Para 17
Surah 22
Surah Al-Hajj
ALLAH K NAAM SY SHUROO JO BOHUT MEHRBAN NEHAYAT REHEM FARMANY WALA HY
1.
Ay logo! Apny Rabb sy darty raho (Us k azaab
ka khof kro aur Us ki ta'at meiñ mashghool ho). Beshak Qeyaamat ka zalzala (jo
alamaat-e-Qeyaamat meiñ sy hy aur qreeb-e-Qeyaamat aaftaab k maghrib sy tuloo
hony k nazdeek waqea ho ga) barhi sakht cheez hy¤
2.
Jis din tum usy daikho gy har doodh pilany
wali (maañ us ki haibat sy) us (bachy) ko bhool jaey gi jisy wo doodh pila rahi
the aur har hammal wali aurat apna hammal gira dy gi aur (ay daikhny waly) Tu
logoñ ko nasha (ki haalat) meiñ daikhy ga haalañky wo (fil-haqiqat) nasha meiñ
naheeñ hoñ gy laikin Allah ka azaab (he itna) sakht ho ga (k har shakhs
hwaas-baakhta ho jaey ga)¤
3.
Aur
kuchh log (aisy) heñ jo Allah k bary meiñ baghair ilm-o-danish k jhagrha krty
heñ aur har sarkash Shetan ki pairvi krty heñ (ye Aayat Nazzar bin Haaris k
bary meiñ naazal hui jo barha he jhagrhaloo tha aur Frishtoñ ko Khuda ki
baitiyañ aur Quran ko pehloñ k qissy btata tha aur mot k baad uthaey jany ka
munkar tha)¤
4.
Jis (Shetan) k bary meiñ likh dia gea hy k
jo shakhs usy dost rakhy ga so wo usy gumrah kr dy ga aur usy Dozakh k azaab ka
raasta dikhaey ga¤
5.
Ay logo! Agar tumheñ (mrny k baad) ji uthny
meiñ shakk hy to (apni takhleeq-o-irtqa par ghor kro) k Ham ny tumhari takhleeq
(ki keemiyai ibtda) matti sy ki (Aadam a.s ko matti sy paida kia) phir
(olaad-e-Aadam ki hayaatiyati ibtda) aik toleedi qatra sy phir (rehm-e-maadar k
andar joñk ki soorat meiñ) mu'alliq wajood sy phir aik (aisy) loth'rhy sy jo
daañtoñ sy chabaaya huwa lagta hy, jis meiñ baaz aa'za ki ibtdai takhleeq
numaayañ ho chukki hy aur baaz (aa'za) ki takhleeq abhi ammal meiñ naheeñ aai (bachy
ka mada-e-paidaesh maañ k shikkam meiñ 40 roz tak nutfa phir utni he muddat
khoon-basta phir utni he muddat gosht ki boti ki tarrah rehta hy phir us meiñ
rooh phooñki jati hy. Ye is liye beyaan farmaya gea hy) ta k Ham tumhary liye
(Apni Qudrat aur Apny Kalaam ki haqqaniyat) zaahir kr deñ, aur Ham jisy chahty
heñ rehmoñ meiñ muqarrara muddat (yani waqt-e-wilaadat) tak thehraey rakhty heñ
phir Ham tumheñ bacha bna kr nikaalty heñ, phir (tumhari parvarish krty heñ) ta
k tum apni jawaani ko pohnch jao, aur tum meiñ sy wo bhi heñ jo (jald) wafaat
pa jaty heñ aur kuchh wo heñ jo nehaayat nakara umar tak lotaey jaty heñ (on ko
itna burhapa aa jata hy k hawaas bjaa naheeñ rehty) ta k wo (shakhs ye manzar
bhi daikh ly k) sb kuchh jaan lainy k bad (ab phir) kuchh (bhi) naheeñ jaanta
(yani jo jaanta tha wo bhool gea. Is k baad Allah mrny k baad uthny par dusri
dleel beyaan farmata hy), aur tu zmeen ko bilkul khushk (murda) daikhta hy phir
jab Ham us par pani barsaty heñ to us meiñ taazgi-o-shadabi ki juñmbish aa jati
hy aur wo phoolny barhny lagti hy aur khushnuma nabaataat meiñ sy har no' k
jorhy ugaati hy¤
6.
Ye (sb kuchh yani insaan ki takhleeq aur
khushk zmeen ka sarsabz ho jana) is liye (hota rehta) hy k Allah he sacha
(Khaaliq aur Rabb) hy (aur ye Us k Wajood-o-Hikmat ki dleeleñ heñ) aur beshak
Wohi murdoñ (bay-jaan) ko zinda (jaandaar) krta hy aur yaqinan Wohi har cheez
par barha Qaadir hy¤
7.
Aur beshak Qeyaamat aany wali hy is meiñ koi
shakk naheeñ aur yaqinan Allah on logoñ ko zinda kr k utha dy ga jo qabroñ meiñ
hoñ gy¤
8.
Aur logoñ meiñ sy kuchh aisy bhi heñ jo
Allah (ki Zaat-o-Sifaat aur Qudratoñ) k bary meiñ jhagrha krty rehty heñ
baghair ilm-o-danish k aur baghair kisi hadaayat-o-dleel k aur baghair kisi
Roshan Kitab k (jo aasmaan sy utri ho. Ye Aayat Abu-Jehel waghaira aik
jama'at-e-Kuffaar k haq meiñ naazal hui jo Allah ki Sifaat meiñ jhagrha krty
thy)¤
9.
Apni gardan ko (takabbar sy) marorhy huwy ta
k (dusroñ ko bhi) Allah ki raah sy behka dy, us k liye dunia meiñ (bhi) ruswai
hy (chunachy Badr meiñ Abu-Jehel zillat k sath qattal huwa) aur Qeyaamat k din
Ham usy jalaa dainy waly azaab ka mazza chakhaeñ gy¤
10. (Aur
us sy kaha jaey ga k) Ye tery on aa'maal k baes hy jo tery haath aagy bhaij
chukky thy aur beshak Allah apny bndoñ par bilkul zulm krny wala naheeñ hy (aur
kisi ko bay-jurm naheeñ pakarhta)¤
11. Aur
logoñ meiñ sy koi aisa bhi hota hy jo (bilkul Deen k) kinaary par (reh kr)
Allah ki ibaadat krta hy (ye Aayat airabiyoñ ki aik jama'at k haq meiñ naazal
hui jo atraaf sy aa kr Madina meiñ daakhil hoty aur Islam qabool krty. On ki
haalat ye the k agar wo khoob tandrust rahaiñ aur on ki dolat barhy aur on ka
baita ho, tabb to kehty k Islam achha Deen hy aur agar is k bar'aks kuchh hota
to Islam sy phir jaty) pus agar usy koi (duniyavi) bhlai pohnchti hy to wo us
(Deen) sy mutma'in ho jata hy aur agar usy koi aazmaesh pohnchti hy to apny
mooñh k ball (Deen sy) pallat jata hy (aur murtad ho jata hy), us ny dunia meiñ
(bhi) nuqsaan uthaya (k us ki muraad poori na hui aur irtdaad ki wajja sy us ka
khoon mubaah huwa) aur Aakhirat meiñ (bhi hamesha ka azaab), yehi to wazeh (tor
par) barha khasaara hy¤
12. (Aazmaesh
k waqt Islam sy phir jany wala butt-prasti krta hy aur) Wo (shakhs) Allah ko
chhorh kr us (butt) ki ibaadat krta hy jo na usy nuqsaan pohncha sakky aur na
he usy naffa' pohncha sakky (q k wo bay-jaan hy), yehi to (bohut) door ki
gumrahi hy¤
13. Wo
usy poojta hy jis ka nuqsaan (yani azaab-e-dunia-o-Aakhirat) us k (kheyaali)
naffa' sy zeyaada qreeb hy, wo (butt) kia he bura maddad-gaar hy aur kia he
bura sathi hy¤
14. Beshak
Allah on logoñ ko jo Emaan laey aur naik ammal krty rahy Jannatoñ meiñ daakhil
farmaey ga jin k neechy sy nehreñ rawaañ heñ, yaqinan Allah jo irada farmata hy
kr daita hy¤
15. Jo
shakhs ye gumaan krta hy k Allah Apny (Mehboob-o-Barguzeeda) Rasool (s.a.w.w)
ki dunia-o-Aakhirat meiñ har giz maddad naheeñ farmaey ga usy chahye k (ghr ki)
chhat sy aik rassi baandh kr lattak jaey phir (khud ko) phaañsi dy ly phir
daikhy kia us ki ye tadbeer us (Nusrat-e-Elahi) ko door kr daiti hy jis par
ghussa kha raha hy (yani Allah Apny Habib s.a.w.w ki maddad zaroor farmaey ga jisy
jallan ho wo jallan meiñ mr bhi jaey to bhi kuchh naheeñ kr sakta)¤
16. Aur
isi tarrah Ham ny is (poory Quran) ko Roshan dlael ki soorat meiñ naazal
farmaya hy aur beshak Allah jisy irada farmata hy Hadaayat sy nawaazta hy¤
17. Beshak jo log Emaan laey aur jo log Yahoodi
huwy aur Sitara-Prast aur Nasaara (Eesai) aur Aatish-Prast aur jo Mushrik huwy,
yaqinan Allah Qeyaamat k din on (sb) k darmeyaan faisla farma dy ga (Momineen
ko Jannat meiñ aur Kuffaar ko Jahannam meiñ daakhil kry ga). Beshak Allah har
cheez ka mushaaheda farma raha hy¤
18. Kia
tum ny naheeñ daikha k Allah he k liye (wo saari makhlooq) Sajda-raiz hy jo
aasmanoñ meiñ hy aur jo zmeen meiñ hy aur sooraj (bhi) aur chaand (bhi) aur
sitary (bhi) aur pahaarh (bhi) aur drakht (bhi) aur jaanwar (bhi) aur bohut sy
insaan (yani Momineen bhi), aur bohut sy (insaan) aisy bhi heñ jin par (on k
Kufr-o-Shirk k baes) azaab saabit ho chukka hy, aur Allah jisy zleel kr dy to
usy koi izzat dainy wala naheeñ hy. Beshak Allah jo chahta hy kr daita hy¤
19. Ye
2 freeq heñ (yani Momineen aur Kuffaar) jo apny Rabb (k Deen aur Us ki Sifaat)
k bary meiñ jhaggarh rahy heñ pus jo Kaafir ho gaey heñ on k liye
Aatish-e-Dozakh k kaprhy kaat (kr, see) diye gaey heñ (yani aag onheñ har tarraf
sy ghair ly gi). On k sarroñ par kholta huwa pani ondaila jaey ga¤
20. Jis
sy on k shikmoñ meiñ jo kuchh hy pighal jaey ga aur (on ki) khaleñ bhi (wo pani
itna garram ho ga k agar us ka aik qatra dunia k pahaarhoñ par daal dia jaey to
on ko glaa dy)¤
21. Aur
on (Kaafiroñ k sarroñ par maarny) k liye lohy k hathorhy hoñ gy¤
22. Wo
jab bhi shiddat-e-takleef sy wahañ (yani Dozakh) sy niklny ka irada kreñ gy (to)
us meiñ waapas lota diye jaeñ gy aur (on sy kaha jaey ga) Sakht aag k azaab ka
mazza chak'kho¤
23. Beshak
Allah on logoñ ko jo Emaan ly aey heñ aur naik aa'maal anjaam daity heñ Jannatoñ
meiñ daakhil farmaey ga jin k neechy sy nehreñ jari heñ wahañ onheñ sony k
kañgnoñ aur motiyoñ sy aaraasta kia jaey ga (aisy moti jin ki chammak Mashriq
sy Maghrib tak roshan kr daly), aur wahañ on ka libaas raisham ho ga (jis ka
pehn'na dunia meiñ mardoñ ko hraam hy)¤
24. Aur
onheñ (dunia meiñ) paakiza qol ki hadaayat ki gai (paakiza qol sy
Kalma-e-Toheed muraad hy ya Quran) aur onheñ (Islam k) pasandeeda raasta ki
tarraf rehnumai ki gai¤
25. Beshak
jin logoñ ny Kufr kia hy aur (dusroñ ko) Allah ki raah (yani Us k Deen aur Us
ki ata'at) sy aur us Masjid-e-Hraam (Kaa'batullah) sy rokty heñ jisy Ham ny sb
logoñ k liye yaksaañ bnaya hy us meiñ wahañ k basi aur pardaisi (meiñ koi farq
naheeñ. Ye Aayat Suf'yaan-bin-Harb waghaira k haq meiñ naazal hui jinhoñ ny
Sayyad-e-Aalam s.a.w.w ko Makkah Mukarrama meiñ daakhil hony sy roka tha), aur
jo shakhs us meiñ na-haq treeqa sy kaj-ravvi (yani muqarrara hadood-o-haqooq ki
khilaaf-warzi) ka irada kry (yani shirk-o-butt-prasti, mamnoo' qol-o-fail, gali
gloch, drakht kaatny, shikaar krny ya qattal-o-ghaarat krny ka irada kry to) Ham
usy dard-naak azaab ka mazza chakhaeñ gy¤
26. Aur
(wo waqt yaad keejiye) jab Ham ny Ibrahim (a.s) k liye Baitullah (yani Khana
Kaa'ba ki taa'meer) ki jagga ka ta'ayyun kr dia (pehly Imaarat-e-Kaa'ba Aadam
a.s ny bnai the aur Tofaan-e-Nooh k waqt wo aasmaan par utha li gai. Allah ny
aik hwaa muqarrar ki jis ny us jagga ko saaf kr dia ya aik abbar bhaija jo
khaas us buqqa k muqaabil tha jahañ Kaa'ba ki Imaarat the. Is tarrah Ibrahim
a.s ko Kaa'ba Shareef ki jagga btai gai aur Onhoñ ny qadeem bun'yaad par
Imaarat-e-Kaa'ba taa'meer ki aur Onheñ Hukam farmaya) K Mery sath kisi cheez ko
shareek na thehrana aur Mery Ghr ko (taa'meer krny k baad) Tawaaf krny waloñ aur
Qeyaam krny waloñ aur Ruku' krny waloñ aur Sujood krny waloñ (yani Namaaziyoñ)
k liye (Shirk sy aur buttoñ sy aur har qissam ki najaastoñ sy) paak-o-saaf
rakhna¤
27. Aur
Tum logoñ meiñ Hajj ka buland aawaaz sy ailaan kro (chunachy Ibrahim a.s ny
Abu-Qabees pahaarh par chharh kr jahaañ k logoñ ko nidaa di k Baitullah ka Hajj
kro. Jin k maqdoor meiñ Hajj tha onhoñ ny baapoñ ki pushtoñ aur maaoñ k paitoñ
sy jawaab dia LABBAIK ALLAHUMMA LABBAIK. Aik Rawayaat ye hy k ye Khitaab
Sayyad-e-Aalam s.a.w.w ko hy, chunachy Hajjatul-Widaa' meiñ ailaan farma dia k
ay logo Allah ny tum par Hajj Farz kia, tum Hajj kro) wo Tumhary paas paidal
aur tmaam dubly ooñtoñ par (swaar) haazir ho jaeñ gy jo door draaz k raastoñ sy
aaty heñ¤
28. Ta
k wo Apny fawaed (bhi) paeñ aur (Qurbani k) muqarrara dinoñ k andar Allah ny jo
muvaishi chopaey on ko bakhshy heñ on par (Zibbah k waqt) Allah k Naam ka Zikr
bhi kreñ, pus tum us meiñ sy khud (bhi) khao aur khasta-haal muhtaaj ko (bhi)
khilao¤
29. (Haji Qurbani kr leñ to) Phir onheñ chahye k (Ehraam
sy niklty huwy baal aur naakhun katwa kr) apna mail kuchail door kreñ aur apni
Nazreñ (jo onhoñ ny maani hoñ ya baq'ya manaasik) poori kreñ aur (Allah k)
Qadeem Ghr (Khana Kaa'ba) ka Tawaaf (e-Zeyaarat) kreñ¤
30. Yehi
(Hukam) hy, aur jo shakhs Allah (ki Baargah) sy izzat-yaafta cheezoñ ki ta'zeem
krta hy (khwaa wo Manaasik-e-Hajj hoñ ya on k siwa aur Ahkaam) to wo us k Rabb
k haañ us k liye behtar hy, aur tumhary
liye (sb) muvaishi (chopaey) halaal kr diye gaey heñ (k onheñ Zibbah kr k khao)
siwaey on k jin ki mamaane'at tumheñ (Quran meiñ) parh kr sunai gai hy (jaisa k
Surah Maeda meiñ beyaan farmaya gea) so tum buttoñ ki pleedi sy bacha kro (jin
ki purastish krna bd-treen gandgi sy aalooda hona hy) aur jhooti baat sy
par'haiz kia kro¤
31. Sirf
Allah k ho kr raho Us k sath (kisi ko) shareek na thehraty huwy, aur jo koi
Allah k sath shirk krta hy to goya wo (aisy hy jaisy) aasmaan sy gir parhy phir
us ko prindy uchak ly jaeñ (aur boti boti kr k kha jaeñ) ya hawaa us ko kisi
door ki jagga meiñ neechy ja phaiñky (Shirk krny wala apni jaan ko bd-treen
halaakat meiñ daalta hy. Emaan ko bulandi sy tashbeeh di gai aur Emaan tark
krny waly ko aasmaan sy girny waly k sath)¤
32. Yehi
(Hukam) hy aur jo shakhs Allah ki Nishaniyoñ ki taa'zeem krta hy (yani on
jaandaroñ, yaad-gaaroñ, mqaamaat, ahkaam aur manaasik waghaira ki taa'zeem jo
Allah ya Allah waloñ k sath kisi achhi nisbat ya ta'alluq ki wajja sy jany
pehchany jaty heñ) to ye (taa'zeem) diloñ k taqwa meiñ sy hy (ye taa'zeem wohi
log bjaa laty heñ jin k diloñ ko taqwa naseeb ho gea ho)¤
33. Tumhary liye in (Qurbani k jaanwaroñ) meiñ muqarrara
muddat (yani on k Zibbah k waqt) tak (sawaar hony aur doodh peeny k) fawaed heñ
phir onheñ Qadeem Ghr (Khana Kaa'ba) ki tarraf (Zibbah k liye) pohnchna hy (jahaañ
wo Zibbah kiye jaeñ)¤
34. Aur Ham ny (pichhli Emaan-daar Ummatoñ meiñ
sy) har Ummat k liye aik Qurbani muqarrar kr di hy ta k wo on muvaishi
chopaeyoñ par jo Allah ny onheñ enaayat farmaey heñ (Zibbah k waqt) Allah ka
Naam leñ, so tumhara Ma'bood aik (he) Ma'bood hy pus tum (Zibbah k waqt sirf
Usi ka Naam lo. Is sy saabit huwa k Naam-e-Khuda ka Zikr krna Zibbah k liye
shart hy, aur) Usi k farmaañ-bardaar bn jao, aur (Ay Habib s.a.w.w) Aajzi krny
waloñ ko khush-khabri suna deñ¤
35. (Ye)
wo log heñ k jab Allah ka Zikr kia jata hy (to) on k dil (Haibat-o-Jalaal sy)
darny lagty heñ aur jo museebataiñ onheñ pohnchti heñ on par sabr krty heñ aur
Namaz qaem rakhny waly heñ aur jo kuchh Ham ny onheñ ataa farmaya hy us meiñ sy
kharch krty heñ (yani sadqa daity heñ)¤
36. Aur
Qurbani k barhy jaanwaroñ (yani ooñt aur gaaey waghaira) ko Ham ny tumhary liye
Allah ki Nishaniyoñ meiñ sy bna dia hy. In meiñ tumhary liye bhlai hy (dunia
meiñ naffa' aur Aakhirat meiñ ajr-o-sawaab) pus tum (inheñ) qitaar meiñ kharha
kr k (naiza maar kr neher k waqt) in par Allah ka Naam lo, phir jab wo apny
pehloo k bal gir jaeñ (aur on ki harkat saakat ho jaey) to tum khud (bhi) us
meiñ sy khao aur qna'at sy baithy rehny waloñ ko aur sawaal krny waly
(muhtajoñ) ko (bhi) khilao. Is tarrah Ham ny inheñ tumhary taaby kr dia hy ta k
tum shukkar bjaa lao¤
37. Har
giz na (to) Allah ko in (Qurbaniyoñ) ka gosht pohnchta hy aur na in ka khoon maggar
Usy tumhari tarraf sy Taqwa pohnchta hy (yani Qurbani krny waly sirf Niyyat k
ikhlaas aur shart-e-taqwa ki re'aayat sy Allah ko razi kr sakty heñ. Zmana-e-Jahilliyyat
k Kuffaar apni qurbaniyoñ k khoon sy Kaa'ba ki deewaroñ ko aalooda krty thy aur
is ko sabbab-e-taqarrab jaanty thy, is par ye Aayat naazal hui), is tarrah
(Allah ny) inheñ tumhary taaby kr dia hy ta k tum (waqt-e-Zibbah) Allah ki
Takbeer kaho jaisy Us ny tumheñ hadaayat farmai hy, aur Aap (s.a.w.w) Naiki
krny waloñ ko (sawaab ki) khush-khabri suna deñ¤
38. Beshak
Allah Saahib-e-Emaan logoñ sy (dushmanoñ ka fitna-o-sharr) door krta rehta hy
(aur on ki maddad farmata hy). Beshak Allah kisi khaen (aur) na-shukry ko
pasand naheeñ krta¤
39. On
logoñ ko (Jahaad ki) ijaazat dy di gai hy jin sy (na-haq) jañg ki ja rahi hy (kuffaar-e-Makkah
As'haab-e-Rasool s.a.w.w ko roz-marra haath aur zubaan sy shadeed eezaeñ daity.
Sahaaba R.A Hazoor s.a.w.w k paas is haal meiñ pohnchty thy k kisi ka sarr
phatta hy, kisi ka haath toota hy, kisi ka paoñ bandha huwa hy. Hazoor s.a.w.w
farmaya krty k abhi sabr kro, abhi Jahaad ka Hukam naheeñ dia gea. Jab Hazoor
s.a.w.w ny Madina Hijrat farmai tabb ye Aayat naazal hui aur ye pehli Aayat hy
jis meiñ Kuffaar k sath jañg krny ki ijaazat di gai hy) is wajja sy k on par
zulm kia gea, aur beshak Allah on (mazloomoñ) ki maddad par barha Qaadir hy¤
40. (Ye)
wo log heñ jo apny gharrroñ sy na-haq nikaaly gaey (aur bay-wattan kiye gaey) sirf
is bina par k wo kehty thy k hmara Rabb Allah hy (yani onhoñ ny baatil ki
farmaañ-rawai tasleem krny sy inkaar kia tha), aur agar Allah insani tabqaat
meiñ sy baaz ko baaz k zarriye (Jahaad-o-inqlabi jidd-o-juhad ki soorat meiñ)
htaata na rehta to (Raahiboñ ki) Khaanqaheñ aur (Nasraniyoñ k) Girjy aur
(Yahoodiyoñ k) Kleesy aur (Musalmanoñ ki) Masjideñ (yani tmaam Ad'yaan k
Mazhabi mraakaz aur ibaadat-gaaheñ) masmaar aur viraan kr di jateeñ jin meiñ
kasrat sy Allah k Naam ka Zikr kia jata hy, aur jo shakhs Allah (k Deen) ki
maddad krta hy yaqinan Allah us ki maddad farmata hy. Beshak Allah zaroor
(barhi) Quwwat wala (sb par) Ghaalib hy (goya Haq aur baatil k
tazaad-o-tasaadam k inqlabi ammal sy he Haq ki bqaa mumkin hy)¤
41. (Ye Ehl-e-Haq) wo log heñ k agar Ham inheñ
zmeen meiñ iqtdaar dy deñ (aur in k dushmanoñ k mqaabil in ki maddad kreñ to)
wo Namaz (ka nizaam) qaem kreñ aur Zakaat ki adaegi (ka intzaam) kreñ aur
(poory muaashry meiñ Naiki aur) Bhlai ka hukam kreñ aur (logoñ ko) burai sy rok
deñ (is meiñ khabbar di gai hy k aaenda Muhaajreen ko zmeen meiñ tasarraf ataa
farmany k baad on ki Seerataiñ aisi Pakeeza hoñ gi aur Deen k kaamoñ meiñ
Ikhlaas k sath mashghool rahaiñ gy), aur sb kaamoñ ka injaam Allah he k
ikhteyaar meiñ hy¤
42. Aur
agar ye (Kuffaar) Aap (s.a.w.w) ko jhutlaty heñ to in sy pehly Qom-e-Nooh (a.s)
aur Aad-o-Samood (Qom-e-Hood a.s aur Qom-e-Saleh a.s) ny bhi (apny Rasooloñ ko)
jhutlaya tha¤
43. Aur
Qom-e-Ibrahim (a.s) aur Qom-e-Loot (a.s) ny (bhi)¤
44. Aur
Baashindgaan-e-Mad'yan (Qom-e-Shoaib a.s) ny (bhi jhutlaya tha) aur Moosa (a.s)
ko bhi jhutlaya gea (yahañ Moosa a.s ki qom na farmaya q k Moosa a.s ki qom
Bani-Israeel ny Aap a.s ki takzeeb na ki the balky Fir'on ki qom Qubtiyoñ ny
Moosa a.s ko jhutlaya tha. In qomoñ ka tazkira aur har aik k apny Rasool ki
takzeeb krny ka beyaan Sayyad-e-Aalam s.a.w.w ki taskeen-e-khaatir k liye hy) so
Maiñ (on sb) Kaafiroñ ko muhlat daita raha phir Maiñ ny onheñ pakkarh lia (aur
saza di), phir (btaeye) Mera azaab kaisa tha? (So Kaafiroñ ko chahye k is sy
ibrat haasil kreñ)¤
45. Phir kitni he (aisi) bastiyañ heñ jinheñ Ham
ny halaak kr dala is haal meiñ k wo zaalim then pus wo apni chhattoñ par girri
parhi heñ aur (on ki halaakat sy) kitny kuñweñ bay-kaar (ho gaey k on sy koi pani
bharny wala naheeñ) aur kitny mazboot mehel uj'rhy parhy (heñ jin meiñ koi
rehny wala naheeñ)¤
46. To
kia inhoñ ny (yani Kuffaar ny) zmeen meiñ sair-o-sayaahat naheeñ ki k (shaed on
khandraat ko daikh kr) on k dil (aisy) ho jaty jin sy wo sammajh sakty (k
Añmbiyaa a.s ki takzeeb ka kia injaam huwa) ya kaan (aisy) ho jaty jin sy wo
(haq ki baat) sun sakty, to haqiqat ye hy k (aisoñ ki) aañkheñ andhi naheeñ
hoteeñ (on ki zahiri hiss baatil naheeñ hoti wo in aañkhoñ sy daikhny ki
cheezeñ daikhty heñ) laikin dil andhy ho jaty heñ jo seenoñ meiñ heñ (Deen ki
raah pany sy mehroom rehny wala dil ka andha hy)¤
47. Aur ye (Kuffaar misl Nazzar-bin-Haaris
waghaira k) Aap (s.a.w.w) sy azaab meiñ jaldi k khwahesh-mand heñ (aur ye jaldi
krna on ka istehza k treeqa par tha) aur Allah har giz Apny wa'da ki
khilaaf-warzi na kry ga (aur zaroor hasb-e-wa'da azaab naazal farmaey ga. Chunachy
ye wa'da Badr meiñ poora huwa), aur (jab Aakhirat meiñ azaab ka waqt aey ga) to
(azaab ka) aik din Aap k Rabb k haañ aik hazaar (1000) saal ki maanind hy (us
hisaab sy) jo tum shumaar krty ho (to ye Kuffaar kia sammajh kr azaab ki jaldi
krty heñ)¤
48. Aur
kitni he bastiyañ (aisi) heñ jin ko Maiñ ny muhlat di haalañky wo zaalim then phir
Maiñ ny onheñ (dunia meiñ azaab ki) grift meiñ ly lia aur (Aakhirat meiñ har
kisi ko) Meri he tarraf lot kr aana hy¤
49. Farma
deejiye: Ay logo! Maiñ to mehez tumhary liye (azaab-e-Elahi ka) darr sunaany
wala hooñ¤
50. Pus
jo log Emaan laey aur Naik ammal krty rahy on k liye Maghfirat hy aur (mazeed)
buzurgi wali ataa hy (jo kabhi munqaty na ho gi aur wo ataa Jannat hy)¤
51. Aur
jo log Hmari Aayatoñ (k radd) meiñ koshaañ rehty heñ (kabhi in Aayaat ko seher
kehty heñ kabhi shair aur kabhi pichhloñ k qissy) is kheyaal sy k (Hammeñ)
aajiz kr deñ gy (wo ye kheyaal krty heñ k Islam k sath on ka ye makkar chall
jaey ga) wohi log Ehl-e-Dozakh heñ¤
52. Aur
Ham ny Aap (s.a.w.w) sy pehly koi Rasool naheeñ bhaija aur na koi Nabi (Rasool
khaas hy aur Nabi aam. Rasool Sharra' k waazy' hoty heñ aur Nabi us k Haafiz
aur nigehban) maggar (sb k sath ye waqea guzra k) jab Us (Rasool ya Nabi) ny
(logoñ par Kalaam-e-Elahi) parha (to) Shetan ny (logoñ k zehnoñ meiñ) Us (Nabi
k) parhy huwy (yani Tilawat-shudda) Kalaam meiñ (apni tarraf sy baatil
shub'haat aur faasid kheyaalaat ko) mila dia (Aap s.a.w.w Surah Najm ki tilawat
farma rahy thy, jab 20 veeñ Aayat parhi to Shetan ny Mushrikeen k kaan meiñ is
sy mila kr 2 Mushrikana kalmy keh diye), so Shetan jo (waswasy sun'ny waloñ k
zehnoñ meiñ) daalta hy Allah onheñ zael farma daita hy phir Allah Apni Aayatoñ
ko (Ehl-e-Emaan k dilloñ meiñ) nehaayat mazboot kr daita hy, aur Allah khoob
jaan'ny wala barhi Hikmat wala hy¤
53. (Shetan logoñ k zehnoñ meiñ Kalaam-e-Elahi k
mutalliq baatil kheyaalaat daalta hy aur Allah on waswasoñ ko zael farma daita
hy. Ye is liye hota hy) Ta k Allah on (baatil kheyaalaat aur faasid shub'haat)
ko jo Shetan (logoñ k zehnoñ meiñ) daalta hy aisy logoñ k liye aazmaesh bna dy jin
k dilloñ meiñ (Munaafqat ki) bimari hy aur jin logoñ k dil (Kufr-o-anaad k
baes) sakht heñ, aur beshak zaalim log barhi shadeed mukhaalifat meiñ mubtla
heñ¤
54. Aur
ta k wo log jinheñ ilm (e-Sahi) ataa kia gea hy jaan leñ k wohi (Wahi yani
Quran jis ki Paighambar s.a.w.w ny tilawat ki hy) Aap (s.a.w.w) k Rabb ki
tarraf sy (mabni) br-haq hy so wo usi par Emaan laeñ (aur Shetani waswasoñ ko
radd kr deñ) aur on k dil Us (Rabb) k liye aajzi kreñ, aur beshak Allah Mominoñ
ko zaroor seedhi raah ki tarraf Hadaayat farmany wala hy¤
55. Aur
Kaafir log hamesha is (Quran) k hwaly sy shakk meiñ rahaiñ gy yahañ tak k achanak
on par Qeyaamat aa pohnchy (ya mot aa jaey k wo bhi Qeyaamat-e-Sughra hy) ya us
Din ka azaab aa jaey jis sy nijaat ka koi imkaan naheeñ¤
56. Hukmrani
us Din sirf Allah he ki ho gi. Wohi on k darmeyaan faisla farmaey ga, pus jo
log Emaan laey aur Naik ammal krty rahy (wo) Naimat k baghaat meiñ
(qeyaam-pazeer) hoñ gy¤
57. Aur
jinhoñ ny Kufr kia aur Hmari Aayatoñ ko jhutlaya to onhi logoñ k liye
zillat-aamaiz azaab ho ga¤
58. Aur
jin logoñ ny Allah ki raah meiñ (wattan sy) hijrat ki phir qattal kr diye gaey ya
(Raah-e-Haq ki museebateñ jheelty jheelty) mr gaey to Allah onheñ zaroor
rizq-e-hasan (yani ukhravi ataaoñ) ki rozi bakhshy ga (Aap s.a.w.w sy baaz
Sahaaba R.A ny arz ki k Shuhda ka to bohut buland darja hy, laikin aggar ham Aap
s.a.w.w k sath rahy maggar bay-shahaadat k mot ai to Aakhirat meiñ hmary liye
kia hy, is par ye Aayat naazal hui), aur beshak Allah sb sy behtar rizq dainy
wala hy¤
59. Wo
zaroor onheñ us jagga (yani Mqaam-e-Rizwan meiñ) daakhil farmaey ga jis sy wo
razi ho jaeñ gy, aur beshak Allah khoob jaan'ny wala Burdbaar hy¤
60. (Hukam)
yehi hy, aur jis shakhs ny utna he badla lia jitni usy aziyyat di gai the phir
us shakhs par zeyaadti ki jaey to Allah zaroor us ki maddad farmaey ga (Mushrikeen
Muharram ki raatoñ meiñ Musalmanoñ par hamla-aawar huwy. Musalmanoñ ny is maah
ki Hurmat ki wajja sy larhna na chaha maggar Mushrikeen na maany. Allah ny
Musalmanoñ ki maddad farmai). Beshak Allah dar-guzzar farmany wala barha
bakhshny wala hy¤
61. Ye
(yani mazloom ki maddad krna) is wajja sy hy k Allah (har cheez par Qaadir hy.
Wo) raat ko din meiñ daakhil farmata hy aur din ko raat meiñ daakhil farmata hy
aur beshak Allah khoob sun'ny wala daikhny wala hy¤
62. Ye
(maddad farmana) is liye (bhi hy) kAllah he Haq hy aur beshak wo (Kuffaar) Us k
siwa jo kuchh (bhi) poojty heñ wo baatil hy aur yaqinan Allah he bohut buland
bohut barha hy¤
63. Kia
Aap ny naheeñ daikha k Allah aasmaan ki janib sy pani utaarta hy to zmeen
sarsabz-o-shaadaab ho jati hy. Beshak Allah Mehrban (aur) barha khabbar-daar
hy¤
64. Usi
ka hy jo kuchh aasmanoñ meiñ hy aur jo kuchh zmeen meiñ hy, aur beshak Allah he
bay-Niaz qaabil-e-staesh hy¤
65. Kia
tum ny naheeñ daikha k Allah ny jo kuchh zmeen meiñ hy tumhary liye musakhar
farma dia hy aur kashtiyoñ ko (bhi) jo Us k Amr (yani qanoon) sy samundar
(o-dar'ya) meiñ chalti heñ, aur aasmaan (yani khlai-o-fizai kurroñ) ko zmeen
par girny sy (aik aafaqi nizaam k zarriye) thamy huwy hy maggar Usi k Hukam sy (jab
Wo chahy ga aapas meiñ takra jaeñ gy). Beshak Allah tmaam insanoñ k sath
nehaayat shafqat farmany wala barha Mehrban hy (k Us ny insanoñ k liye
munfa'atoñ k darwazy khol diye aur muzzartoñ sy on ko mehfooz kia)¤
66. Aur Wohi hy Jis ny tumheñ (bay-jaan nutfa sy
paida farma kr) zindagi bakhshi phir (tumhari umreñ poori hony par) tumheñ mot
daita hy phir tumheñ (Roz-e-Ba'as sawaab-o-azaab k liye dobara) zindagi dy ga. Beshak
insaan he barha na-shukkar-guzaar hy (k bawjood itni Naimtoñ k Us ki ibaadat sy
mooñh phair kr bay-jaan makhlooq ki purastish krta hy)¤
67. Ham
ny har aik Ummat k liye (Ahkaam-e-Sharee'at ya ibaadat-o-qurbani ki) aik raah
muqarrar kr di hy, onheñ usi par chalna hy (ye Aayat Badeel-bin-Wurqa, Bashar-bin-Yousuf
aur Yazeed-bin-Khanees k haq meiñ naazal hui. In logoñ ny Sahaaba R.A sy kaha
tha: Kia sabbab hy jis jaanwar ko tum khud qattal krty ho usy khaty ho aur jis
ko Allah maarta hy usy naheeñ khaty), so ye log Aap (s.a.w.w) sy har-giz (Allah
k) Hukam meiñ jhagrha na kreñ, aur Aap (s.a.w.w logoñ ko) Apny Rabb ki tarraf
bulaty raheñ. Beshak Aap (s.a.w.w) he seedhi (Raah-e) Hadaayat par heñ¤
68. Agar
wo Aap (s.a.w.w) sy (phir bhi) jhagrha kreñ to Aap (s.a.w.w) farma deejiye: Allah
behtar jaanta hy jo kuchh tum kr rahy ho¤
69. Allah
tumhary darmeyaan Qeyaamat k Din on tmaam baatoñ ka faisla farma dy ga jin meiñ
tum ikhtlaaf krty rahy thy¤
70. Kia
tumheñ maa'loom naheeñ k Allah wo sb kuchh jaanta hy jo aasmaan aur zmeen meiñ
hy, Beshak ye sb Kitab (yani Loh-e-Mahfooz) meiñ (darj) hy, yaqinan ye sb (yani
in sb ka ilm ya tmaam hwaadis ka Loh-e-Mahfooz meiñ sabt farmana) Allah par
(bohut) aasaan hy¤
71. Aur
(Kuffaar ki jahaalatoñ ka ye aalam hy k) ye log Allah k siwa on (buttoñ) ki
purastish krty heñ (jo ibaadat k mustahiq naheeñ aur) jis ki Us ny koi sannad
naheeñ utaari (yani on k paas apny is fail ki na koi aqli dleel hy na naqli) aur
na (he) onheñ is (butt-prasti k injaam) ka kuchh ilm hy, aur (Qeyaamat k Din)
zaalimoñ (yani Mushrikeen) ka koi maddad-gaar na ho ga (jo onheñ azaab-e-Elahi
sy bcha sakky)¤
72. Aur
jab on (Kaafiroñ) par Hmari Roshan Aayateñ tilawat ki jati heñ (aur onheñ Quran
sunaya jata hy jis meiñ beyaan-e-Ahkaam aur tafseel-e-Halaal-o-Hraam hy to) Aap
(s.a.w.w) on Kaafiroñ k chehroñ meiñ na-pasandeedgi (o-na-gwari k aasaar) saaf
daikh sakty heñ. Aisy lagta hy k anqreeb (wo Kaafir) on logoñ par jhappat
parheñ gy jo onheñ Hmari Aayaat parh kr suna rahy heñ, Aap (s.a.w.w) farma
deejiye: (Ay muztrib hony waly Kaafiro! Quran sun kr tumhary andar
ghaiz-o-ghazzab paida hota hy) Kia Maiñ tumheñ is sy (bhi) zeyaada takleef-deh
cheez sy aagah kroñ? (Wo Dozakh ki) aag hy jis ka Allah ny Kaafiroñ sy wa'da kr
rakha hy aur wo bohut he bura thikana hy¤
73. Ay
logo! Aik misaal beyaan ki jati hy so usy ghor sy suno (aur us meiñ khoob ghor
kro): Beshak jin (buttoñ) ko tum Allah k siwa poojty ho (on ki aajzi aur
bay-qudrati ka ye aalam hy k) wo har giz aik makkhi (bhi) paida naheeñ kr sakty
agarchy wo sb is (kaam) k liye jamma ho jaeñ (to aaqil ko kab shaayañ hy k
aisoñ ko ma'bood thehraey), aur aggar on sy makkhi koi cheez chheen kr ly jaey (misl
shehed waghaira k jo Mushrikeen buttoñ k mooñh par malty heñ to) wo us cheez ko
us (makkhi) sy chhurha (bhi) naheeñ sakty, kitna bay-bas hy taalib (aabid yani
butt-prast) bhi aur matloob (ma'bood yani butt) bhi¤
74. In
(Kaafiroñ) ny Allah ki qaddar na ki jaisi Us ki qaddar krna chahye the (k aisoñ
ko Khuda ka shareek kia jo makkhi sy bhi kmzor heñ). Beshak Allah barhi Quwwat
wala (har cheez par) Ghaalib hy¤
75. Allah
Frishtoñ meiñ sy (bhi) aur insanoñ meiñ sy (bhi Apna) Paighaam pohnchany waloñ
ko muntakhib farma laita hy (jaisy Frishtoñ meiñ sy Jibraeel a.s aur Mikaeel
a.s aur insanoñ meiñ sy Ibrahim a.s, Moosa a.s, Eesa a.s aur Sayyad-e-Aalam
s.a.w.w ko muntakhib farmaya. Ye Aayat on Kuffaar k radd meiñ naazal hui jinhoñ
ny Bashar k Rasool hony ka inkaar kia tha). Beshak Allah khoob sun'ny wala khoob
daikhny wala hy¤
76. Wo
on (cheezoñ) ko (khoob) jaanta hy jo in k aagy heñ aur jo in k peechhy heñ (yani
umoor-e-dunia ko bhi aur umoor-e-Aakhirat ko bhi ya on k guzry huwy aa'maal ko
bhi aur aaenda k ahwaal ko bhi), aur tmaam kaam Usi ki tarraf lotaey jaty heñ¤
77. Ay
Emaan walo! Tum (apni Namazoñ meiñ) Ruku' krty raho aur Sujood krty raho (Islam
k awwal aihed meiñ Namaz baghair Ruku'-o-Sujood k the, phir Namaz meiñ Ruku'-o-Sujood
ka Hukam farmaya gea), aur Apny Rabb ki ibaadat krty raho (yani Ruku'-o-Sujood
khaas Allah k liye hoñ aur ibaadat meiñ ikhlaas ikhteyaar kro) aur (deegar)
Naik kaam (sila-e-rehmi-o-mkaarim-e-akhlaaq waghaira) kiye jao ta k tum flaah
pa sakko¤{AAYAT-E-SAJDAH}
78. Aur
(Ay Emaan walo! Qeyaam-e-amman aur takreem-e-insaniyat k liye) Allah ki Raah
meiñ Jahaad kro jaisa k us k Jahaad ka haq hy. Us ny tumheñ muntakhib farma lia
hy aur Us ny tum par Deen meiñ koi tañggi naheeñ rak'khi. (Yehi) tumhary Baap
Ibrahim (a.s) ka Deen hy. Us (Allah) ny tumhara naam Musalmaan rak'kha hy, is
sy pehly (ki Kitaboñ meiñ) bhi aur is (Quran) meiñ bhi ta k Ye Rasool
(e-Aakhir-uz-Zamaañ s.a.w.w) tum par Gawaah ho jaeñ aur tum Banni-No'-insaan
par gawaah ho jao, pus (is martba par faez rehny k liye) tum Namaz qaem kia kro
aur Zakaat ada kia kro aur Allah (k Daaman) ko mazbooti sy thaamy rak'kho, Wohi
tumhara Maddad-Gaar (o-Kaar-Saaz) hy, pus Wo kitna Achha Kaar-Saaz (hy) aur
kitna Achha Maddad-Gaar hy¤ {LAST AAYAT OF PARA 17}[LAST AAYAT OF SURAH AL-HAJJ]
17th Para ka Tarjuma
(September 1 to November 23, 2013) 84 din meiñ mukammal huwa.
17th Para (IQTARABA) ki tafseel ye hy.
Ruku: 17
|
Aayat: 190
|
Surah:Al-Anmbiyaa
|
Aayat: 1 to 112
|
Surah : Al-Hajj
|
Aayat : 1 to 78
|
Surah
AL-HAJJ ka Tarjuma (October 14 to
November 23, 2013) 41 din meiñ mukammal huwa.
Surah AL-HAJJ Madni Surah hy. SURAH AL-HAJJ ki tafseel ye
hy.
Ruku : 10
|
Para : 17(Ruku 08 to 17)
|
Aayaat : 78
|
Kalimaat : 1291
|
Huroof : 5075
|
