisa sabbab paish aaya k Aap ny
Bargaah-e-Elahi meiñ Duaa ki) k Mujhy takleef chhoo rahi hy aur Tu sb Rehem
krny waloñ sy barh kr Mehrban hy¤
84.
(Ayyub a.s ny Duaa maañgi) To Ham ny On ki
Duaa qabool farma li aur Onheñ jo takleef (pohnch rahi) the so Ham ny usy door
kr dia (Ayyub a.s ko Hukam huwa k zmeen meiñ Paoñ maariye, Paoñ mara to aik
chashma nikla. Bahukm-e-Elahi us sy ghussal kia to zaahir baddan ki tmaam
bimariyañ door ho gaeeñ. 40 qaddam chalny k baad phir bahukm-e-Elahi zmeen meiñ
Paoñ mara, us sy bhi aik chashma nikla jis ka pani nehaayat sard tha, wo piya
to baatin ki tmaam bimariyañ door ho gaeeñ) aur Ham ny Onheñ Ehl-o-Ayaal (bhi)
ataa farmaey (Aap ki olaad ko zinda farma dia) aur on k sath utny he aur (ataa
farma diye. Aap ki Bibi Sahiba ko dobara jawaani ataa farmai aur On ko kaseer
olaad ataa farmai) ye Hmari tarraf sy Khaas Rehmat aur ibaadat-guzaaroñ k liye
Naseehat hy (k Allah sabr-o-shukr ka ajjar kaisy daita hy)¤
85.
Aur
Ismaeel (a.s) aur Idrees (a.s) aur Zulkifl (a.s ko bhi yaad farmaeñ), Ye sb
Saabir log thy (k mehnatoñ, blaaoñ aur ibaadatoñ ki mushaqqatoñ par sabr kia krty thy)¤
86.
Aur Ham ny Onheñ Apny (Daaman-e) Rehmat meiñ
daakhil farmaya. Beshak Wo Naik-o-Kaaroñ meiñ sy thy¤
87.
Aur
Zunnoon (machhli k pait waly Nabi yani Younus a.s ko bhi yaad farmaeye) jab (On
ki qom ny da'wat-e-haq qabool na ki to) Wo (apni qom par) ghazzab-naak ho kr
chall diye (maggar is hijrat meiñ Hukm-e-Elahi ka intzaar na kia) Pus Onhoñ ny
ye kheyaal kr lia k (ye hijrat jaez hy aur) Ham On par (is saffar meiñ) koi
tañggi naheeñ kreñ gy (Ham ny Onheñ machhli k pait meiñ daal dia) phir Onhoñ ny
(dar'yaa, raat aur machhli k pait ki teh-darr-teh) tareekiyoñ meiñ (phañs kr)
pukaara k (Ay Allah) Tery siwa koi Ma'bood naheeñ Teri Zaat Paak hy, beshak
Maiñ he (Apni Jaan par) zeyaadti krny waloñ meiñ sy tha (k Tera izn pany sy
qabl hijrat ki)¤
88.
Pus Ham ny On ki Duaa qabool farma li aur
Ham ny Onheñ (machhli k pait sy nikaal kr) gham sy nijaat bakhshi, aur isi
tarrah Ham Mominoñ ko nijaat dia krty heñ¤
89.
Aur Zakariyya (a.s ko bhi yaad kreñ) jab
Onhoñ ny Apny Rabb ko pukaara: Ay Mery Rabb! Mujhy akaila matt chhorh (yani
bay-olaad na rakh balky waaris ataa farma) aur Tu sb waarisoñ sy behtar hy (khalq
ki fanaa k baad baqi rehny wala hy. Agar Mujhy waaris na dy to bhi kuchh gham
naheeñ q k Tu behtar Waaris hy)¤
90.
To Ham ny On ki Duaa qabool farma li aur Ham
ny Onheñ (Farzand-e-Saeed) Yah'ya (a.s) ataa farmaya aur On ki khaatir On ki
Zoja ko (bhi Jo bhaañj theeñ) durust (yani qaabil-e-olaad) bna dia. Beshak ye
(sb Añmbiyaa a.s) naiki k kaamoñ (ki anjaam dahi) meiñ jaldi krty thy aur
Hammeñ shoq-o-raghbat aur khof-o-khashiyyat (ki kaifiyyatoñ) k sath pukaara
krty thy, aur Hmary hazoor barhy ijz-o-niaaz k sath girh'girhaaty thy¤
91.
Us (Pakeeza) Khatoon (Mar'yam a.s ko bhi
yaad kreñ) Jis ny apni iffat ki hifaazat ki (k kisi tarrah koi bashar us ki
paarsai ko chhoo na sakka) phir Ham ny Us meiñ Apni Rooh phooñk di (Us k Pait
meiñ Eesa a.s ko paida kia) aur Ham ny Usy aur Us k Baity (Eesa a.s) ko jahaañ
waloñ k liye (Apni Qudrat ki) Nishani bna dia (k Eesa a.s ko Us k battan sy
baghair baap k paida kia)¤
92.
Beshak ye (Deen-e-Islam) tumhari millat hy (sb)
aik he millat hy (is k siwa sb ad'yaan baatil heñ) aur Maiñ tumhara Rabb hooñ pus
tum Meri (he) ibaadat kia kro¤
93.
Aur on (Ehl-e-Kitab) ny aapas meiñ apny deen
ko tuk'rhy tuk'rhy kr dala, ye sb Hmari he jaanib lot kr aany waly heñ¤
94.
Pus jo koi naik ammal kryaur wo Momin bhi ho
to us ki koshish (ki jazaa) ka inkaar na ho ga, aur beshak Ham us k (sb) aamaal
ko likh rahy heñ¤
95.
Aur jis basti ko Ham ny hlaak kr dala na-mumkin
hy k us k log (mrny k baad) Hmari tarraf pallat kr na aeñ (is Aayat meiñ
munkareen-e-ba'as ka abtaal hy)¤
96.
Yahañ tak k (qreeb-e-Qeyaamat) jab Ya'jooj
aur Ma'jooj (donoñ qabeely) khol diye jaeñ gy aur wo har bulandi sy dorhty huwy
uttar aeñ gy¤
97.
Aur (Qeyaamat ka) sacha wa'da qreeb ho jaey
ga to achanak Kaafir logoñ ki aañkheñ (dehshat sy) khulli reh jaeñ gi (wo
pukaar utheñ gy) Haaey hmari shomi-e-qismat! K ham is (Din ki aamad) sy ghaflat
meiñ parhy rahy balky ham zaalim thy (k Rasooloñ ki baat na maanty thy aur
Onheñ jhutlaty thy)¤
98.
(Ay
Mushriko) Beshak tum aur wo (butt) jin ki tum Allah k siwa purastish krty thy (sb)
Dozakh ka eendhan heñ, tum us (Dozakh) meiñ daakhil hony waly ho¤
99.
Agar ye (butt waqeatan) ma'bood hoty (jaisa
k tumhara gumaan hy) to Jahannam meiñ daakhil na hoty, aur wo sb (butt aur on k
poojny waly) us (Jahannam) meiñ hamaisha raheñ gy¤
100. Wahañ
on ki (aahoñ ka shor aur) cheekh-o-pukaar ho gi aur (Jahannam ki shiddat-e-josh
ki wajja sy) us meiñ kuchh (aur) na sun sakkaiñ gy (jab Jahannam meiñ sirf wo
log reh jaeñ gy jinheñ us meiñ hamaisha rehna hy to wo aag k tabootoñ meiñ bnd
kiye jaeñ gy, wo taboot aur tabootoñ meiñ phir wo taboot mazeed aur tabootoñ
meiñ, phir on tabootoñ meiñ aag ki maikheñ jarh di jaeñ gi to wo na kuchh sun
sakkaiñ gy aur na koi on meiñ kisi ko daikh sakky ga)¤
101. (Mushrikeen ny kaha k agar butt is liye Dozakh
meiñ jaeñ gy k ham on ko poojty heñ to ham to Uzair a.s, Maseeh a.s aur
Frishtoñ ko bhi poojty heñ. Is par farmaya gea k) Beshak jin logoñ k liye pehly
sy he Hmari tarraf sy bhlai muqarrar ho chukki hy wo us (Jahannam) sy door
rakhy jaeñ gy (Hazrat Ali R.A ny ye Aayat parh kr farmaya k Maiñ aur Abu-Bakr
R.A, Umar R.A, Usman R.A, Talha R.A, Zubair R.A, Sa'ad R.A aur Abdul Rehman R.A
inhi meiñ sy heñ)¤
102. Wo
us (Jahannam k josh) ki aahat bhi na sunneñ gy aur wo on (Naimtoñ) meiñ
hamaisha raheñ gy jin ki on k dil khwahesh kreñ gy¤
103. (Roz-e-Qeyaamat
ki) sb sy barhi holnaki (nafkha-e-akheera bhi) onheñ ranjeeda naheeñ kry gi aur
(Qabroñ sy nikalty waqt) Frishty on ka istaqbaal kreñ gy (aur kahaiñ gy) Ye
tumhara (he) din hy jis ka tum sy wa'da kia jata raha¤
104. Us Din (yani Roz-e-Qeyaamat) Ham (saari) smavi
kaenaat ko is tarrah lapait deñ gy jaisy likhy huwy kaaghzaat ko lapait dia
jata hy, jis tarrah Ham ny (kaenaat ko) pehli baar paida kia tha Ham (is k
khattam ho jany k baad) usi ammal-e-takhleeq ko duhraeñ gy (yani jaisy pehly
addam sy bnaya tha waisy he phir ma'doom krny k baad paida kreñ gy). Ye wa'da
poora krna Ham ny laazim kr liya hy. Ham (ye e'aada) zaroor krny waly heñ¤
105. Aur
bila-shubba Ham ny Zaboor meiñ naseehat k (beyaan k) baad ye likh dia tha k
(aalam-e-Aakhirat ki) zmeen (yani Jannat) k waaris sirf Mery naiko-kaar bndy
hoñ gy¤
106. Beshak
is (Quran) meiñ ibaadat-guzaroñ k liye (hasool-e-maqsad ki) kafaaet-o-zmaanat
hy (k jo is ka ittabaa' kry aur is k mutabiq ammal kry, Jannat paey aur muraad
ko pohnchy)¤
107. Aur (Ay Rasool-e-Muhtashim) Ham ny Aap
(s.a.w.w) ko naheeñ bhaija magar tmaam jahaanoñ k liye REHMAT bna kr (Jin ho ya
ins aalam-e-arwaah hoñ ya aalam-e-ijsaam, Momin ho ya Kaafir sb k liye Aap
s.a.w.w Rehmat-e-mutliqa, kaamila, jaamia heñ. Momin k liye to dunia-o-Aakhirat
meiñ Rehmat heñ aur Kaafiroñ k liye dunia meiñ Rehmat heñ k Aap s.a.w.w ki
badolat takheer-e-azaab hui)¤
108. Farma
deejiye k Meri tarraf to yehi Wahi ki jati hy k tumhara Ma'bood faqqat Aik (he)
Ma'bood hy, to kia tum Islam qabool krty ho¤
109. Phir
agar wo roo-gardaani kreñ (aur Islam qabool na kreñ) to farma deejiye: Maiñ ny
tum sb ko yaksaañ tor par ba-khabbar kr dia hy, aur Maiñ (az-khud) naheeñ
jaanta (yani ye baat mehez aqqal-o-qeyaas sy naheeñ btai ja sakti) k wo (azaab)
nazdeek hy ya door jis ka tum sy wa'da kia ja raha hy¤
110. Beshak
Wo (Allah) buland aawaaz ki baat bhi jaanta hy (jo ay Kaafiro tum ailaan k sath
Islam par ba-treeq ta'an kehty ho) Aur wo (kuchh) bhi jaanta hy jo tum (apny
dilloñ meiñ) chhupaty ho (yani Nabi s.a.w.w ki adaawat aur Musalmanoñ sy hassad
jo tumhary dilloñ meiñ posheeda hy, Allah us ko bhi jaanta hy, sb ka bdla dy
ga)¤
111. Aur
Maiñ (az-khud) ye naheeñ jaanta shaed ye (takheer-e-azaab aur tumheñ di gai
dheel) tumhary haq meiñ aazmaesh ho aur (tumheñ) aik muqarrar waqt (yani
waqt-e-mot) tak faeda pohnchana maqsood ho¤
112. (Hmary
Habib s.a.w.w ny) arz kia: Ay Mery Rabb! (Hmary darmeyaan) haq k sath faisla
farma dy, aur Hmara Rabb bay-hadd Rehem farmany wala hy, Usi sy maddad tallab
ki jati hy on (dil-aazaar) baatoñ par jo (ay Kaafiro) tum beyaan krty ho¤ {LAST AAYAAT OF SURAH
AL-AÑMBIYAA}
Surah
AL-AÑMBIYAA Makki Surah hy. SURAH AL-AÑMBIYAA ki tafseel ye hy.
Ruku : 07
|
Para :
17 (Ruku 01 to 07)
|
Aayaat
: 112
|
Kalimaat : 1186
|
Huroof
: 4890
|
Surah AL-AÑMBIYAA ka Tarjuma (September 1 to
October 13, 2013) 43 din meiñ mukammal huwa.
