Surah Al-Mu'minoon

Para 18 

Surrah 23

  Surah Al-Mu'minoon

ALLAH K NAAM SY SHUROO JO BOHUT MEHRBAN NEHAYAT REHEM FARMANY WALA HY

1.        Baishak Emaan waly Muraad paa gaey¤

2.        Jo log apni Namaz meiñ ijz-o-niaz krty heñ¤

3.        Aur jo baihooda baatoñ sy (har waqt) kinaara-kash rehty heñ¤

4.        Aur jo (hamesha) Zakaat adaa (kr k apni jaan-o-maal ko paak) krty rehty heñ¤

5.        Aur (wo log Muraad paa gaey) jo (daeman) apni sharm-gaahoñ ki hifaazat krty rehty heñ¤

6.        Siwaey apni beeviyoñ k ya on (Shar'ee) baandiyoñ k jo on k hathoñ ki mamlook heñ, baishak (Ahkaam-e-Sharee'at k mutabiq on k paas jany sy) on par koi mlaamat naheeñ¤

7.        Phir jo shakhs on (Halaal Aurtoñ) k siwa kisi aur ka khwahesh-mand huwa to aisy log he hadd sy tajaawaz krny waly (sarkash) heñ (k Halaal sy Haraam ki tarraf tajaawaz krty heñ. Is sy maa'loom huwa k haath sy qazaaey shehwat krna haraam hy. Saeed-bin-Jubair R.A ny farmaya k Allah ny aik Ummat ko azaab kia jo apni sharm-gaahoñ sy khail krty thy)¤

8.        Aur (wo Muraad paa gaey) jo log apni amaanatoñ aur apny wa'doñ ki paasdari krny waly heñ (khwaa wo amaanateñ Allah ki hoñ ya khalq ki aur isi tarrah aihed Khuda k sath hoñ ya makhlooq k sath, sb ki wafaa laazim hy)¤

9.        Aur jo apni Namazoñ ki (madaawmat k sath) hifaazat krny waly heñ (aur onheñ on k waqtoñ meiñ on k sharaaet-o-aadaab k sath adaa krty heñ aur Fraaez-o-Waajibaat aur Sunnan-o-Nawaafil sb ki nigehbani rakhty heñ)¤

10.    Yehi log (Jannat k) Waaris heñ¤

11.    Ye log Jannat k sb sy aa'la baghaat (jahaañ naimatoñ, raahatoñ aur Qurb-e-Elahi ki lazzatoñ ki kasrat ho gi on) ki waraasat (bhi) paeñ gy, wo on meiñ hamesha rahaiñ gy¤

12.    Aur baishak Ham ny insaan ki takhleeq (ki ibtda) matti (k keemiyai ajzaa) k khulasa sy farmai¤

13.    Phir usy nutfa (toleedi qatra) bna kr aik mazboot jagga (rehm-e-maadar) meiñ rak'kha¤

14.    Phir Ham ny us nutfa ko (rehm-e-maadar k andar joñk ki soorat meiñ) mu'alliq wajood bna dia, phir Ham ny us mu'alliq wajood ko aik (aisa) loth'rha bna dia jo daañtoñ sy chabaaya huwa lagta hy, phir Ham ny us loth'rhy sy haddiyoñ ka dhaañcha bnaya, phir Ham ny on haddiyoñ par gosht (aur pat'thy) charhaey, phir Ham ny usy takhleeq ki dusri soorat meiñ (baddal kr tadreejan) nashoo-o-numa di, phir (Us) Allah ny (usy) barha (kr muhkam wajood bna) dia jo sb sy behtar paida farmany wala hy¤

15.    Phir baishak tum is (zindagi) k baad zaroor mrny waly ho¤

16.    Phir baishak tum Qeyaamat k Din (zinda kr k) uthaey jao gy¤

17.    Aur baishak Ham ny tumhary oopar (kurra-e-arzi k gird fizaey baseet meiñ nizaam-e-kaenaat ki hifaazat k liye) saat (7) raasty (yani 7 maqnateesi pattiyañ ya maidaan) bnaey heñ aur Ham (kaenaat ki) takhleeq (aur is ki hifaazat k taqaazoñ) sy bay-khabbar na thy¤

18.    Aur Ham aik andaza k mutabiq (arsa-e-draaz tak) baadiloñ sy pani barsaaty rahy, phir (jab zmeen thandi ho gai to) Ham ny is pani ko zmeen (ki nasheebi jag'hoñ) meiñ thehra dia (jis sy ibtdai samundar wajood meiñ aey) aur baishak Ham isy (bukharaat bna kr) urha dainy par bhi qudrat rakhty heñ (jaisy Apni Qudrat sy naazal farmaya aisy he is par bhi Qaadir heñ k is ko zael kr deñ)¤

19.    Phir Ham ny tumhary liye us (pani) sy (darja-ba-darja yani pehly ibtdai nabaataat phir barhy pody phir drakht wajood meiñ laty huwy) Khajoor aur Añgoor k baghaat bna diye (mazeed braañ) tumhary liye zmeen meiñ (aur bhi) bohut sy phall aur maivy (paida kiye) aur (ab) tum on meiñ sy khaty ho¤

20.    Aur ye drakht (Zaitoon bhi Ham ny paida kia hy) jo Toor-e-Seena sy niklta hy (aur) tail aur khany waloñ k liye saalan ly kr ugta hy¤

21.    Aur baishak tumhary liye chopaeyoñ meiñ (bhi) ghor-tallab pehlu heñ, jo kuchh on k shikmoñ meiñ hota hy Ham tumheñ us meiñ sy (baaz ajzaa ko dhood bna kr) pilaty heñ aur tumhary liye on meiñ (aur bhi) bohut sy fawaed heñ aur tum on meiñ sy (baaz ko zibbah kr k) khaty (bhi) ho¤

22.    Aur (khushki meiñ) on par aur (dar'yaoñ meiñ) kashtiyoñ par tum sawaar (bhi) kiye jaty ho¤

23.    Aur baishak Ham ny Nooh (a.s) ko On ki qom ki tarraf bhaija to Onhoñ ny farmaya: Ay logo! Tum Allah ki ibaadat kia kro Us k siwa tumhara koi Ma'bood naheeñ hy, to kia tum (Us k azaab sy) naheeñ darty? ¤

24.    To On ki qom k sardaar (aur wadairy) jo Kufr kr rahy thy (apni qom sy) kehny laggy: Ye Shakhs mehez tumhary he jaisa aik Bashar hy (is k siwa kuchh naheeñ), Ye tum par (apni) fazeelat-o-bartari qaem krna chahta hy, aur aggar Allah (Hadaayat k liye kisi Paighambar ko bhaijna) chahta to Frishtoñ ko utaar daita, Ham ny to ye baat (k hmary jaisa he aik shakhs hmara Rasool bna dia jaey) apny agly aabaa-o-ajdaad meiñ (kabhi) naheeñ sunni¤

25.    Ye Shakhs to siwaey is k aur kuchh naheeñ k isy deewangi (ka aarza laahaq ho gea) hy so tum aik arsa tak is ka intzaar kro (daikho aagy kia krta hy)¤

26.    (Jab Nooh a.s Apni qom sy mayoos huwy to) arz kia: Ay Mery Rabb! Meri maddad farma q k inhoñ ny Mujhy jhutla dia hy¤

27.    Phir Ham ny On ki tarraf Wahi bhaiji k Tum Hmari nigrani meiñ aur Hmary Hukam k mutabiq aik kashti bnao so jab Hmara Hukm (e-azaab) aa jaey aur tnoor (bhr kr pani) ublny laggy to Tum us (kashti) meiñ har qissam k jaanwaroñ meiñ sy do do jorhy (narr-o-maada) bitha laina aur Apny Ghr waloñ ko bhi (us meiñ sawaar kr laina) siwaey on meiñ sy us shakhs (Kan'aan) k (jo Aap a.s ka baita hy aur) jis par (us k Kufr k baes) Farmaan (e-azaab) pehly he saadar ho chukka hy (Kashti meiñ kul 78 log sawaar huwy, nisf mard aur nisf aurteñ), aur Mujh sy on logoñ k bary meiñ kuchh arz bhi na krna jinhoñ ny (Tumhary inkaar-o-istehza ki soorat meiñ) zulm kia hy, wo (behr-tor) dabo diye jaeñ gy¤

28.    Phir jab Tum aur Tumhari sañggat waly (log) Kashti meiñ theek tarrah sy baith jaeñ to kehna (k) saari ta'reefeñ Allah he k liye heñ Jis ny hammeñ zaalim qom sy nijaat bakhshi¤

29.    Aur arz krna: Ay Mery Rabb! Mujhy Ba-Barkat Manzil par utaar aur Tu sb sy behtar utaarny wala hy¤

30.    Baishak is (waqea) meiñ (bohut see) nishaniyañ heñ aur yaqinan Ham aazmaesh krny waly heñ (jaisy qom-e-Nooh ki aazmaesh ki)¤

31.    Phir Ham ny on k (yani qom-e-Nooh k azaab-o-halaak k) baad dusri qom (yani Aad) ko paida farmaya¤

32.    So Ham ny on meiñ (bhi) onhi meiñ sy Rasool (yani Hood a.s ko) bhaija (aur On ki maarfat us qom ko Hukam dia) k tum Allah ki ibaadat kro aur Us k siwa tumhara koi Ma'bood naheeñ hy, to kia tum (Us k azaab sy) naheeñ darty?¤

33.    Aur on ki qom k (bhi wohi) sardaar (aur wadairy) bol ut'thy jo Kufr kr rahy thy aur Aakhirat ki mulaqaat ko jhutlaty thy aur Ham ny onheñ duniyavi zindagi meiñ (maal-o-dolat ki kasrat k baes) aasoodgi (bhi) dy rak'khi the (logoñ sy kehny laggy) k Ye Shakhs to mehez tumhary he jaisa aik bashar hy, wohi cheezeñ khata hy jo tum khaty ho aur wohi kuchh peeta hy jo tum peety ho¤

34.    Aur aggar tum ny apny he jaisy aik bashar ki ataa'at kr li to phir tum zaroor khasaara uthany waly ho gy¤

35.    (Qom-e-Aad k sardaar aur wadairy Apny Rasool Hood a.s ki nisbat logoñ sy kehny laggy k) Kia Ye (Shakhs) tum sy ye wa'da kr raha hy k jab tum mr jao gy aur tum matti aur (boseeda) haddiyañ ho jao gy to tum (dobara zinda ho kr qabroñ sy) nikaaly jao gy¤

36.    Baeed (az-qeyaas) baeed (az-waqu') heñ wo baateñ jin ka tum sy wa'da kia ja raha hy¤

37.    Wo (Aakhirat ki zindagi kuchh) naheeñ hmari zindgani to yehi dunia hy ham (yeheeñ) mrty aur jeety heñ aur (bs khattam), ham (mrny k baad dobara zinda kr k) naheeñ uthaey jaeñ gy¤

38.    (Apny Rasool ki nisbat onhoñ ny ye kaha k) Ye to mehez aisa Shakhs hy Jis ny Allah par jhoota buhtaan lgaya hy (k Apny Aap ko Allah ka Nabbi btaya aur mrny k baad zinda kiye jany ki khabbar di) aur ham bilkul is par Emaan lany waly naheeñ heñ¤

39.    (Paighambar Hood a.s jab apni qom k Emaan sy mayoos huwy to on k haq meiñ bd-dua ki. Aap a.s ny) arz kia: Ay Mery Rabb! Meri maddad farma is soorat-e-haal meiñ k inhoñ ny Mujhy jhutla dia hy¤

40.    Irshad huwa: Thorhi he dair meiñ wo (apny Kufr-o-takzeeb par) paishmaañ ho kr reh jaeñ gy (jab k azaab-e-Elahi daikheñ gy)¤

41.    Pus sach'chy wa'da k mutabiq onheñ khof-naak aawaaz ny aa pakrha so Ham ny onheñ khass-o-khaashaak bna dia (yani wo halaak ho kr ghaas korhy ki tarrah ho gaey), pus (Añmbiyaa a.s ki takzeeb krny wali) zaalim qom k liye (Hmari Rehmat sy) doori-o-mehroomi hy¤

42.    Phir Ham ny on k (yani Qom-e-Hood k) baad (yakky-baad deegry) dusri Ummatoñ (misl Qom-e-Saaleh aur Qom-e-Loot aur Qom-Shoaib waghaira) ko paida farmaya¤

43.    Koi bhi Ummat apny waqt-e-muqarrar sy na aagy barh sakti hy aur na wo log peechhy hatt sakty heñ (jis Ummat k liye hlaakat ka jo waqt muqarrar hy wo theek usi waqt hlaak ho gi)¤

44.    Phir Ham ny pay-darr-pay Apny Rasooloñ ko bhaija. Jab bhi kisi Ummat k paas us ka Rasool aata wo Usy jhutla daity (aur Us par Emaan na laty) to Ham (bhi) on meiñ sy ba'az ko ba'az k peechhy (yani baad waloñ ko pehloñ ki tarrah hlaak-darr-hlaak) krty chally gaey aur Ham ny onheñ daastaneñ bna dala (k baad waly afsaana ki tarrah on ka haal beyaan kia kreñ aur on k azaab-o-hlaakat ka beyaan sabbab-e-ibrat ho), pus hlaakat ho on logoñ k liye jo Emaan naheeñ laty¤

45.     Phir Ham ny Moosa (a.s) aur On k Bhai Haroon (a.s) ko Apni Nishaniyañ aur Roshan Dleel (misl Asaa-o-Yadd-e-Baiza waghaira) dy kr bhaija¤

46.    Fir'on aur us (ki qom) k sardaaroñ ki tarraf to onhoñ ny bhi takabbar-o-ra'oonat sy kaam lia aur wo bhi (barhy) zaalim-o-sarkash log thy¤

47.    So (jab Moosa a.s aur Haroon a.s ny onheñ Emaan ki da'wat di to) onhoñ ny (bhi yehi) kaha k kia ham apny jaisy do (2) Bashroñ (yani Moosa a.s aur Haroon a.s) par Emaan ly aeñ haalañky in ki qom (Bani-Israeel) k log hmari purastish krty heñ yani hmary zair-e-farmaan heñ)¤

48.    Pus onhoñ ny (bhi) On Donoñ (Añmbiyaa a.s) ko jhutla dia so wo bhi hlaak kiye gaey logoñ meiñ sy ho gaey (aur gharq kr diye gaey)¤

49.    Aur baishak Ham ny Moosa (a.s) ko Kitaab (Toraat) ataa farmai ta k wo log (yani Bani-Israeel) hadaayat pa jaeñ¤

50.    Aur Ham ny ibn-e-Mar'yam (yani Eesa a.s) ko aur On ki Maañ ko Apni (zabbardast) Nishani bnaya (yani Eesa a.s ko baghair baap k paida kia) aur Ham ny On Donoñ ko aik (aisi) buland zmeen meiñ sakoonat bakhshi jo ba-aasaesh-o-aaraam rehny k qaabil (bhi) the aur wahaañ aañkhoñ k (nazaary k) liye behty pani (yani nehreñ, aabshareñ aur chashmy bhi) thy (is zmeen sy muraad Bait-ul-Muqaddas hy ya Damishq ya Falasteen)¤

51.    (Har Rasool ko On k zmaany meiñ ye nida farmai gai) Ay Rusul (e-Uzzaam!) Tum pakeeza cheezoñ meiñ sy khaya kro (jaisa k Tumhara ma'mool hy) aur Naik ammal krty raho, baishak Maiñ jo ammal bhi tum krty ho us sy waaqif hooñ (aur us ki Jazaa dooñ ga)¤

52.    Aur baishak Ye Tumhari Ummat hy (jo haqiqat meiñ) aik he Ummat (hy) aur Maiñ Tumhara Rabb hooñ so Mujh sy darra kro¤

53.     Pus onhoñ ny (yani pehli Ummatoñ ny) apny (Deen k) amr ko aapas meiñ ikhtilaaf kr k firqa firqa kr dala (koi Yahoodi bn gea koi Nasraani aur koi Majoosi), har firqa waly usi qaddar (Deen k hissa) sy jo on k paas hy khush heñ (aur apny aap ko he haq par jaanty heñ aur doosroñ ko baatil samajhty heñ)¤

54.    Pus Aap (s.a.w.w) on ko aik arsa tak (yani on ki mot tak) on k nasha-e-jahaalat-zlaalat meiñ chhorhy rakhye¤

55.    Kia wo log ye gumaan krty heñ k Ham jo (dunia meiñ) maal-o-olaad k zarriye on ki maddad kr rahy heñ¤

56.    To Ham on k liye bhlaiyoñ (ki fraahmi) meiñ jaldi kr rahy heñ (aur ye on k aa'maal ki jazaa hy ya Hmary raazi hony ki dleel hy), (aisa naheeñ) balky onheñ sha'oor he naheeñ hy (k Ham onheñ dheel dy rahy heñ)¤

57.    Baishak jo log apny Rabb ki khashiyyat sy muztrib aur larzaañ rehty heñ (onheñ Us k azaab ka khof hy. Momin naiki kr k bhi Khuda sy darta rehta hy aur Kaafir baddi kr k bhi naddar rehta hy)¤

58.    Aur jo log apny Rabb ki Aayatoñ par Emaan rakhty heñ (aur Us ki Kitaboñ ko maanty heñ)¤

59.    Aur jo log apny Rabb k saath (kisi ko) shareek naheeñ thehraty¤

60.    Aur jo log (Allah ki Raah meiñ itna kuchh) daity heñ jitna wo dy sakty heñ aur (is k baawjood) on k dil khaef rehty heñ k wo apny Rabb ki tarraf pallat kr jany waly heñ (kaheeñ ye na-maqbool na ho jaey)¤

61.    Yehi log bhlaiyoñ (k smaitny meiñ) jaldi kr rahy heñ aur wohi is meiñ aagy nikkal jany waly heñ (yani wo Naikiyoñ meiñ sabqat krty heñ)¤

62.    Aur Ham kisi jaan ko takleef naheeñ daity maggar us ki ista'daad k mutabiq aur Hmary paas (har shakhs ka) noshta (e-aa'maal mojood) hy jo sach sach keh dy ga aur on par zulm naheeñ kia jaey ga (na kisi ki Naiki ghatai jaey gi na baddi barhai jaey gi)¤

63.    Balky on (Kuffaar) k dil is (Quran k paighaam) sy ghaflat meiñ (parhy) heñ aur is k siwa (bhi) on k kai aur (bury) aa'maal heñ jin par wo ammal-paira heñ¤

64.    Yahaañ tak k jab Ham on k ameer aur aasooda-haal logoñ ko azaab ki grift meiñ leñ gy to us waqt wo cheekh ut'theñ gy¤

65.    (On sy kaha jaey ga) Tum aaj matt cheekho, baishak Hmari tarraf sy tumhari koi maddad naheeñ ki jaey gi¤

66.    (Ay Kaafiro) Baishak Meri Aayateñ tum par parh parh kr sunai jati then to tum airhiyoñ k ball ulty pallat jaya krty thy (aur on par Emaan naheeñ laty thy)¤

67.    Is sy gharoor-o-takabbar krty huwy (k tum ehl-e-Harram ho) raat k andhairy meiñ (Kaa'ba k gird jamma ho kr Quran par ta'an aur) bay-hooda goi krty thy¤

68.    So kia onhoñ ny is Farmaan (e-Elahi yani Quran) meiñ ghor-o-hoz naheeñ kia ya on k paas koi aisi cheez aa gai hy jo on k agly baap-dada k paas naheeñ ai the (yani Rasool ka tashreef lana koi nai ya nirali baat naheeñ)¤

69.    Ya onhoñ ny Apny Rasool ko naheeñ pehchana so (is liye) wo Us k munkar ho gaey heñ¤

70.    Ya ye kehty heñ k is (Rasool s.a.w.w) ko janoon (la-haq) ho gea hy (aisa har giz naheeñ) balky Wo on k paas haq ly kr tashreef laey heñ aur on meiñ sy aksar log haq ko pasand naheeñ krty¤

71.    Aur aggar Haq (Ta'aala) on (Kaafiroñ) ki khwaheshaat ki pairvi krta to (saary) aasmaan aur zmeen aur jo (makhlooqaat-o-mojoodaat) in meiñ heñ sb tbaah-o-barbaad ho jaty balky Ham on k paas wo (Quran) laey heñ jis meiñ on ki izzat-o-sharf (aur naam-varri ka raaz) hy so wo apni izzat he sy mooñh phair rahy heñ¤

72.    Kia Aap (s.a.w.w) on sy (tableegh-e-Risaalat par) kuchh ujrat maañgty heñ? (aisa bhi naheeñ hy) Aap (s.a.w.w) k to Rabb ka ajr (he bohut) behtar hy aur Wo sb sy behtar rozi-rasaañ hy¤

73.    Aur baishak Aap (s.a.w.w) to (onhi k bhally k liye) onheñ seedhi raah ki tarraf bulaty heñ¤

74.     Aur baishak jo log Aakhirat par Emaan naheeñ rakhty (wo) zaroor (seedhi) raah (yani Deen-e-Haq) sy katraey rehty heñ¤

75.    Aur aggar Ham on par rehem farma deñ aur (qehet-sali ki) jo takleef onheñ (laahaq) hy usy door kr deñ to wo bhatakty huwy apni sarkashi meiñ mazeed pakky ho jaeñ gy (jab Quresh Aap s.a.w.w ki Bd-Duaa sy 7 saal k qehet meiñ mubtla huwy to Abu-Sufiyaan ny Aap s.a.w.w ki khidmat meiñ arz kia: Log bhook ki bay-tabi sy murdaar tak kha gaey, Aap Dua farmaeñ k Allah ye qehet door farma dy)¤

76.    Aur baishak Ham ny onheñ azaab meiñ pakkarh lia phir (bhi) onhoñ ny apny Rabb k liye aajzi ikhteyaar na ki aur na wo (Us k hazoor) girh'girhaey¤

77.    Yahaañ tak k jab (Roz-e-Qeyaamat) Ham on par sakht azaab ka darwaza khol deñ gy (to) us waqt wo us meiñ intahai hairat sy saakat-o-mayoos (parhy) raheñ gy¤

78.    Aur Wohi hy Jo tumhary liye kaan aur aañkheñ aur dil (o-damaagh) rafta rafta wajood meiñ laya (ta k sunno, daikho aur samjho aur Deeni-o-duniyavi naffa' haasil kro maggar) tum log bohut he km shukr adaa krty ho (aur kaanoñ, aañkhoñ aur diloñ sy Aayaat-e-Elahia k sun'ny daikhny, samajhny aur Maarfat-e-Elahi haasil kr k shukr-guzaar ban'ny ka naffa' naheeñ uthaty)¤

79.    Aur Wohi hy Jis ny tumheñ rooey-zmeen par paida kr k phaila dia aur tum (Roz-e-Qeyaamat) Usi k hazoor jamma' kiye jao gy¤

80.    Aur Wohi hy Jo zindagi bakhshta hy aur mot daita hy aur shabb-o-roz ka gardish krna (bhi) Usi k ikhteyaar meiñ hy. So kia tum samajhty naheeñ ho? (k in nishaniyoñ sy ibrat haasil kro aur in meiñ Khuda ki Qudrat ka mushaaheda kr k mrny k baad zinda kiye jany ko tasleem kro aur Emaan lao)¤

81.    Balky ye log (bhi) usi tarrah ki baateñ krty heñ jis tarrah ki agly (Kaafir) krty rahy heñ¤

82.    Ye kehty heñ k jab ham mr jaeñ gy aur ham khaak aur (boseeda) haddiyañ ho jaeñ gy to kia ham (phir zinda kr k) uthaey jaeñ gy?¤

83.    Baishak ham sy (bhi) aur hmary aaba-o-ajdaad sy (bhi) pehly yehi wa'da kia jata raha (hy), ye (baateñ) mehez pehly logoñ k afsany heñ (jin ki koi haqiqat naheeñ)¤

84.    (Ay Habib s.a.w.w on kaafiroñ sy) farmaeye k zmeen aur jo koi is meiñ (reh raha) hy (sb) kis ki milk hy, aggar tum (kuchh) jaanty ho?¤

85.    Wo foran bol ut'theñ gy k (sb kuchh) Allah ka hy (q k bajuz is k koi jawaab he naheeñ), (to) Aap (s.a.w.w) farmaeñ: Phir tum naseehat qabool q naheeñ krty? (k Jis ny kaenaat ko ibtdan paida farmaya Wo zaroor murdoñ ko zinda krny par Qaadir hy)¤

86.    (Aap s.a.w.w on Kaafiroñ sy dar'yaaft) farmaeye k saatoñ aasmanoñ ka aur Arsh-e-Azeem (yani sari kaenaat k iqtdaar-e-Aa'la) ka Maalik kon hy?¤

87.    Wo foran kaheñ gy: Ye (sb kuchh) Allah ka hy (to) Aap (s.a.w.w) farmaeñ: Phir tum (Shirk krny sy) darty q naheeñ ho?¤

88.    Aap (s.a.w.w on sy) farmaeye k Wo kon hy Jis k Dast-e-Qudrat meiñ har cheez ki kaamil milkiyyat hy aur Jo pnaah daita hy aur Jis k khilaaf (koi) pnaah naheeñ di ja sakti, aggar tum (kuchh) jaanty ho (to jawaab do)?¤

89.    Wo foran kaheñ gy: Ye (sb Shaneñ) Allah he k liye heñ, (to) Aap (s.a.w.w) farmaeñ: Phir tumheñ kahaañ sy (jadoo ki tarrah) fraib dia ja raha hy? (yani kis Shetani dhoky meiñ ho k Toheed-o-Ta'at-e-Elahi ko chhorh kr baatil ko haq sammajh rahy ho)¤

90.    Balky Ham ny onheñ Haq pohncha dia (k Allah k na olaad ho sakti hy na Us ka shareek) aur baishak wo jhooty heñ (jo Us k liye shareek-o-olaad thehraty heñ)¤

91.    Allah ny (Apny liye) koi olaad naheeñ bnai (q k Wo no' aur jins sy Paak hy aur olaad wohi ho sakti hy jo ham-jins ho) aur na he Us k saath koi aur Khuda hy (jo uloohiyyat meiñ shareek ho) warna har Khuda apni apni makhlooq ko zaroor (alag) ly jata (aur us ko dusry k tehet tasarraf na chhorhta) aur yaqinan wo aik dusry par ghalba haasil krty (aur poori Kaenaat meiñ fasaad bapaa ho jata) Allah on baatoñ sy Paak hy jo wo beyaan krty heñ (k Us k liye shareek aur olaad thehraty heñ)¤

92.    (Wo) posheeda aur aashkaar (sb cheezoñ) ka jaan'ny wala hy so Wo on cheezoñ sy buland-o-bartar hy jinheñ ye shareek thehraty heñ¤

93.    Aap (s.a.w.w Duaa) farmaeye k Ay Mery Rabb! Aggar Tu Mujhy wo (azaab) dikhany laggy jis ka in sy wa'da kia ja raha hy¤

94.    (To) Ay Mery Rabb: Mujhy zaalim qom meiñ shaamil na farmana (ye Duaa ba-treeq-e-tawaazo-o-izhaar-e-bandgi hy. Q k Añmbiyaa a.s Ma'soom hony k bawjood Istighfaar kia krty thy)¤

95.     Aur baishak Ham is baat par zaroor Qaadir heñ k Ham Aap (s.a.w.w) ko wo (azaab) dikha deñ jis ka Ham in sy wa'da kr rahy heñ (ye jawaab hy on Kuffaar ka jo azaab ka inkaar krty thy)¤

96.    Aap (s.a.w.w) burai ko aisy treeqa sy daffa' kia kreñ jo sb sy behtar ho Ham on (baatoñ) ko khoob jaanty heñ jo ye beyaan krty heñ¤

97.    Aur Aap (s.a.w.w Duaa) farmaeye: Ay Mery Rabb! Maiñ Shetanoñ k waswasoñ sy Teri pnaah maañgta hooñ¤

98.    Aur Ay Mery Rabb! Maiñ is baat sy (bhi) Teri pnaah maañgta hooñ k wo Mery paas aaeñ¤

99.    Yahaañ tak k jab on meiñ sy kisi ko mot aa jaey gi (yani Kaafir mot k waqt tak to Kufr-o-sarkashi meiñ mubtla rehta hy aur jab mot ka waqt aata hy aur us ko Jahannam meiñ us ka maqaam dikhaya jata hy aur Jannat ka wo maqaam bhi dikhaya jata hy k aggar wo Emaan lata to ye maqaam usy dia jata to) wo kahy ga:Ay mery Rabb! Mujhy (dunia meiñ) waapas bhaij dy¤

100.                Ta k maiñ us (dunia) meiñ kuchh naik ammal kr loon jisy maiñ chhorh aaya  hooñ. (usy farmaya jaey ga) Har giz naheeñ, ye wo baat hy jisy wo (bator-e-hasrat) keh raha ho ga, aur on k aagy us din tak aik parda (yani mot haael) hy (jis din) wo (qabroñ sy) uthaey jaeñ gy¤

101.                Phir jab Soor phooñka jaey ga to on k darmeyaan us din na rishty (baqi) raheñ gy aur na wo aik dusry ka haal poochh sakkeñ gy¤

102.                Pus jin k palrhy (zeyaada aa'maal aur Naikiyoñ k baes) bhaari hoñ gy to wohi log kaam'yaab-o-kamran hoñ gy¤

103.                Aur jin k palrhy (aa'maal ka wazzan na hony k baes) halky hoñ gy to yehi log heñ jinhoñ ny apny aap ko nuqsaan pohnchaya wo hamaisha Dozakh meiñ rehny waly heñ¤

104.                On k chehroñ ko aag jhullas dy gi aur wo us meiñ daant nikly bigrhy huwy mooñh k saath parhy hoñ gy (aag on ko bhoon daly gi aur oopar ka hoñt sukkarh kr nisf sarr tak pohnchy ga aur neechy ka naaf tak lattak jaey ga)¤

105.                (Jab Kaafir Dozakh meiñ jall rahy hoñ gy to on sy kaha jaey ga) Kia (dunia meiñ) tum par Meri Aayateñ parh parh kr naheeñ sunai jati then phir tum onheñ jhutlaya krty thy¤

106.                Wo kaheñ gy: Ay hmary Rabb! Ham par hmari bd-bakhti ghaalib aa gai the aur ham yaqinan gumrah qom thy¤

107.                Ay hmary Rabb! Tu hammeñ yahaañ sy nikaal dy phir aggar ham (usi gumrahi ka) e'aada kreñ to baishak ham zaalim hoñ gy (Dozkhi log Jahannam k darogha ko 40 saal tak pukaarty raheñ gy us k baad wo jawaab dy ga k tum Jahannam meiñ he parhy raho gy. Phir wo Allah ko maddad k liye pukaareñ gy aur ye pukaar dunia sy dooni ummar ki muddat tak jari rahy gi)¤

108.                Irshaad ho ga: (Ab) isi meiñ zillat k saath parhy raho aur Mujh sy baat na kro (ab on ki umeedeñ munqaty' ho jaeñ gi aur ye ehl-e-Jahannam ka aakhri kalaam ho ga)¤

109.                Baishak Mery bndoñ meiñ sy aik tabqa aisa bhi tha jo (Mery hazoor) arz kia krty thy: Ay hmary Rabb! Ham Emaan ly aaey heñ pus Tu hammeñ bakhsh dy aur Ham par rehem farma aur Tu (he) sb sy behtar rehem farmany wala hy¤

110.                To tum on ka tamaskhar kia krty thy (ye Aayateñ Kuffaar-e-Quresh k haq meiñ naazal hoo'eeñ jo As'haab-e-Rasool s.a.w.w sy tamaskhar krty thy) yahaañ tak k onhoñ ny (yani on k saath tamaskhar ny) tumheñ Meri yaad bhi bhula di aur tum (sirf) on ki tazheek he krty rehty thy¤

111.                Baishak aaj Maiñ ny onheñ on k sabr ka jo wo krty rahy (ye) silla ataa farmaya hy k wo kaam'yaab ho gaey heñ¤

112.                Irshaad ho ga k (ay Kaafiro) tum zmeen meiñ (yani dunia meiñ aur qabr meiñ) barsoñ k shumaar sy kitni muddat thehry rahy (ho)?¤

113.                Wo kaheñ gy: Ham aik din ya din ka kuchh hissa thehry (hoñ gy. Us din ki dehshat sy onheñ apny dunia meiñ rehny ki muddat yaad na rahy gi) Aap aa'daad-o-shumaar krny waloñ  (yani on Malaaeka) sy (jin ko bndoñ ki umreñ aur on k aa'maal likhny par ma'moor kia gea hy) poochh leñ¤

114.                Irshaad ho ga: Tum (wahaañ) naheeñ thehry Maggar (ba-nisbat Aakhirat k) bohut he thorha arsa. Kaash! Tum (ye baat waheeñ) jaanty hoty¤

115.                So kia tum ny ye kheyaal kr liya tha k Ham ny tumheñ bay-kaar (o-bay-maqsad) paida kia hy aur ye k tum Hmari tarraf lot kr naheeñ ao gy (aur Aakhirat meiñ jazaa k liye naheeñ uthaey jao gy)?¤

116.                Pus Allah Jo Baadshah-e-Haqiqi hy Buland-o-Bartar hy Us k siwa koi Ma'bood naheeñ Buzurgi aur izzat waly Arsh (iqtdaar) ka (Wohi) Maalik hy¤

117.                Aur jo shakhs Allah k sath kisi aur ma'bood ki purastish krta hy us k paas is ki koi sannad naheeñ hy so us ka hisaab us k Rabb he k paas hy. Baishak Kaafir log flaah naheeñ paeñ gy¤

118.                Aur Aap (s.a.w.w) arz keejiye: Ay Mery Rabb Tu (Emaan waloñ ko) bakhsh dy aur rehem farma aur Tu (he) sb sy behtar rehem farmany wala hy¤

Surah AL-MU'MINOON Makki Surah hy. SURAH AL-MU'MINOON ki tafseel ye hy.

Surah AL-MU'MINOON ka Tarjuma (November 24 to December 25, 2013) 32 din meiñ mukammal huwa.

Ruku : 06

Para  : 18 (Ruku 01 to 06)

Aayaat    :    118

Kalimaat :  1840

Huroof    :  4802